Yohana5
Kágna shi n nuwna-znudna aba
1N dəye avnu, Yeisu wa gwnulo Urishelima ntu n Ayahudiyi awyefna ho ɓo.2Nsayii, nuwnaznudna ɓə dna n Urishelima n wó vyivyiwyi ń Akwugya Aduba, n a yi n Aramyiyii nge Betsaida ń kwo shekna n azhigwo ashilagyí ngwnu-atnu.3N abaye, anyasnayi bəgyé ɓə zhni ɓai zhi n ɓo: awyebwayi, azabmazhi, anayi fyifyiyida [ɓai pmi nuwna-znudna yi kwa bwu.4Ntuge Dagayi maləka ɓə zhni woi ɓe n əsa-əsai, wa bwu nuwna-znudna yi. Əza n wa kpmi pita dna n nuwna yi, wa gwo kágna.]5Əza ɓə shi n nyasnai n ɓo, woi kwu aye ɓwa shiita-ceinyimwanyimwa.6She Yeisu ɓə gye wo ń yashi n abaayi, wa kwu kpe nge əsa kwo la wo mwa shi ɓo dna n azhnìgye ye, wa nya wo əɓo, “Ho ncei pmalo ha ɓwa kágna a?”7Əzabmazhi wa dnaɓəgbe, “Haamwasa, mi to n əzai lo n wo ɓa bma mi zhni ma lodna n nuwnaznudna, əsa n nuwna shnashna ncei m. Əsa n mi ye ma lodna, əzaho waa lodna n əmi abye.”8Nlonu Yeisu wa gna wo, “Laka gnyiagnyi! Kwu əho apəce, ha znazna.”9N əsagbmanyii əza yi wa ɓwa kágna; wa kwu əwo pəce wa znazna.Əwyi ń wo ɓə ɓwa kágna nyi, Sibyiwyi nu ɓəi,10ntulonu Ayahudiyi atukwoda ɓa gna əza n a ɓə ka wo gna nyi, “Sibyiwyi nu gnyi; owa to ncei ye lo ha kwu əho pəce m.”11Ama wa dnaɓəgbe, “Əza n wa ka mi gna nyi, əwo nu na gna mi, ‘Kwu əho pəce, ha znazna.’ ”12Ntulonu ɓa nya wo əɓo, “Nyika nu n əza yei n wa gna ho nge ho kwu əho pəce ha znazna nyi a?”13Əza yi n wo ɓə gwo kágna nyi, wo to ɓə kpe əza yi əye m, ntuge Yeisu ɓə la lodna n deeji atasni n kwo ɓə zhi n abaayi nyi.14Əsa fyewyi Yeisu wa gye wo əwye n dna n Dagayipwuwa wa gna wo, “Gyewye, she ho la lafyiya ɓwa nyi, la fa leifyi zhni ɓo, ntolonu m, ɓənukwoi n du dəye kwa ɓwa ho.”15Əza ye wa jezelo wa gna Ayahudiyi atukwoda nge, Yeisu nu ɓə ká wo gna.
Ikwo Nugwnu nya
16Ntuge Yeisu ɓə gnyi woi zhni aɓo ye n Sibyiwyii nu, Ayahudiyi atukwoda ɓa ya wo wyenashe.17Yeisu wa gna ɓa, “Əmi Dada zhni əwo tnutnu lo ciici nya n naiye, əmihni ce, mi zhni tnutnu lo.”18Ntu n ɓəye ɓo, ɓa gna aɓo znaznashni nu nabai ɓa wu wo; ntuge wo to ɓə ɓwa Sibyiwyi owa nu bmaya m, ama woi yi Shekwoyi nge əwohni Dada, woi zè əwohni nsnu dəidəi n Shekwoyii.19Yeisu wa dna ɓa ɓəgbe nlai: “Ɓəhnihni mi gna fye, Nugwnu taa myi wa zhni ɓəhoɓəhoi n əwohni tukwoi m; wo ɓa ɓwa myi wa zhni əɓo nu n wa gye əwo Dada woi zhni, ntuge ɓəhoɓəhoi n Dada zhni, Nugwnu zhni əkwo nu cè.20Ntuge Dada ye Nugwnu lo, woi wu wo ɓəhoɓəhoi n wo zhni. Əə, wo ɓa gwodu wa wu wo atnutnu n ɓa du adəye, nabai ca wo fye.21Ntuge n ɓwasnu shi Dada kwú azafyí kala n əfyi, woi ga ɓa wyewyeyi nyi, nlonu n Nugwnu ga zahozahoyi wyewyeyi n kwa da wo, nge wo ga wo.22Ntuge Dada ta da zaho owa m, ama wo kwu owada vnyanya yafyi n Nugwnu akwnu,23nabai aza vnyanya ɓa ga Nugwnu mwamwa ngye shi ɓa ga Dada mwamwa nyi. Əzadəhodəhoyi