ዳዊታ ካልዳ ኦላንቾታ
1ዳዊቲ ቂሳ ናኣ ሳኦላፐ ባቃትድ ፅቅላጋን ኡትዳ ዎደ እያኮ ይዳ አሳት ሀይሳፈ ካልድ ፃፈትዳይሳታ። ኤንታ ካሰ ዳዊታ ኦላን ማድዳ ምኖ አሳታ ግዶን ደኦሶና።2ኤንቲ ዶንገን ዱከይሳታ፤ ቃስ ኡሻቻ ኩሸንነ ሀድርሳ ኩሸን ያምባራናዉነ ዶንገ ዱካናዉ ዳንዳኦሶና። ኤንቲ ብንያመ ኮቸ ግድዳ ሳኦላ ኮቻታ።3ኤንታ ሀላቃይ አህኤዘራ፤ እያፐ ካልድ እዮኣሳ፤ ኤንቲ ግብአ አድያ ሻማአ ናአ። ሀራት ቃስ አዝማወ ናይታ ግድዳ ይዝኤላነ ፓላፃ፥ ባራካ፥ አናቶተ አድያ እዩ፥4ሀስታማታ ግዶን ዎልቃማ ግድድ፥ ኤንታ ካለያ ጋባኦና አድያ ይሽማእያ፥ ኤርምያሳ፥ ያሀዝኤላ፥ ዮሃና፥ ገዳራ አድያ ዮዛባታ፥5ኤሉዛያ፥ ያርሞታ፥ ባላያ፥ ሳማራ፥ ሀርፋ አድያ ሳፋፃ፥6ቆረ ኮቸ ግድዳ ኤልቃና፥ ይሽያ፥ አዛርኤላ፥ ዮኤዘራነ ያሾብኣማ፥7ጋዶራ አድያ ይሮሃማ ናይታ ዮኤላነ ዛባዳ።8ዳዊቲ ባዞን ደእያ ሚፃን ደእሽን፥ ጋደ ኮቻፈ ጉ አሳት እያኮ ይዶሶና። ኤንቲ ምኖነ ኦላስ ጊግዳይሳታ፤ ጎንዳለነ ቶራ ኦይካናዉ ዳንዳኤይሳታ። ኤንታ ሶምኦይ ጋሞ ሶምኦ መላ፤ ኤንቲ ደረ ሁጰራ ጉፕያ ገንኤ መላ ኤሶቶሶና።9ኤንታ ሀላቃይ ኤፀራ፤ ናምአንይ አብድዩ፤ ሄንይ ኤልኣባ፤10ኦይዳንይ ምስማና፤ እቻሻንይ ኤርምያሳ፤11ኡሱፑንይ አታያ፤ ላፑንይ ኤልኤላ፤12ሆስፑንይ ዮሃና፤ ኡዱፉንይ ኤልዛባዳ፤13ታማንይ ኤርምያሳ፤ ታማነ እሳንይ ማክባናያ።14ሀይሳቲ ጋደ ኮቻ ኦላንቾታስ ሀላቃታ። ኤንታፈ ዝቃይ ማቶ ሀላቃ፤ ቃይ ቃስ ሻላቃ ግድስ።15ዮርዳኖሰ ሻፋይ፥ ጋፃፐ ጋፃ ጋክድ ክፅዳ ኮይሮ አጌናን ፕንዳይሳት ሀይሳታ። ኤንቲ ዛንጋራን ዶሎሀነ ዉሎሀ ባጋን ደእያ አሳ ኡባ የደዶሶና።16ብንያመ ኮቻፈነ ይሁዳ ኮቻፈ ጉ አሳት ዳዊቲ ደእያ ሚፃ ብዶሶና።17ዳዊቲ ኤንታራ ጋሄታናዉ ከይድ፥ “ህንተ ታና ማዳናዉ ሳሮ ታኮ ይዳባ ግድኮ ታ ዎዛናይ ህንተራ ግዳና። ሽን ህንተ ታና ታ ሞርከታስ አድ እማናዉ ይዳባ ግድኮ፥ ህንተና ኤርተ! ታኒ ኦዳ ኢታባይ ባይና ግሾ ኑ አዋታ ፆሳይ ሄሳ በኦ፤ እ ህንተና ፕርዶ!” ያግስ።18ሄሳፈ ጉየ፥ ሀስታማታ ሀላቃ አማሳያ ቦላ ፆሳ አያናይ ዎን፥“ዳዊታ፥ ኑኒ ነይሳታ!እሰየ ናአዉ፥ ኑኒ ኔራ ደኦስ!ሳሮይ ነዉ ግዶ!ነና ማደይሳታስ ሳሮይ ግዶ!ነ ፆሳይ ነና ማዳና” ያግስ።ዳዊቲ ኤንታ ኤክድ ባ ኦላንቾታስ ሀላቃ ኦስ።19ዳዊቲ ፍልስፄመታራ ግድድ ሳኦላ ኦላናዉ ብዳ ዎደ፥ ምናሰ ኮቻፈ ጉ አሳት ዳዊታራ ጋሄትዶሶና። ሽን ፍልስፄመታ ሀላቃት ዳዊቲነ ዳዊታ አሳይ ባንታራ ቦናዳ ድግዶሶና። ዳዊቲነ ዳዊታ አሳይ፥ ኤንታ ካዋ ሳኦላስ አድ እማነኮ ግድ ያይዳ ግሾ ፍልስፄመት ዞረትዳፐ ጉየ ኤንታ ጉየ ዛርዶሶና።