Matiyu18
Əza duduyi dna n əshebemi
1N əsayii, amwutuyi ɓa ɓe da Yeisu ɓa nyaɓo, “Ngye nlonu, to, nyika nu zhni duduyi ń əshebemi a?”2Wa yì əɓyi nawyi ɓe ncei, waa wo gnyiagnyi dna ń əɓa atasni.3Wa gna: “Ɓəhnihni mi gna fye, akpəge fya shnado fya kwu zè ngye aɓyi anawyi, fye to ɓə lo əshebemi m kpeekpe.4Ntucenu, zahozahoyi ń wa gba əwohni tukwo ngye əɓyi ye, əwo nu zhni duduyi dna n əshebemi.5Njesnu əza dəhodəhoii ń wa gwo əɓyi ye pya dna n əmi əye, wo la mi gwo.Anya n ɓa zhni əza wa cebwonyi
6“N zahozahoyi wa zhni zaknayi ń aɓyi anawyi ye; n ɓa ga gaiciya n mi nyi, waa cebwonyi, kwo ɓəi ɓa wo du aa wyigwokwuta dnagbmai gyidna wo ń bəgye, aa wo sheya dna n shikwo loloyi waa shnidna n kwo.7Owii ń anyì aba, ntu anya ɓo ń ɓa zhni aza ɓai knyiabwonyi nyi! Ɓəshishi nu, anya yi ɓa ɓe, ama owii n əza yii ń wo nu zhni zokwo ń anya yi ɓe ncei nyi!8Ngye əho əɓwa kwo əho pita ɓa zhni ho ha cebwonyi, la kwo znuya, haa kwo sheya. Kwo n hoi dulo hoi lodna n wyewyeyi n əɓwai gbmanyi kwo n pitai gbmanyi, a fa ədo n a ɓa she ho ya dna n əná nyalonyalo nya n aɓwai ngwnu-aba kwo n apitai ngwnu-aba nyi.9Ngye əho əwyekwnunu ɓa zhni ho ha cebwonyi, la kwo gbmiya, haa kwo sheya. Kwo n hoi dulo hoi lodna n wyewyeyi n əwyei gbmanyi, a fa ədo ń a ɓa she ho ya dna n anápyi n awyei ngwnu-aba nyi.Ɓəsisi tu n əknyi abaɓwuyi
10“Fye zhni pəceye to fya ci əɓyi nawyi ho wyegba m. Ntuge mi gna fye nge, əɓa amaləka fyi n əshemi, ɓa gye əmi Dada awyeba ciici.[11“Ntuge Əza Nugwnu ɓə ɓe nabai wa zna ənya ɓwuɓwui nu shni jesnu wa gnyi kwo.]12“Fye zhni kwo nubwo lo ge na a? Ń əza ń wo aknyii lo ngwnu tagyi, gbmanyi n əɓa mi, kwa ɓwuaba, wo to ɓə fa shiiciwagbmanyi ncei ciwagbmanyi kpe n apekwulu, wa lo woi zna gbmanyi yii shni n kwo la ɓwuaba nyi m?13Njesnu n wa gye kwo, ɓəhnihni mi gna fye, a gna wo da lo ntu gbmanyi ɓo n du aknyi shiiciwagbmanyi ncei ciwagbmanyii n ɓa to ɓə ɓwuaba nyi m.14Nlonu ce, əfye Dada ń əshemi to ncei pmalo nge dəho ń aɓyi anawyi ye wa zhnagbma m.
