ፆሳ ናይታ
1ኑኒ ፆሳ ናይታ ጌተትድ ፄገታና መላ ፆሳይ ኑና አይ መላ ዶስዳኮ በእተ። ኑኒ ቱማካ ፆሳ ናይታ። ሀ አላመይ ፆሳ ኤሮና ግሾ ኑናካ ኤረና።2ታ ሲቆ እሻቶ፥ ሀእ ኑኒ ፆሳ ናይታ፤ ኑኒ አይ ሀናኔኮ ቡሮ ኤረትቤና። ሽን ክርስቶስ ቆንጭያ ዎደ ኑኒ እያ ዳናናይሳ ኤሮስ። እ ቱማ ደኤይሳ ኑኒ በአና።3ክርስቶሳ በአና ግድ ኡፋይሳን ናግያ ኦንካ፥ ክርስቶስ ጌሽ ግድዳይሳዳ ባና ጌሼስ።4ናጋር ህገ መን ግድያ ግሾ ናጋራ ኦያ ኡባይ ፆሳ ህገ መንስ።5ክርስቶስ አሳ ናጋራ ይሳናዉ ቆንጭዳይሳ ህንተ ኤሬታ፤ እያን ናጋር ባዋ።6ክርስቶሳን ደእያ ኦንካ ናጋራን ዴና። ቃስ ናጋራን ደእያ ኦንካ እያ በእቤና ዎይኮ ኤርቤና።7ታ ናይቶ፥ ህንተና ኦንካ ባለፎ። ክርስቶስ ፅሎ ግድዳይሳዳ ፅሎ ኦያ ኦንካ ፅሎ።8ፃላሄይ ኮይሮፐ ናጋራ ኦዳ ግሾ ናጋራ ኡባ ዎደ ኦያ ኦንካ ፃላሄ ዳቦ። ሄሳ ግሾ፥ ፆሳ ናአይ ፃላሄ ኦሶ ይሳናዉ ቆንጭስ።9ፆሳ ናአ ግድያ ኦንካ ፆሳ አያናይ እያን ደእያ ግሾ፥ እ ኡባ ዎደ ናጋራን ዴና። ፆሳይ እያ አዋ ግድያ ግሾ ናጋራን ዴና።10ፆሳ ናይታ ግዶንነ ፃላሄ ናይታ ግዶን ደእያ ዱማተይ ሄሳን ኤረቴስ፤ ፅሎ ኦና አስ ዎይኮ ባ እሻ ዶሶና አስ ፆሳ ናአ ግደና።እሶይ እሱዋ ዶስተ
11ኮይሮፐ ህንተ ስእዳ ኪታይ፥ “እሶይ እሱዋ ዶሳናዉ በሴስ” ግያ ኪታ።12ኑኒ ቃየላ መላ ግዳናዉ በሰና። ቃየላ ፃላሄ ዳቦ ግድድ ባ እሻ ዎስ። እ ባ እሻ አይስ ዎዴ? እያ ኦሶይ ኢታ ግድዳ ግሾነ እያ እሻ ኦሶይ ሎኦ ግድዳ ግሾ ዎስ።13ታ እሻቶ፥ ሀ አላምያ አሳይ ህንተና እፅኮ ማላለቶፍተ።14ኑኒ ኑ እሻታ ሲቅያ ግሾ፥ ሀይቆፐ ደኦ ፕንዳይሳ ኤሮስ። ባ እሻ ዶሶና ኦንካ ሀይቆ ኩያን ደኤስ።15ባ እሻ እፅያ ኦንካ ሸምፖ ዎስ። ቃስ ሸምፖ ዎያ ኦደስካ መርና ደኦይ ባይናይሳ ህንተ ኤሬታ።16ክርስቶስ ባ ሸምፑዋ ኑ ግሾ አድ እምዳይሳን ሲቆይ አይበኮ ኑኒ ኤርዳ። ኑካ ኑ እሻታ ግሾ ኑ ሸምፑዋ አድ እማናዉ በሴስ።17ሽን ዱረ ግድዳ ኦንካ መቶታንቹዋ በእሸ፥ እያዉ ቃቶና እፅኮ ባ ዎዛናን ፆሳ ሲቆይ ደኤስ ጋናዉ ዋንድ ዳንዳኢ?18ታ ናይቶ፥ ኑኒ ኦሶንነ ቱማተን ኑ ሲቁዋ ቆንጭሳናዉ በሴስፐ አትሽን፥ ጮ ኦዳ ፃላላን ዎይኮ ዶና ፃላላን ሲቀታናዉ በሰና።19ኑኒ እሶይ እሱዋ ሲቅኮ፥ ኑ ቱማ ባጋ ግደይሳ ኤሮስ፤ ሄሳስ ፆሳ ስንን ዬላቶኮ።20ኑ ዎዛናይ ኑ ቦላ ፕርድያባ ግድኮ፥ ፆሳይ ኑ ዎዛናፐ ግታ ግደይሳ ኤሮስ፤ እ ኡባባ ኤሬስ።21ታ ሲቆ እሻቶ፥ ኑ ዎዛናይ ኑ ቦላ ፕርዶናባ ግድኮ ኑኒ ፆሳ ስንን ያዮኮ።22ኑኒ እያ ኪታ ናግያ ግሾነ እያ ኡፋይስያባ ኦያ ግሾ ዎስያባ ኡባ እያፐ ኤኮስ።23ክርስቶስ ኑና ኪትዳይሳዳ ፆሳ ናኣ የሱስ ክርስቶሳ ሱንን አማናናዳነ እሶይ እሱዋ ሲቃናዳ ፆሳይ ኑና ኪትስ።24ፆሳ ኪታ ናግያ ኦንካ ፆሳን ደኤስ፤ ፆሳይካ እያን ደኤስ። ፆሳይ ኑስ እምዳ ጌሻ አያና ባጋራ እ ኑናን ደኤይሳ ኤሮስ።