Ɓəkpəkpəyawu16
Ashnapa tnaaba Shekwoyi minagyi napyei nya
1Nlonu ma wo bəgye n latu kwoi gbmi n Dagayipwuwa kwoi gna amaləka ngwnu-tnaaba yi, “Fye lo, fye zè ashnapa ngwnu-tnaaba Shekwoyi minagyi napyei nya ya kpe n əknyi.”2Maləka kpmisnui wa lo wa zè əwo shnapa anya ya kpe n əknyi, jesnu aci asnasnai ɓa kwnukpe n aza n ɓa ɓə n əznù nyawnanyawna nyai kpe jesnu ɓai ga əkwo dogbe mwamwa.3Maləka baayi wa zè əwo shnapa anya ya kpe n shikwo, kwa kwu zè ngye zafyi ami, jesnu ənya wyewyeyi dəhodəhoi n kwo ɓə dna n shikwonyi kwo ɓə la fyí.4Maləka taayi wa zè əwo shnapa anya ya kpe n àlà ɓədo n anyaɓwo-nuwnai, jesnu ɓa kwu zè ami.5Nlonu ma wo maləka n anuwna ɓə fyi n əwo akwnu nyi woi gna:“Ho kwu awa ye da ceewo, O Əza Gyigyiyi,əho n ho nyì jesnu n ho ɓəə nyì nyi;6ntuge ɓa la əho aza gyigyiyi ami zeya ǹ sheaɓəgwognayi anyai,jesnu ho kwu ami ga ɓa nge ɓa sni ngye shi kwo gwo a zhni ɓa.”7Ma wo bəgədi kwoi dnaɓəgbe:“Əə, Dagayi Shekwoyi Kaláda Duduyi Vnyanya,əho awada zhni gaiciya nu jesnu n wu ceewo.”8Maləka nyiiyi wa zè əwo shnapa anya ya kpe n nyipyei, jesnu aa nyipyei fa kwa gyi aza əná n əkwo ənái.9Ɓa ɓə la tokpe ntu nyipyei ənagyi ɓo, jesnu ɓa kpe Shekwoyi əye aknyi, n əwo nu ɓə ikwoi ntu n agwnù yi nyi, dudulonu to ɓa yeabwi m, jesnu to ɓa ga wo mwamwa m.10Maləka tnuuyi wa zè əwo shnapa anya ya kpe n nyawnanyawna əbeshnikpegye, jesnu əkwo əbemi kwaa nu gnyi n wyegbmai. Aza ɓa gyi əɓa anyitala fyi n snasna yaakwo11jesnu ɓa kpe Shekwoyi əshemi nya aknyi ntu n əɓa aci snasna ɓo, ama ɓaa abwiye aɓo na n aɓo n ɓa ɓəə kwu zhni nyi.12Maləka tnaanyii wa zè əwo shnapa anya ya kpe n Ifyiretus əlà yaakwo, jesnu əkwo nuwna kwa kwu woakawu nabai wa zhni zokwo ntu asu ɓo n ɓa kwnu n Kpəkwó ɓwa nyi.13Nlonu ma gye ase ajegbmii ngwnu-ata n wu ngye adugba; ɓa kwnuɓe n tumise əgbe, n nyawnanyawna əgbei njesnu n sheɓəgwognayi katái əgbei.14Ɓa nu zhni ase n ɓa zhni aznù, n ɓa kwnuya lo da asu ń anyìmi vnyanya, ɓa ye ɓa zhi ntu okwnusnu ɓo n nyipyei yaakwoi Shekwoyi Kaláda Duduyi Vnyanya nya.15“Shiawye, mi ɓe lo ngye əvyì! Anabəlikada nu n əzai n wa pmi mi, jesnu waa myignyi, n əwo ajei kpe, nabai n wo to ɓə lo n ɓwotoloyii m, jesnu ai pmi wo ya gnyi n vnyinkwoi m.”16Nlonu ɓa ye asu zhi ń abagbmanyi n aba n Aibraniyi yi nge Amagədon nyi.17Maləka tnaabai wa zè əwo shnapa anya ya fyi n əse, a wo bəgye latui kwoi gbmiɓe n Dagayipwuwa kwoi gbmi n əbeshnikpegye, kwoi gna, “A kwu zozhni!”18Nlonu əgbmana kwa bmya laɓa, kwoi sáwyi, əgbma awyijei kwoi gwoawyiya, jesnu əknyi kwa jeashna ɓwoye kwoi sofyi. Əknyi ashnaje ye pya to ɓəə shnizhni m kpeekpe shi a ɓəi zhni zanyikwoci dna n anyì m, əknyi ashnaje ye ɓə wodna.19Əzhiyaakwo Babyila kwa gnajeya akwu ngwnu-ata, azhi ayaakwo abye nya ɓaa myiya. Shekwoyi wa pá Babyila Yaakwo ɓo jesnu wa ga kwo bwoɓyi n nunui n anamnuwnai əwo minagyi nazhii nya.20Mwuse dəhodəhoi kwa bwusiya laɓa jesnu to a gye ape dəhodəhoi əwye m.21N anyìbmana, a gye agbmakwuta adnagbmai, dəhodəhoi n woshna ngye Kyilo shiitnu, ɓa kaya kpe n aza. Njesnu ɓa kpe Shekwoyi aknyi ntu ogwnù agbmakwuta nya ɓo, ntuge ogwnù ye ɓə wodna wowoi zam.Biblica, Inc.