Shi a ɓa zhni n leifyii dna ń Ikilisiya
15“Ngye əho əzado kwo mapwi wa zhni ho leifyi, lo hoi wu wo əwo leifyi, n ɓwasnu əfye ngwnu-aba. Ń wa kna ho tnubwa, ho la wo gbmi n abaɓwi.16Ama ń wo to kna ho tnubwa m, ha la zaknayi kwo ha kwu aza ngwnu-aba ń kwnusnu n hoi, nabai n a ɓaa ‘ɓəhoɓəhoi myishì n aseyedada ɓədai ngwnu-aba kwo ngwnu-ata.’17Ngye ń wo to dudu wa kna əho ɓəda tnubwa m, ha gna ikilisiya; jesnu ń wo to kna ikilisiya tnubwa ce m, fye la wo zè ngye ashnagbayi kwo ngye gədu gwoyi.18“Ɓəhnihni mi gna fye, nyahonyahoi ń a la kwo pa dna ń anyì, a ɓaa kwo pa dna ń əshemi, jesnu nyahonyahoi ń a la kwo loya dna ń anyì, a ɓaa kwo loya dna ń əshemi.19“Njesnu, ɓəhnihni mi gna fye, ngye aza ngwnu-aba fyi ń anyì ɓa dnagbedo ɓa nya nyahonyahoi əɓo, əmi Dada ń wo dna n əshemi nyi, wo ɓa zhni kwo ga ɓa.20Ntuge aba ń aza ngwnu-aba kwo ngwnu-ata ɓa yezhi dna n əmi əye, mi kwnusnu lo n ɓai n abaayi.”Ɓəsisi tnutnuyi atnasnusnugyeyi
21Nlonu Byitusu wa ɓe Yeisu aba wa nyaɓo, “Dagayi, aɓwa ngwnu aknyiyi nu ń mi ɓa zo əmi ədo kwo mapwi abwi n ɓa zhni mi leifyi a? Kwo ɓaa lo aɓwa tnaaba nuu?”22Yeisu wa dnaɓəgbe, “Mi gna fye, toge aɓwa tnaaba m, ama shiitnaaba aɓwa ngwnu-tnaaba.23“Ntucenu, əshebemi ń wu ngye əsu nu n wo ɓə ncei pma wa gwo nyadokwu ń əwo atnutnuyi nyi.24Shi wo ɓə ya nyadokwu gwo, a ɓe wo ń əzai ń wo ɓə n zinali ətai shi wo agwnuma adugwu-awo.25Shikwonyi wo to ɓə myi n wo gba əta yi m, dagayi wa ga əgbe nge əwo, ɓədo n əwo nyikwoi, n əwo aɓyii, ń anyai vnyanya ń wo ɓə ncei, a kwu ɓa kwnu a gba əta yi.26“Ama əwo tnutnuyi yi wa ceakwokwo shi ń əwo abye wa ɓa, ‘La bwugba ɓwa ń mii. Mi ɓa gba əta dəhodəhoi n mi ncei shilo.’27Tnutnuyi yi dagayi, wa wna wo snusnu, waa əta yi fa ga wo, wa fa wo wa lo.28“Ama she tnutnuyi yi ɓə gbmiya lo, wa gye əwo tnutnuyi ədo ń wo ɓə n ətai shi wo, denari tagyi-gbmanyi; wa taɓwashi wo, jesnu wa gyi wo əsha ce. Wa gna, ‘Gba əta ń ho ncei shi mi nyi!’29“Əwo tnutnuyi ədo wa ceakwokwo shi wa ɓa wo, ‘La bwugba ɓwa ń mii. Mi ɓa gba ho əta yi.’30“Ama to wa ye m. Ń əkwoɓwi, wa gbmiya lo wa zhni a əzaayi gwudna ń zhalu nya əsa ń wo ɓə zo əta gba.31She atnutnuyi aje ɓə gye əɓo ń kwo kwu zhni nyi, ɓa gyi minagyi napyei, ɓa lo ɓa gna əɓa dagayi ɓəhoɓəhoi n kwo kwu zhni.32“Nlonu, əwo dagayi wa yì tnutnuyi yi dna n mi. Wa gna wo, ‘Əho, tnutnuyi əkpizhniyi. Mi ɓə la əho əta yi fa ga ho vnyanya n ho ɓə ncei shi mi nyi, ntuge ho ɓə ɓe haa ɓa mi.33Kwo to ɓə kwnuce ha gye əho tnutnuyi ədo snusnu, n ɓwasnu shi mi ɓə gye ho snusnu nyi m?’34“Dna n minagyi, əwo dagayi wa ta wo ya ga azhaluda nabai ɓa tu wo azhnìgye, nya əsa ń wo ɓə gba əta yi vnyanya ń wo ɓə ncei shi nyi.35“Nlai nu ń əmi Dada əshemi nya ɓə zhni zahozahoyi ń fye, akpəge ha zo əho əzado kwo mapwi abwi ń əho ədu.”Biblica, Inc.