Midiyaame Dere Bolla Dendida Ola
1GODAY Muses,2«Midiyaame asay Isra7eele asaa bolla gaththida qohoza gishshas neni Midiyaame asaa halo kessa; hessa ooththidaappe guye neni hayqqana» gides.3Hessa gishshas Musey derezas, «Midiyaame asay GODAA bolla kase ooththida qohoza gishshas intte halo kessanaas olas giigettite.4Isra7eele asaa zarkkefe zarkkefe issi issi shii attumas dooridi gede olas yeddite» gides.5Hessa gishshas Isra7eele zarkketappe issi issi shii as kessi immiin 12,000 asi olas gixettidi giigettides.6Museykka issi issi zarkkefe issi issi shii asi qeese El7ezeere naa Finihaase kaaleththon olas yeddides; Finihaasikka geeshshasozappe dumma miishshatanne olas denththeththiza zayeta ba kushen oykkidi bides.7Isttika GODAY Muse azazida mala Midiyaame asaa olidi attumasaa mulera wodhida.8Hayqqidayta giddon Midiyaame kawo ichchashati Eeway, Ereqeemey, Xuurey, Uureynne Ereba7ey deettes; Bi7oore naa Balaamekka mashshan wodhida.9Isra7eele asay Midiyaame maccassatanne guuththa nayta di7idi istta mehetanne istta aqota ubbaa pitti ekkides.10Istti diza katamatanne istti diza gutata ubbaa taman xuuggida.11Istta asaa, mehaanne di7ida miish ubbaa ekkida.12Yordaanoose shaafappe he pinththa ginara diza Mo7aabe demban dunkaani uttida Musekko, qeese El7ezeerekkonne kumeththa Isra7eele maabaraakko ehida.13Musey qeese El7ezeereynne maabaraa kaaleththizayti ola asaa mokkanaas gede kezida.14Musey gidikko olaasoppe haa simmiza ola asaa azaziza shaalaqata bollanne mato halaqata bolla hanqettides.15Izikka isttas, «Hayssa maccas ubbaa aazas wodhontta shemppora paxa aggidetii?16Nuni kase Pe7ooren dishin hayti Balaame zore ekkidi Isra7eele asay ba GODAAPPE haakkana malanne boshan wurana mala ooththiday istta gidettennee!17Hessa gishshas attuma nayta ubbaanne addera gayttida maccassata ubbaa wodhite.18Gido attiin addera gaytti erontta geela7ota wodhontta inttes ashshite.19«Intte garsan as wodhidaadey woykko aha bochchida asi wurikka laappun gallas gakkanaas asi dizasoppe harason gam7o; heedzdzanththa gallassinne laappunththa gallas inttenanne intte di7i ehida maccassata geeshshite.20Hessaththoka ay may7o woykko galbafe, deysha iskefenne miththafe oosettida miish ubbaa geeshshite» gides.21Qeese El7ezeerey olappe simmida attumasaas, «GODAY Muses immida wogati hayssafe kaallizayta;22worqqay, biray, xarqimalay, biratay, qorqoroynne irsaasey,23hessaththoka tamay istta qohonttayti tama giddora aadhdhidi geeyanaas bessees; tama dandayontta ay miishshika kase wodhdhida wogaa mala geeshos giigettida haaththan geeshshite.24Intte intte may7o laappunththa gallas meeccite; hessafe guye intte geesh gidiza gishshas simmidi kase intte dunkaani dizaso gelanaas dandayeeta» gides.Di7i Ehidayssa Gisheteth
25GODAY Muses hizgides,26«Neni qeese El7ezeereynne deraa kaaleththiza korapinnetara gididi di7etti yida asaanne mehaa qoodite.27Nam7u kessi shaakkidi baggaa olaso bida wottadaratas attoyssa hankko maabaraas immite.28Wottadarata gishaappe di7ettida asaappe, miizatappe, haretappe dorsatappenne deyshatappe ichchashu xeetappe issino taas GODAAS dumma imota histti shaakkite.29He intte taas GODAAS shaakkidayssa ta gishaza qeese El7ezeeres immite.30Hinko maabaras imettida gishaappe, asaappe, miizaappe, dorsatappe, deyshatappenne haretappe ichchash tammaafe issino Gaytoteththa Dunkaanen alaafeteththan ooththiza Lewetas immite.»31Museynne El7ezeerey GODAY istta azazidayssa ubbaa ooththida.32Wottadarati banttas ekkishin attidayssi, 675,000 dorsatanne deyshata,33Laappun tammanne nam7u shii miizata,34Usuppun tammanne issi shii hareta,35Heedzdzu tammanne nam7u shii adde erontta geela7ota.36Di7etti yidayssafe baggay oletti yidaytas imettides; hessika 337,500 dorsata.37Isttafe 675 GODAAS dumma imota geetetti shaakettidayta.38Miizati 36,000; isttafe GODAAS dumma imota gidi shaakettidayti laappun tammanne nam7a.39Hareti 30,500; isttafe GODAAS dumma imota gidi shaakettidayti usuppuna.40Adde erontta geela7oti 16,000; isttafe GODAAS dumma imota gididi shaakettidayti heedzdzu tammanne nam7a.41Hessa gishshas Musey GODAY iza azazida mala GODAAS dumma imota histti shaakkidayssa qeese El7ezeeres immides.42Hankko Isra7eele Maabaraa gishay olas kiitettida wottadarata gishara issi gina.43Hessika 337,500 dorsatanne deyshata,44Heedzdzu tammanne usuppun shii miizata,45Heedzdzu tammu shiyanne ichchashu xeetu hareta,46tammanne usuppun shii adde erontta geela7ota.47Hessa gishshas Musey ichchash tammaafe issino GODAY iza azazida mala Gaytoteththa Dunkaanen alaafeteththan ooththiza Lewe zarkketas immides.48Hessafe guye ola asaa azazizayti shaalaqatinne mato halaqati Museeko shiiqidi,49«Nuni ne oosanchchati nuuppe garsara azazettiza wottadarata ubbaa qoodidos; isttafe issoyka paccibeenna;50hessa gishshas nuni issoy issoy ekkida worqqa aleqota, toho gimota, kushe sagayota, biradhdhe midigata, hayththa gutichchata, qoodhen aadhdhiza maccifarata ubbaa nu nagaraa wursanaas GODAAS yarsho immanaas ekki yidos» gida.51Museynne qeese El7ezeerey worqqafe oosettida alleqota ubbaa ekkida.52Shalaqatappenne mato halaqatappe ekkidi Museynne qeese El7ezeerey GODAAS imota histti shiishshida worqqa alleqoti 16,750 saqile gidides.53Garsara diza wottadarati gidikko ba di7idayssa baas baas ekki bida.54Hessa gishshas Museynne qeese El7ezeerey shalaqatappenne mato halaqatappe ekkida worqqa alleqota GODAA sinththan Isra7eele deraa hassa7isana mala gede Gaytoteththa dunkaanezaakko ekki bida.