Ɓəkpəkpəyawu21
Əshemi woiwoyi n əknyi woiwoyii
1Nlonu ma gye “əshemi woiwoyi əwye n əknyi woiwoyii,” ntuge əshemi kpmisnui n əknyi kpmisnuii ɓa ɓə la duya jesnu shikwo ho to ɓə ye shnasnu m.2Ma gye Əzhiyaakwo Gyigyiyi, Urishelima woiwoyi, kwoi gbmiɓe n əshemi n Shekwoyi aba, n əkwohnii zhni nyigwnu n bmyabmyai ngye mwulanyikwo ntu əwo əɓa ɓo.3Jesnu ma wo bəgye n latu kwoi gbmi n əbeshnikpegye kwoi gna, “Shiawye! Nsaiye Shekwoyi aseseba kwo la kwnusnu n azanyikwocii, jesnu wo ɓa kwnudna n ɓai. Ɓa ɓə kwu zhni əwo aza, jesnu Shekwoyi n əwohni tukwoi wo ɓə kwnusnu n ɓai woi la zhni əɓa Shekwoyi.4Wo ɓə wnu awyenyi dəhodəhoi ya n əɓa awyeba. A to ɓə je əfyi gye m, kwo bwugbazhii kwo ɓwuci kwo snasna m, ntuge anya akwokwoi vnyanya ɓa la duya.”5Əza n wo ɓə sasetu n əbeshnikpegye nyi wa gna, “Mi gnyi mii zhni nyahonyahoi kwa zhni woiwoyi nu!” Nlonu wa gna, “Kwu dəye ka shi, ntuge aɓədagbma ye kwnukpema lo, jesnu n zhni gaiciya.”6Wa gna mi: “A kwu kwo zhni. Əmi nu zhni, Kpmisnuyi n Kpmaknayii. Əza n wo n nuwna myikwnui, mi ɓə ga wo nuwna wa sni ntna gyiwyegbai, nuwna pyipyii wyewyeyi nya.7Aza n ɓa ɓə gyi nasala, ɓa ɓə ɓwa anya ye vnyanya əgwu, jesnu mi ɓə la zhni əɓa Shekwoyi, ɓa ɓə kwu zhni əmi aɓyi.8Ama adnawoyi, atnagaiciyagayi, awyeɓwoyi, azawuyii, aɓənyashnada, aza yi n ɓa tu agbákwnu gyifyi nya mwi, ashnagbayi n akataceyii vnyanya; əɓa afyiba nu ɓə gnyi n ənaznudnai solufo nya. Dəye nu zhni əfyi baayi.”Urishelima woiwoyi, Kwugyasnáyi mwulanyikwo
9Maləka gbmanyi dna n amaləka tnaaba yi, n wo ɓə n ashnapa ngwnu-tnaabai shi nyi n nunui n agwnù tnaaba kpmaknyaii nyi, wa ɓe wa gna mi, “Ɓe, ma wu ho Mwulanyikwo, Kwugyasnáyi nyikwo.”10Njesnu wa la mi lo ncei dna n Zafnu lo əpeyaakwo asnada, wa wu mi Əzhiyaakwo Gyigyiyi, Urishelima, kwoi shnizhi ɓe n əshemi kwoi gbmi n Shekwoyi aba.11Kwoi bmyana n latu Shekwoyi nyai, jesnu əkwo ənabmya ɓə wu ngye kwuta manai dudui nu, ngye jaspa, n knaknaiya təgetəge.12Kwo ɓə n gəlu yaakwo asnadai, n abwokwnumii ngwnu-awoceaba, n amaləkai ngwnu-awoceaba n zhi n abwokwnumi. Israila abye ngwnu-awoceaba aye ɓə kakpe n abwokwnumi.13Abwokwnumi ɓə knyi ngwnu-ata n anyipyei kpeɓwa, ngwnu-ata n snuɓwa, ngwnu-ata n snutaɓwa jesnu ngwnu-ata n nyipyeishniɓwa.14Gəlu əzhiyaakwo nya ɓə n ashnipai kpeaje ngwnu-awoceaba jesnu, Kwugyasnáyi atnutnuloyi ngwnu-awoceaba aye ɓə kakpe n ɓa.15Maləka n wo ɓə daɓo n mii nyi, ɓə n abamwi-bwusii shi zinali nya wa mwi əzhiyaakwo yi, əkwo abwokwnumi n əkwo agəlui.16Əzhiyaakwo yi ɓə gnyi n asəpai ngwnu-anyi nu, əkwo əkpa nsnu dəidəi n əkwo patai. Wa mwi əzhiyaakwo yi n bwusi abamwi-bwusii, wa ɓwa akilomita 2,200 n əkpa, jesnu pata n asnai ngye əkwo əkpa.17Maləka wa mwi gəlu n zanyikwoci ɓwashai wa gye ɓa nyi amita n shnishni, woi zhni apma n zanyikwoci nyamwunyai, kwo ɓə nyi tagyi-gbmanyi ncei kpe shiinyiceanyi (144) nu n əɓwasha shnishni.18A ɓə mi gəlu n jaspa akwutái nu, jesnu əzhiyaakwo n zinali tnadodnai nu, n wu təgetəge ngye maganyi.19Ashnipa əzhiyaakwo gəlu nya ɓə zhniaba gnyi n kwuta manai dəhodəhoi pyai. Jaspa nu ɓə zhni shnipa kpmisnui, baayi sapyiya, taayi agate, nyiiyi emyeral,20tnuuyi onis, tnaanyii rubyi, tnaaba yi kirisolait, nyimwanyimwai beril, ciwagbmanyii topaz, ngwunu-nwoyi turkuois, woceigbmanyii jasinti, jesnu wocei-baayi ametis.21Abwokwnumi awoceaba ɓə zhni n anyai n a yi ge pyeril awoceaba nya nu, abwokwnumi dəhodəhoi ncei zhni n pyeril ɓwugyi. Adnadna yakwo əzhiyaakwo nya ɓə zhni zinalii nu n tnadodnai ngye maganyi.22Mi to ɓəə gye Dagayipwuwa n əzhiyaakwoi m, ntuge Dagayi Shekwoyi Kaláda Duduyi Vnyanya, n Kwugyasnáyi əɓa nu zhni əkwo Dagayipwuwa.23Əzhiyaakwo ye ta ye nyipyei bwuznagna lo kwo əpya nya kwa fnukpe n əkwo m, ntuge latu Shekwoyi nya ga kwo bwuznagna njesnu Kwugyasnáyi nu zhni əkwo pyitila.24Abye ɓə znazna n əkwo bwuznagnai nu, njesnu asu anyi nya ɓa ɓə ɓe n əɓa bmyabmyai fyi n kwo.25Wyiho to lo n a ɓə gwu əkwo abwokwnumi m nanyinanyi, ntuge a to ɓə gye sukwo n ɓo m.26A ɓə ɓe n latui ɓədo n mwamwa abye nyai fyi n kwo.27Nyahonyahoi ntnagyiyi, to ɓə lodna n kwo m, kwo əza n wo zhni əɓo n kwo n vnyinkwoi kwo kwocedna m, ama aza yi nu ɓwasnu n əɓa aye kafyilo n Kwugyasnáyi pafyi wyewyeyi nya.Biblica, Inc.