Afyilibyiyi1
1Bwulus n Timotii, Kirisiti Yeisu atnutnuyi.
Kwo lo da Shekwoyi aza agyigyiyi nu vnyanya fyi n Kirisiti Yeisu n ɓa fyi n Fyilibyi nyi, ɓədo n atukwoda-awyednayi n adikin.2Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.
Kwo lo da Shekwoyi aza agyigyiyi nu vnyanya fyi n Kirisiti Yeisu n ɓa fyi n Fyilibyi nyi, ɓədo n atukwoda-awyednayi n adikin.2Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.
Amisa n aduwazhnii.
3Mi sa əmi Shekwoyi ami nsahosahoi n ma pa əfye əɓo ncei.4Dna n əmi aduwazhni ga fye vnyanya mi zhni ɓa n agbmadai nu ciici5ntu n əfye ɓwadodna ɓo ń nabagyi manai tnutnu, ənya n kwo ɓə laka n nyipyei kpmisnui kwoi ɓe nsaiye,6mi n agwui dnakalá lo ntu ɓəye ɓo, nge əwo ń wo ɓə ya tnutnu manai fyi n əfye nyi, wo ɓa gwodu n kwoi lo əkwo zozo, kwoi nya Kirisiti Yeisu nyipyei.7Kwo bmyalo á wo mi nlonu ntu əfye ɓo vnyanya, shikwonyi, mi ǹ əfye ɓei dnalo n əmi ədu, kwo a mii fyiagbma nu, kwo mii snukwnú nu ntuge ma gbmi nabagyi manai əɓo, əfye vnyanya n əɓwai kwnudna lo n mii n Shekwoyi shebmyashi.8Shekwoyi ɓa gbmi mi əɓo shi awyekwo mi lo ntu əfye ɓo vnyanya n Kirisiti Yeisu yeyei.9Njesnu əmi aduwazhni nu nyi: nge əfye yeye ɓa myi kwa mwamwaɓe dna n ɓəyekpe, ɓədo n awyega loloyii.10Nabai n fye ɓa myi fya kpe əɓo ye n kwo gnabmya jesnu fya myi fya kwu zhi n tnadodnai n tnaɓətui kwa nya Kirisiti nyipyei,11n nunui n gyigyiga ɓəfyecezhni nyai, n kwo ɓə dna n Yeisu Kirisiti nu, kwa ɓe Shekwoyi n latui ɓədo n cicii.Bwulus agbmafyi zhni nabagyi manai kwoi gyiabye
12Nsaiye əmi azaje azanugbai n anyikwozai, mi ye fya kpe nge əɓo n kwo ɓə ɓwa mi nyi, ɓəhnihnii kwo la ɓe n bmazhnii n mwa ntu n nabagyi manai abyegyi ɓo.13Ntucenu, agalukwo abagwuyi vnyanya ɓa kwu əkwo əɓo kpe ɓədo n azai n ɓa ce nyi, nge mi dna n agbma ntu Kirisiti ɓo nu.14Njesnu ntu n əmi agbma ɓo, əmi azaje azanugbai n anyikwozai ɓa kwu agwumyizhi n Dagayi ɓai gna kwnukwnuya ɓai zhni waazi nabagyi manai nya n tna ədna.15Kwo zhni gaiciya nu nge, azaho zhni Kirisiti waazi ntu nuwnu ɓo nu ɓədo n shewoi, ama azaje zhni waazi kwoi kwnu n bwugba manai nu.16Okwu kpmaknayi zhni kwo dna n yeye nu, ɓai kpe nge, a n mii dna n ya ntu n okwnusnu ɓo nu ga nabagyi manai.17Okwu kpmisnuyi zhni Kirisiti waazi ntu n gnawohni bwugbaɓəye ɓo nu, toge dna n gaiciya m, ɓai zhninubwo nge, ɓa ɓá ɓe mi azhnìgye əsa n mi dnalo ncei n agbma.18Ama kwo n knyiɓei nu lo a? Əɓo kpokəloi əkwo nu nge, kwo dna n knyi zokwoi nù a, kwo kwoi gbmi n bwugba kwocedna nya nu, kwo kwoi gbmi n bwugba gaiciya nya nu, a kwu Kirisiti waazizhni. Njesnu ntu dəye ɓo, mi nya agbmada lo. Əə, mi ɓa gyiabye n agbmada nyai,19ntuge mi kpəlo nge ntu əfye aduwazhni ɓo nu n Yeisu Kirisiti Zafnui n Shekwoyi ga nyi, əɓo n kwa ɓwa mi nyi, kwo ɓaa zè əmi gnyignyi nya.20Mi pmignyi lo n awyeyai njesnu mi n awyetui lo nge ɓəho taa zhni vnyinkwo kwoi wo mi m, ama mi ɓə ɓwa bwugbakala n kwnuce nabai nsaiye ngye she kwo shnisnu ciici nyi, n Kirisiti ɓe ɓwa latu n əmi nayi kwo gnyi n wyewyeyii kwo dna n əfyi.21Ntuge n əmi aba, anyìgyi zhni Kirisiti nu, njesnu n ma fyi gyiba nu.22Ngye mi ɓa gwodu ma gyianyì nu dna n nayi, kwo ɓaa zhni tnutnu gyigyiga nya nu n əmi aba. Dudulonu, mi ɓa knyi knyidei nu a? Mi ta kpəlo m!23Mi kwu jeje dna n aɓo ye ngwnu-aba: A wo mi lo ngye mi laka ma lo mii kwnusnu n Kirisitii, ntuge əkwo nu dulo shaasha;24ama kwo n apmai gnasnu lo n əfye aba mi ye la dna n nayi.25Shi kwo laka dna n əmi ədu nyi, mi kpəlo nge mi ɓaa dna njesnu mi ɓə ye la kwnusnu n fyei vnyanya, ntu n əfye abyegyi ɓo ɓədo n agbmadai fyi n gaiciyaga.26Nabai nge əsa n mi je kwnusnu lo n fyei, əfye gbegyi dna n Kirisiti Yeisu kwo mwamwaɓe ntu əmi ɓo.Wyewyeyi n kwo kwnuce dna n nabagyi manai
27Kwo knyiɓei nu ɓa zhni a, fye gyianyì fyi n zokwo n kwo kwnuce n nabagyi manai Kirisiti nyai. Kwo n ma ɓe nu ma gye fye, kwo n ma ɓwa əfye əɓo wowo nu n tagnyi, mi ɓə kwu kpe nge fye myizhi lo n agnyi dna n Zafnu gbmanyi n əfyehnii kwukwui n kwnusnu n ajei ngye zaknayi ntu n gaiciyaga ɓo n nabagyi manai28to azai fyi fye ədna n zokwo dəhodəhoi n ɓa gnyiapaapa n əfyei nyi m. Dəye zhni əznù nu n əɓa aba nge a ɓə kwu ɓa zhniagbma, ama nge fye ɓə kwu pwo; ama Shekwoyi nu zhni kwo.29Ntuge a la kwo ga əfye dna n Kirisiti apitaɓwi, nge fye to ɓwa gaiciya nu ga n əwo m, ama fye gyeazhnì ce ntu n əwo ɓo.30Shikwonyi fye tusnunu gbmanyigbmanyi nu n fye ɓəə gye mi mii tu nyi, njesnu nsaiye fye kwu wo nge mi ye tu kwo lo.Biblica, Inc.