Matiyu5
Waazizhni tu ń əpe
1She Yeisu ɓə gye deeji, wa gwnutu lo n əpe səpa waa sase. Əwo amwutuyi ɓa ɓe da wo,2wa ya ɓa nyawu. Anabəlika aduduyiWa gna:3“Anabəlikada nu n awyekwoyii fyi n zafnu,ntuge Shekwoyi əbemi zhni əɓa nya nu.4Anabəlikada nu n aza yii ń ɓa wnubwugba,ntuge a ɓə zhni ɓa atna.5Anabəlikada nu ń atukwogbayii,ntuge anyi ɓaa zè əɓa əgwú.6Anabəlikada nu n aza yii n ɓa wo myikwnu n nuwna myikwnui ntu ɓəfyecezhni ɓo,ntuge a ɓə fwú ɓa nubwo.7Anabəlikada nu ń asnusnugyeyii,ntuge a ɓə wu ɓa snusnugye.8Anabəlikada nu ń aza yii ń əɓa ədu n tnadodnai,ntuge ɓa ɓə gye Shekwoyi əwye.9Anabəlikada nu n aza yii ń ɓa wna aɓəzhi,ntuge a ɓə yi ɓa ge Shekwoyi aɓyi.10Anabəlikada nu n aza yii ń a wna ɓa əsnu ntu ń ɓəfyecezhni ɓo,ntuge əshebemi zhni əɓa nya nu.11“Anabəlikada nu n fyei əsa ń aza knyi fye akpmi, ɓai wu fye awyesnugbegye ɓo jesnu ɓai kpe fye aɓənukwoi dəhodəhoi akatá nya ntu ń əmi ɓo.12Fye zhni bwugbabwui, fya dagbma ntuge əfye gyiba zhni yaakwo nu dna ń əshemi, ntuge nlonu nu n ɓa ɓə wú sheaɓəgwognayi awyesnugbegye ɓo ń ɓa ɓə gyi n əfye abye nyi.
Snakpegye n bwuznagnai
13“Əfye nu zhni snakpegye anyì nya. Ama ń snakpegye kwo lá əkwo apmanya kwnuya, kwo ɓa je əkwo dada ɓwa ń wunanu a? Kwo to ye n apmai lo ntu nyahonyahoi ɓo m, akpəge a zè kwo ya zhi jesnu a dna kwo n apitai.14“Əfye nu zhni bwuznagna anyì nya. Əzhi n kwo mi kpe ń əpe, a taa myi a so kwo m.15A ta wna pyitila əná aa kwo kwnu papa m. N əkwoɓwi, a tukwo n əkwo kwnuyi nu jesnu kwa ga zahozahoyi bwuznagna dna n pwuwa.16Nlonu cè, fa əfye bwuznagna kwa fnu n aza vnyanya aba, nabai ɓa gye əfye atnutnu amanai ɓa la əfye Dada tu n wo dna ń əshemi nyi.Owa nunu
17“Fye to zhninubwo nge ma ɓe ma wnu Owa ya nu m, kwo Sheaɓəgwognayi ɓəda m; mi to ɓe ma wnu ɓa ya nu m, ama ma nu ɓa.18Mi gna fye ɓəhnihni nu, əshemi ń əknyii ɓa ɓə la duya, ama nyaka byegye gnagbagbai to lo n kwo ɓə ɓwuwye m, owa dəhodəhoi ɓa gyiabye lo nú kwoi nu əɓo n a ye ncei.19Ntucenu zahozahoyi n waa ɓəgbetu gnagbagbai pmyishi, wa wu azaje lonu, a ɓə yi wo gnagbagbai n əshebemi. Ama zahozahoyi n wa vyi waa wu aɓəgbetu ye, a ɓə yi wo nge əza yaakwo dna n əshebemi.20Ntuge mi gna əfye nge akpe əfye aɓəfyecezhni ɓa kwu du Afarisiyii nya n owa anyawuyii, fye to ɓə lofyi n əshebemi m nanyinanyi.Əzawu
21“Fye kwu wo nge a ɓə kwu da aza n sapai, ‘Fye taa wu əza m, jesnu zahozahoyi ń wa wu əza, a ɓa da wo owa.’22Ama mi gna fye nge zahozahoyi n wa gyi minagyi n wo əzadoi kwo mapwii, a ɓa da wo owa. Njesnu, zahozahoyi n wa knyi əwodo kwo mapwii akpmi nge, ‘Raka,’ wo ɓa yeayi ń owada bwokwnu. Jesnu zahozahoyi n wa gna, ‘Əho mama!’ Wo ɓə dna ń azhnìgye anápyi nya.23“Ntucenu, ń ha ga nyaga gnyi n bəgədi, ha pa nge əhozado kwo əho mapwi n ɓəhoi dnalo ń hoi,24la əho nyaga fa shi ń bəgədi abye. Kpmisnuyi, lo fyei la aɓo kwnuya najei; ńsayi ha ɓe ha ga əho nyaga.25“Kwnu aɓəya n pyepyei n əho nuwnuyii n wo lo ń hoi n owada bwokwnu. Zhni ce fyei kwnu lo n zokwo, nabai to əho nuwnuyii wa ta ho ya dna ń owadayi akwnu m, jesnu owadayi woi dna ho n bwusiɓyiyida akwnu, ɓa she ho ya dna n zhalu m.26Ɓəhnihni mi gna ho, ho to ɓə gbmiya m, akpəge ho kwu sisinkəɓwo kpmacei zo gba.Anagbái
