Mak11geb_pbt

Zisas ŋgui gari guman pana gegav Zerusareman ndai.

1Zisas Zeriko sharav, wo phorga rui gumgir kov mbe Zerusareman ndai. Mbe ndav vov, Zerusarem han mbav, Oriv mbɨkshɨma han ki ŋgu bisanenin hɨgi, Betani gum Betfage. Mbe mba ŋgunin hɨgap, Zisas wo phorga rui guma phuni ga sarav khaŋ mani ga nzuai, “Ŋko ŋgɨp, mbu fhara ki ŋgu bisanen ŋgɨri. Ŋko ŋgɨp, ŋgun vhen ŋgirɨvra, ŋko za ganɨnga, mbe doŋki ŋgugar kama mbevi ndi thɨrigi ana ki. Guma the fhum mba doŋki ŋguga kama ruigi fhuvara. Ŋko ana mpiiŋ fhɨrgip, ana ndigi zɨri.3Guma the ŋko gangip khaŋ ŋko suanga ‘Ŋko maaŋ ram mbui?’ ŋko khaŋ ana suaŋri, ‘Guma Bakɨme ŋaar anan ki, ana vhemkora ana ndigi taagi zɨrga.’ ”4Ana maaŋ mani ga suaŋgim, mani vui. Mani vov, mba ŋgun hav garim, mba doŋki ŋgugar kam kɨrar tuavra mbe phena thɨma kamanin thɨrav ki. Mani mbaram ana mpiiŋ fhɨri. Mani ana mpiiŋ fhɨrim, gumgi mbari maaŋ thivgiav kav khaŋ mani ga nzuai, “Ŋko maaŋ ram mbuav, mba doŋki ŋgugar kaman mpiiŋ fhɨri?”6Mani mbe ŋgarkarav mba Zisas mani ga suaŋgi kamen mbe nzuai. Mbe mbaram fhura mani garim, mani ana fhɨrgiap, ana ndiga vui.7Mani ana ndiga vov, Zisas han vugap, mbaram mbe wari wo rugahav shari shagi zorgiap, mba doŋki ŋguga kama kɨra suegim, Zisas mbaram ndav, ana tɨ perigi.8Zisas mba doŋki ŋguga kama tɨ perav, mbe ndai. Mbe ndaim, gumgi vhɨrve mbe wari wo rugahav shari shagi zorav, tuap ga sɨgi. Gumgi mbari ruan khira ŋgagi gorav, zav, tuap ga sɨgim, Zisas nta tɨn ndai.9Ana nta tɨn ndaim, gumgi mbari ana nɨman fharigim, mbari ana zɨn kav, kaav khaŋ nzuai, “Hosana!” “Nza Fhe Bakɨmen ndikndigi. Ana tɨvar vhuun kha guman muunga, ana Fhe Bakɨme nduara ana sarigi ana zɨgi.10“Ana nza nzɨga Devitran nzɨk ma. Ana ntige nzan guman pan kɨrga. Fhe Bakɨme tɨvar vhuuŋra anan muuŋrim, ana nza ganɨnga. “Hosana! Nza ne suaŋv Fhe Bakɨme ndikndigɨp nza ne suaŋv Fhe Bakɨme zɨ ndi vu guarara kuamkuarga!”11Zisas ndav vov Zerusareman hɨgap, mbaram vov Fhe Bakɨme phena bɨna vhen vergap, ana vhen mba bigi ana za nta gara ruigi. Ra verav vhɨzgim, ana wo farasegi 12 thɨgi ŋaara gumgir kov, mbe taagia Betanin vergi.

Zisas fik khage suaŋgim, ana shɨɨŋgi.

12Mbe verav, Betani ga kuigap, mɨtimanera mbe taagia khavgiav, Zerusareman ndai. Mbe ndav, Zisas thɨhegi.13Ana thɨhegap, mbe ndav ana samra fik khage garim, niŋge thɨgav ki. Ana niŋge garim, niŋge khovgim, ana khaŋ nzuai, “Niŋge vhɨgi mbarigi thi?” Ana ne ndɨkndɨga vov niŋge garim, niŋge vhɨgi mbarigi fhu, fari khɨnira. Khe fik khira vhɨgi mbai tuk fhuvara.14Ana niŋge gangia thav, mbaram khaŋ mba fik khage nzuai, “Guma the taagip ndun vhɨgar mbegɨrga fhu.” Ana ne nzuaim, ana phorga rui gumgi ne mbararagi.

Zisas Fhe Bakɨme Phena bɨna vhen shɨga mbui ntɨɨri zɨtɨgi.

