Ɓəkpəkpəyawu19
Haliluya aɓwa ngwnu-ata ntu Babyila myimyiya ɓo
1N dəye avnu ma wo kəsnu n kwo ɓə wo ngye wyiɓe deeji yaakwo nya n əshemi n kalái:“Haliluya!Gnyignyi n latui n kaláiɓa zhni əyi Shekwoyi nya nu,2ntuge əho awada ɓa zhni gaiciya nu jesnu n cefyé.Wo la kaluwa yaakwo ye znuknyi n wo ɓə wnu əknyi ya n əwo anagbáizhniyi nyi.Wo kwu əwo atnutnuyi ami gbata n nyikwo yi.”3Njesnu ɓa je əwyiɓe:“Haliluya!Awú əwo ənagyi nya, ɓa gwnulo əshe lonyalonyalo.”4Azakwoyi ngwnu shiiba-ceanyi jesnu n anya awyewyeyi ngwnu-anyi ɓa yazhi ɓa ci Shekwoyi, əza n wo ɓə sasetu n əbeshnikpegye. Njesnu ɓa fyiakwu: “Aamyi, Haliluya!”5Nlonu bəgye kwa gbmiɓe n əbeshnikpegye, kwoi gna:“Fye ci əyi Shekwoyi,əfye vnyanya əwo atnutnuyi,əfye n fye wo wo ədna nyi,aɓyinawyiyi n aza yaakwoi!”6Nlonu ma wo kəsnu ngye deeji yaakwo nya, ngye avava nuwna wyiɓe ɓədo ngye əgbma awyisa, kwoi ɓəwyi:“Haliluya!Ntuge əyi Dagayi Shekwoyi Kaláda Duduyi Vnyanya gyibe lo.7Fa ya dagbmajesnu a da yi ya ga wo latu!Ntuge Kwugyasnáyi mwulapa kwo la ɓe,jesnu əwo Mwulanyikwo wo la əwohni ye.8Aje-luweluwe n fnafnai jesnu n gyigyiyi n shana ya,a kwu ga wo wa kpe.”(Alulu manai aje, ɓa zhi ɓai wu Shekwoyi aza agyigyiyi aɓəfyecezhni atnutnu nu.)9Nlonu maləka wa gna mi, “Ka dəye: Aza anabəlikada nu n a kwu Kwugyasnáyi amwula nyagyi pa ɓa!” Njesnu waa əɓo ɓe, “Adəye nu zhni Shekwoyi aɓədagbma hnihnii.”10N dəye dadai, ma yashi n əwo apitabwada aba nabai ma ga wo mwamwa. Ama wa gna mi, “To zhni ce m! Mi zhni tnutnuyi nu ce n kwnusnu n hoi n əho azajei ɓədo n əho amapwii n ɓa n Yeisu ɓəgbmii shiɓwa nyi. Ga Shekwoyi mwamwa! Ntuge Zafnu sheɓəgwogna nya nu zhni Yeisu ɓəgbmiyi.”Əshemi okwnuyi wo kwu nyawnanyawna gyiakalá
11Ma gye əshemi n gwuya gnyi jesnu ma gye dokwo bwui n gnyi n abaayi, ai yi əkwo gwnuyi ge, Gbenuyi jesnu Gaiciyayi. N ɓəfyecei nu n wo da owa jesnu woi snukwnú.12Əwo awye wulo ngye əná-gwogwoi, jesnu wo ɓə n afnunyi bəgyéi kwnu n əwo tukwo. Wo ɓə n əyei ka tu n əwohni, ń əzahozahoyi ta kpe kwo əye lo m, akpe əwo n əwohnii.13Wo n ajei kpe lo n a kwu ɓa dafyi n ami, jesnu ai yi əwo əye ge Shekwoyi Ɓədagbma.14Əshemi akwnuyi ɓə laɓa ɓai vyi wo, ɓa ɓə kpe n adokwo bwui jesnu n ajei kpe alulu manai bwuibwui gyigyiyi nya.15Əbeyaakwo n gyígyiyi kwoi gbmiɓe n əwo əgbe ədo n wo ɓa znu abye knyi ncei. “Wo ɓə gyibe tu ɓa n snukna bwusii.” Wo dna anamnuwnapyiba Shekwoyi Kaláda Duduyi Vnyanya minagyi napyei nya.16Tu n əwo əje-kpadalai ɓədo n əwo bwuzhikwoi, wo n əye yéi ka tu lo:Asu aje Əsu jesnu adagayi aje Dagayii.17Jesnu ma gye maləka n gnyiagnyi dna n nyipyei, n wo ɓə dnawyi n bəgye yaakwoi ga alú vnyanya n ɓa gyeafu kpe n anyìbmana, “Fye ɓe, fya yezhi n aba gbmanyi ntu wyeshenyagyi yaakwo Shekwoyi nya ɓo,18nabai n fye ɓa myi fya gyi asu abwu, akwnudawazha, ɓədo n aza akaladai, adokwo ɓədo n əɓa agwnuyii, ɓədo n aza vnyanya abwui, aloloiya ɓədo n afyenuyii, azayaakwo n aɓyinawyii.”19Nlonu ma gye nyawnanyawna ɓədo n asu əknyi nyai, n əɓa akwnuyii, n yezhi n abagbmanyi nabai ɓa snukwnú n dokwo gwnuyii ɓədo n əwo akwnuyii.20Ama a ɓə la nyawnanyawnai wna, ɓədo n sheɓəgwognayi katái, əza n wo ɓə wu aznù n əkwo apitaɓwi. N aznù yei wa fyi aza kwoce n ɓa ɓə la nyawnanyawnai aznù gwo jesnu ɓa ga əkwo dogbe jijiyi mwamwa. Əɓa ngwnu-aba a ɓə kwu ɓa sheya fyi n wyewyeyii, n əná-znudna solufo nya.21Aza n ɓa ɓə ce nyi, a wu ɓa n əbeyaakwoi n kwo ɓə gbmiɓe n dokwo gwnuyi əgbe, jesnu alú afugyeyi vnyanya ɓa gyi əɓa abwu, nubwo kwa kwu ɓa fu n.
Biblica, Inc.