Aromayi10
1Əmi aza ayeyeyi, azanugbai n anyikwozai, əmi ədu ɓəmwi n aduwazhnii ga Shekwoyi ntu Aisrailayi ɓo, əkwo nu nge, ń ɓa ɓə ɓa kwu pwo.2Ntuge mi ɓa myi ma gbmi ɓa əɓo nge ɓa n əwyei nyinyíi lo, ntu Shekwoyi əɓo, ama wyenyi ye, too lo ntu n ɓəyekpe ɓo nu m.3Shikwonyi ɓa to ɓə kpe Shekwoyi ɓəfyecezhni əye m, ntucenu ɓa zhnatna ɓa shi əɓahni nya, ɓa to ɓə n əɓahnii ga fyi n Shekwoyi ɓəfyecezhni m.4Kirisiti nu zhni owa acezhiba, nabai ń a ɓa ɓwa ɓəfyecezhni ga zahozahoyi ń wo ga gaiciya.5Mwusa ka əɓo ye ntu ɓəfyecezhni ɓo nu ń kwo vyi owa nyi: “Əza n wo zhni aɓo ye, wo ɓa gyianyì n ɓai nu.”6Ama ɓəfyecezhni n kwo gbmiɓe ń gaiciyaga, kwo gna: “To da dna n əho ədu, ‘Nyika nu ɓa gwnulo əshemi a?’ ” (N kwo nu gyi nge woo shnizhi ɓe n Kirisitii)7“Kwo ‘nyika nu ɓa kadna shnilo abaloloi tnaceshiba a?’ ” (N kwo nu gyi nge, woo gbmiɓe n Kirisitii ń əfyi).8Ama kwa gna ge nanu a? Nge, “Ɓədagbma wo lo vyivyiwyi n hoi; kwo dnalo n əho əgbe ɓədo n əho ədui,” əkwo nu zhni waazi n yi zhni ntu gaiciyaganunui ɓo:9Ń ha da n əho əgbei, “Yeisu zhni Dagayi nu,” jesnu haa gaiciyaga dna n əho ədu nge Shekwoyi ɓə la wo laka n əfyi, ho ɓa pwo.10Ntuge n əho ədui nu n ho ga gaiciya, a kpma ho aɓoya, jesnu n əho əgbei nu n ho da əho gaiciyaganunui ɓo, ha pwo.11Shi Nyakagyigyiyi ncei da lo, “Zahozahoyi n wo ga gaiciya n wo, vnyinkwo taa wo wo m, kpeekpe.”12Ntuge Yahudiyi to kakai lo n Abyedoyii m, Dagayi gbmanyi nu zhni Dagayi tu n əɓa tukwo vnyanya, woi kpe aza vnyanya anabəlika n ɓa zna wo shni,13ntuge zahozahoyi n wo yi Dagayi əye, wo ɓə la pwo.14To nsaiye, aza ɓa yi əza n wunanu n ɓa too ga gaiciya dna n wo ma a? Njesnu ɓa ɓá ga gaiciya n əza n wunanu n ɓa to wo əwo əɓo ma a? Njesnu ɓa ɓá wo n wunanu ntna əza n wo ɓa zhni waazi ga ɓa a?15Njesnu ɓa ɓá zhni waazi n wunanu to ai tnu ɓa nu ma a? Ngye she kwo kafyilo nyi: “Ho gyelo shi aza yi apita n bmyabmyai n ɓa ɓe n nabagyi manai nyi!”16Ama Aisrailayi vnyanya nu to ɓə gwo nabagyi manai m. Ntuge Ishaya ɓə kwu da, “Dagayi, nyikanu ń la gaiciya ga n əyi ɓədatnu a?”17Ntulonu, gaiciyaganunui ɓe n waazi wowoi nu, jesnu a wo waazi dna n ɓədagbma nu ntu Kirisiti ɓo.18Ama mi nyaɓo lo: Ɓa to ɓə wo nu m? N kwnusnu, ɓa ɓə kwu wo:“Əɓa ɓədatnu ɓə la lapwi fyi n əknyi vnyanya,əɓa ɓədagbma kwa kwu si anyìcezhiba.”19Ama, mi nyaɓo lo: Israila to ɓə ɓwa awyega nu m? Kpmisnui, Mwusa ɓə gna,“Mi ɓa zhni fye fya woshe n aza yii n ɓa to zhni əbye nu m;Mi ɓa zhni minagyi kwa gyi fye, n əbyei n kwo to n awyegai lo m.”20Nlonu Ishaya daɓo lo n əgbei myimyii,“Aza yi n ɓa to ɓə zna mi shni nyi m, ɓà ɓə la mi ɓwa;Mi ɓə la əmihni kpeyawu aza yi n ɓa to ɓə nya mi əɓo nyi m.”21Ama ntu Israila ɓo, wo gna lo,“Dna n wyizo vnyanya, mi la əmi aɓwa kpeyawuaza atnaɓəgbetuvyiyi n atukwognanakwoyii.”
Biblica, Inc.