20ዳዊቲ ፅቅላጋ ስምዳ ዎደ ምናሰ ኮቻፈ ዳዊታ ማዳናዉ ከይዳ አሳት አድና፥ ዮዛባታ፥ ይድኤላ፥ ምካኤላ፥ ዮዛባታ፥ ኤልሀነ ፅልታያ። ሀይሳቲ ካሰ ምናሰ ቢታን ሻላቃ።21ኤንቲ ኡባይ ምኖነ ዎልቃማ አስ ግድያ ግሾ ዳዊቲ ዙግድ ኦልያ አሳ ኦልድ እያ ማድዶሶና።22ዳዊቲ ኦላንቾት፥ ፆሳ ኦላንቾዳ ዳራና ጋካናዉ እያ ማድያ አሳይ ጋላስ ጋላስ ጉዠቴስ።23ጎዳይ እያዉ ግዳይሳዳ ሳኦላ ካዎተ ዳዊታኮ ዛራናዉ ዳንጨትድ ዳዊታኮ ከብሮና ብዳ ኦላንቾታ ታይቦይ ሀይሳፈ ካልድ ፃፈትዳይሳታ።24ጎንዳለነ ቶራ ኦይክድ ኦላስ ጊግዳ ይሁዳ ኮቻይ 6,800.25ስሞና ኮቻፈ ኦላስ ጊግዳ ምኖነ ዎልቃማ ኦላንቾት 7,100.26ሌወ ኮቻፈ 4,600.27አሮና ኮቻ ሀላቃይ ዮዳሄ፤ ዮዳሄራ እስፈ 3,700 አሳት ደኦሶና።28ሳዶቅ ናአተ፥ ምኖነ ዎልቃማ አስ፤ ሳዶቃ ሶ አሳፐ ላታማነ ናምኡ ሀላቃት እያራ ደኦሶና።29ብንያመ ኮቸ ግድዳ ሳኦላ ዳቦት 3,000. ሽን ብንያመ ኮቻፈ ዳርያ ባጋይ ሳኦላ ሶ አሳስ ሄ ዎደ ጋካናዉ አማነትዶሶና።30ኤፍሬማ ኮቻፈ ባንታ ሶ አሳን ኤረትዳ ምኖነ ዎልቃማ አሳት 20,800.31ዳዊታ ካዎያናዉ ባናዉ ዶረትዳ ምናሰ ኮቻፈ ባጋት 18,000.32እስራኤለ አሳይ አይ ኦናዉ በሲያኮ ዎድያባ ሻክድ ኤርያ አኬካንቾ አሳት፥ ይሳኮራ ኮቻ ሀላቃት፥ ናምኡ ፄታ፤ ኤንታ ዳቦት ኡባይ ኤንታዉ ኪተቶሶና።33ኦላ ሚሸ ኡባ ኦይክድ ባንታ ኩመ ዎዛናን ዳዊታ ማዳናዉ ጊግዳ ኦላንቾታን ዛብሎና ኮቻይ 50,000.34ንፍታለመ ኮቻፈ 1,000 ሀላቃትነ ጎንዳለነ ቶራ ኦይክያ 37,000 አሳት ኤንታራ ደኦሶና።35ዳነ ኮቻፈ ኦላስ ጊግዳ አሳት 28,600.36ኦላስ ከያናዉ አሴራ ኮቻፈ ጊግዳ አሳት 40,000.37ዮርዳኖሰ ሻፋፐ ሄፍን ዶሎሀ ባጋን ደእያ ሮቤላ ኮቻፈ ጋደ ኮቻፈነ ምናሰ ኮቸ ባጋፈ ኦላ ሚሸ ኡባ ኦይክድ ይዳ አሳት 120,000.38ሀ ኡባ ኦላንቾት ዳዊታ እስራኤለ ቦላ ካዎናዉ ባንታ ቆፋ ቃችድ፥ ከብሮና ካታማ ይዶሶና። ቃስ እስራኤለፐ አትዳይሳት ዳዊታ ካዎናዉ እስ ዎዛናን ግድዶሶና።39ኤንታ ዳቦት ኤንታዉ ኮሽያባ ጊግስዳ ግሾ ምሸነ ኡይሸ ዳዊታራ ሄ ጋላስ ኡትዶሶና።40እስራኤለ አሳስ ኡፋይስ ግድያ ግሾ፥ ፑደሀ ባጋን ደእያ ይሳኮራፐ፥ ዛብሎናፐነ ንፍታለመፐ ዳሮ አሳይ ለ፥ ባላሰ ኑካ፥ ዎይነ ቴራ፥ ዎይነ ኡሹነ ዛይተ ሀረን፥ ባቁሎን፥ ግማለንነ ቦራን ጫንድ ኤህዶሶና፤ ቃስ ኤንቲ መሄነ ዶርሰ ሹክድ ማናዉ ኤህዶሶና።