27“Fye kwu wo nge a ɓə kwu da, ‘Fye taa zhni anagbái m.’28Ama mi gna fye nge, zahozahoyi n wa shi nyikwoza awye n shakpei wo kwu anagbái luzhni n woi ń əwo bwugba.29Ngye əho əwyekwnunu ɓwaizhe nya ɓa zhni ho ha cebwonyi, la kwo gbmiya, haa kwo sheya. Kwo n hoi dulo hoi ɓwu əho nayi əga gbmanyi nuwna, a fa ədo ń a ɓa she əho nayi vnyanya ya dna n anápyi nyi.30Jesnu ngye əho ɓwaizhe ɓa zhni ho ha cebwonyi, znu kwo ya haa kwo sheya. Kwo n hoi dulo hoi ɓwu əga gbmanyi nuwna ń əho nayi, a fa ədo n a ɓə she əho nayi vnyanya ya dna n anápyi nyi.Mwulawu
31“A kwu gna, ‘Əza n wa gbmi əwo nyikwo ya, ɓəshishinu wa ga wo nyakaɓəgbmi mwulawu nya.’32Ama mi gna fye nge, zahozahoyi n wa wu mwula n əwo nyikwoi, akpəge ntu asisiɓozhni ɓo, wo la wo nyikwo dna anagbáizhni, jesnu zahozahoyi n wa la nyikwo n a kwu mwulawu kwo, wo zhni anagbái nu.Anasni
33“Njesnu, fye kwu wo nge a ɓə kwu gna aza n sapai, ‘To bma əho ana ya m, ama la əho anasni shiɓwa n ho kwu sni ga Dagayi nyi.’34Ama mi gna fye, fye to si nyasí m nanyinanyi: kwo n əshemii, ntuge kwo zhni Shekwoyi əbeshnikpegye nu;35kwo ǹ anyìi, ntuge kwo zhni əwo apitakpeba nu; kwo n Urishelimai m, ntuge kwo zhni əzhiyaakwo Əsu Yaakwo nya nu.36Jesnu to sí nyasi n əho tukwoi m, ntuge ho taa myi ha zhni kwo tukwoyi gbmanyi kwaa zè bwuibwuii kwo zhiizhiyii m.37Ənya vnyanya ń ho ɓa da ntna ɓədnai, əkwo nu, ‘Əə’ kwo ‘Aawo’; ənya n kwo ɓaa du dəye, kwo gbmi n əzanukwoyi aba nu.Nyawu ntu əɓotagba ɓo
38“Fye kwu wo nge a kwu gna, ‘Əwye ntu n əwye ɓo, jesnu nyikna ntu n nyikna ɓo.’39Ama mi gna fye, fye to na əzanukwoyi aɓo m. Ń əzaho wa ce ho agnaipmi n ɓwaizhe ɓwa, pmyi agnai dəyi wu wo ce.40Ngye əzaho ncei pmalo wa lo n hoi n owada bwokwnu jesnu wa gwo əho jekpe əmìnya, ha kwu əho əje əbmyi nya ya ga wo ɓədo.41N əzaho wa gyi ho ce nge ho lo n woi myilu gbmanyi, ha lo n woi amyalu ngwnu-aba.42Ga əza ənya n wa ɓa ho, jesnu to pmyiavnu wu əza n wo ye nyamwi n ho m.Yeyewu ga anuwnuyi
43“Fye kwu wo nge a kwu gna, ‘Wu əho kwnuzhiyi yeye, jesnu ha wnu əho nuwnuyi ənu.’44Ama mi gna fye, fye ye n əfye anuwnuyii, jesnu fya zhniaduwa ntu ń aza yi ɓo ń ɓa wu fye awyesnugbegye ɓo nyi.45N fya zhni nlonu, fye ɓa kwu zè əfye Dada əshemi nya aɓyi. Wo zhni əwo nyipyei kwa kpé tu ń aza anukwoi ń aza amanayii, wa je tnu n əgbmai kpe ń aɓəfyeceyi n atnaɓəfyeceyii.46Ngye fye ye aza yi nu n ɓa ye fye nyi, knyi gyibai nu n fye ɓə ɓwa a? Agədu gwoyi ta ɓwa cenu zhni m?47Njesnu n fya ɓwa əfye aza nu gnaɓyi, knyiɓei nu n fye zhni n kwo du azaje a? Kwo ashnagbayi ta zhni nlonu nu m?48Ntucenu fye kwu zè anunui, ngye shi əfye Dada əshemi nya ń zhni nunui nyi.Biblica, Inc.