15Ana maaŋ mba fik khage suaŋgiap, mbe nda vov, Zerusareman hegi. Mbe hegap, Zisas vov Fhe Bakɨme phena bɨna vhen vergap, mba bigi ga vhezav, bigi ndi mbai gumgi zɨtɨgap, mbe ndi kɨrar mbai. Ana mbe ŋkɨɨar kurkurigi kaagi, ana nta siasuav, mbe korigi ndi mbai gumgir mpirmpirɨgi ana vhɨra nta siasui.16Ana maaŋ mbe mbuav vhɨra mbe bigɨn the ndigiv fhura Fhe Bakɨme phena bɨna vhee mbugu ŋgirɨrganen mbe thɨvigi.17Ana maaŋ mbe muuŋgiap, mbaram Fhe Bakɨme buni vhuuin mbe nzuav, khaŋ mbe nzuai, “Fhe Bakɨme buni vhuuiŋ ki gavar Fhe Bakɨme khaŋ nzuai,
‘Na phen mbe kha zɨn anan rɨgɨrga, za kha nuianan ki ŋgui bakɨvi zɨv na phorgɨv suanga phen ma.’Nde maaŋ ana muuŋgi fhuvara. Nde kha tɨvar ana mbuim, ana kɨɨi gumgi zomzori ŋaneŋ fara muuŋgi.”18Ana ne suaŋgim, mba Fhe Bakɨmen rotu gari gumgir pani gum Zudaiŋ tɨvi vhuuiŋ kaŋgi gumgi, mbe ana shogiri ana rimgirga tuavi ndi gari. Mbe vhɨra anan rivgi. Mbe garim, gumgi gu mbigi vhɨrve za ana buni mbararav, ŋgava mbatɨga mbui.19Zisas maaŋ kav mbe nzuav kim, ra verav vhɨzim, ana wo phorga rui gumgir kov, mbe mba ŋgu thav kɨrar hegi.

Guma guigira Fhe Bakɨme ŋkasŋka khothivɨv, ana bigɨn the suaŋv Fhe Bakɨme phorgɨv suaŋgirga, mba bigɨn anan hɨgɨrga.

20Zisas mba mɨtimanera taagia wo phorga rui gumgir kov, mbe taagia mba tuavar ndav, mba fik khage garim, niŋge za nzɨɨ vov, bira phorga shɨɨŋgi.21Mbe niŋge garav, Pita mba Zisas mba fik khage suaŋgi ne ndɨkndɨk suiravra kav, khaŋ Zisas ga nzuai, “Rabai, ndu ganɨ! Ndu gurum mbu fik khage ruma mbuav niŋge suaŋgim, niŋge za shɨɨŋgi!”22Pita ne nzuaim, Zisas ana ŋgarkarav, khaŋ nzuai, “Nde Fhe Bakɨme ŋkasŋka khothivɨri.23Gu guigira nde nzuai, guma the khaŋ kha mbɨkshɨma suanga, ‘Ndu khaŋ thav sigiv, ŋgɨv, wo fegɨ mbasɨk khɨnik,’ mba guma ndɨkndɨga baviran muuŋv, Fhe Bakɨme ŋkasŋka khothɨgɨp, khaŋ suanga, ‘Gu ntige kha nzuai bigeŋ, nan hɨgɨrga,’ ana maaŋ suanga mba bigeŋ guigira anan hɨgɨrga.24Gu maaŋ muuŋgia nde nzuai, nde Fhe Bakɨme ŋkasŋka khothivɨv bigɨn the suaŋv, Fhe Bakɨmen nzanga, ana mba nde nzai bigɨnan nden nɨɨŋgirga.25“Nde Fhe Bakɨme phorgɨv suaŋv, nde harigi ntɨɨri nde muuŋgi tɨvi mbatɨgi ndɨkndɨk suiravra kɨv, nde nta vhɨzgiri. Nde maaŋ muuŋgirga kha Hevenan ki Fhe Bakɨme, nde muuŋgi tɨvi mbatɨgi vhɨzgirga.”

Mbe Zisasan nzarigi, “The ŋkasŋka ana nɨɨŋgi?”

27Zisas wo phorga rui gumgir kov, mbe taagia nda vov Zerusareman hegi. Mbe hegav, Zisas vov Fhe Bakɨme phena bɨna vhen vergap, thiva ruav ki. Ana ruav kim, Fhe Bakɨme rotu gari gumgi pani gum, Zudaiŋ tɨvi vhuuiŋ kaŋgi gumgi mbari gum, mben gumgi ruu mbari, mbe Zisas han zi.28Mbe Zisas han zav, anan nzarigi, “Ndu ram muuŋgi ŋkasŋka kav kha bigi ga mbui? The mba ŋkasŋka ndu nɨɨŋgi?”29Mbe ne nzuaim, Zisas mbe ŋgarkarav, khaŋ mbe nzuai “Gu bigɨna thueŋ ga suaŋv nden nzararga. Nde ne ŋgarkararim, gu za the kha ŋkasŋka na nɨɨŋgim, gu kha bigi ga mbui, ne bun nde suanga.”30Ana nen mbe suaŋgiap, mben nzarigi, “The mba gumgi ruar zav Zon Gumgi Ruai Guma ga sarigim, ana zɨgi? Fhe Bakɨme o, kha nuiana gumgi? Nde na suaŋ.”31Ana mben nzarigim, mbe nen warira nzuav, khaŋ wari ga nzuai, “Nza khaŋ suanga, ‘Fhe Bakɨme ma,’ ana taagi khaŋ nza suanga, ‘Maamgia, nde ram muuŋgiap ana khothivi fhu?’32Maaŋgi nza khaŋ suanga, ‘Kha nuiana gumgi han.’ ” Mbe wo buni vhɨzgi fhuvara. Mbe kha gumgi gu mbigi vhɨrver rivgi. Mbe kaŋgi, kha gumgi gu mbigi za Zon Gumgi Ruai Guma kaŋgi, ana guigira Fhe Bakɨme kamthooŋ guma ma.33Mbe maaŋ muuŋgiap, Zisas ŋgarkarav khaŋ nzuai, “Nza kaŋgi fhu.” Mbe maaŋ nzuaim, Zisas khaŋ mbe nzuai, “Maaŋ muuŋgi, gu the kha ŋkasŋka na nɨɨŋgim, gu kha bigi ga mbui, gu ne nɨɨeŋ bun nde suaŋgirga fhu.”
expand_more
Search