n wo to ga Nugwnu mwamwa m, wo too ga Dada mwamwa n wo ɓə tnu n woi nyi m.24“Ɓəhnihni əmi nu gna fye, əza n wa wo əmi ɓədagbma jesnu waa gaiciyaga n wo, ń wo ɓə tnu n mii nyi, wo n wyewyeyi nyalonyalo nyai lo, jesnu a to ɓə da wo owa m, ama wo la gbmi n əfyi lo wyewyeyi.25Ɓəhnihni əmi nu gna fye, əsa ɓe lo jesnu nsaiye kwo la ɓe, əsa n afyífyiyi ɓə wo Shekwoyi Nugwnu bəgye; aza n ɓá wo, ɓa ɓə ɓwa wyewyeyi.26Ntuge shi Dada n wyewyeyii lo dna n əwohni nyi, nlonu, wo la kwo ga Nugwnu cè wa ɓwa wyewyeyi dna n əwohni.27Njesnu wo la ikwo ga wo, wa da owa ntuge əwo nu zhni Əza Nugwnu.28“Dəye to wo fye m, ntuge əsa ɓe lo n aza vnyanya ń ɓa fyilo n əɓa avnyigwo, n ɓa ɓə wo əwo bəgye,29jesnu ɓai kwnuɓe; aza yi n ɓa ɓə kwú əɓo manai zhni, ɓa ɓə kwuka ɓa lofyi n wyewyeyi; aza yi n ɓa ɓə zhni əɓo nukwoi, ɓa ɓə kwuka, ai znu ɓa əknyi.30Əmi n əmihni tukwoi, mi taa myi n ɓəho zhni m; mi ɓwa owa da shi mi wo nu, jesnu əmi owada zhni gaiciya nu, ntuge mi ta zna ɓədá nu shni ga əmihni m, ama əwo n wo ɓə tnu n mii nyi.Ɓəgbmi tu n Yeisu tukwo
31“Ngye əmi nu gbmi əmihni əɓo, əmi ɓəgbmi to zhni gaiciya nu m.32Əzado lo n wo gbmi əmi əɓo; mi kpəlo nge əwo ɓəgbmi, tu n əmi tukwo, kwo zhni gaiciya nu.33“Fye ɓə lá tnutnu tnu lo ncei n Yohana aba, jesnu wo la ɓəgbmi tu n gaiciyanunui tukwo.34Kwo to lo nge mi gwo zanyikwoci ɓəgbmi nu m; ama mi sa əkwo əye nabai fya myi fya pwo nu.35Yohana ɓə zhni pyitila nu, n ənái wna kwoi ga bwuznagna, jesnu fya kwu ye, dna ń əsa fyewyi, fya ɓwa agbmada, əwo bwuznagna nya.36“Mi n ɓəgbmii lo n du Yohana nya ń shnawo. Ntuge atnutnu ń Dada wo kwu ga mi ma zozhni nyi; atnutnu ń mi gnyi mii zhni nyi, ɓa gbmiɓo lo nge Dada nu naa tnu n mii.37Jesnu Dada n wo nu ɓə tnu n mii nyi, əwo n əwohni tukwoi, wo la ɓəgbmi tu n əmi tukwo. Fye too shni əwo bəgye wo kwo fya gye shi wo wu m,38ai gna nge əwo ɓədagbma kwa dna n fye m, ntuge fye ta ga gaiciya lo n əza n wo ɓə tnu n woi nyi m.39Fye pmi Anyakagyigyiyi n wyenyii ntuge fye zhninubwo nge dna n əkwo nu, n fye ɓa ɓwa wyewyeyi nyalonyalo nya. Anyakagyigyiyi ye nu n kwo nyi, n kwo gbmiɓo tu n əmi tukwo,40dudulonu fye la əmi aɓəna, n fye ɓa ɓe əmi aba nabai fya ɓwa wyewyeyi nyi.41“Mi ta gwo latu n kwo kwnu n azanyikwoci aba m,42ama mi kpe fye əye lo. Mi kpəlo nge fye to n Shekwoyi yeyei fyilo n əfye adu m.43Mi la ɓe dna n əmi Dada əye, to fyenyi gwo mi m; ama ń əzado gbowo, n wa ɓe dna n əwohni əye, fye ɓa gwo wo.44Kwo ɓa yezhni n wunanu, fya ga gaiciya fyei gnyi fyei gwo latu n aje aba, ama to fyei zna latu shni n kwo gbmi n Shekwoyi aba ma a?45“Ama fye to zhninubwo nge, mi ɓa kpe fye aɓo nu n Dada abye m. Əfye ɓətuyi nu zhni Mwusa; n fye n awyetui tu n əwo nu nyi.46Ngye fye ɓə la gaiciya ga Mwusa, fye ɓa ga mi gaiciya ce, ntuge wo ɓə kwu nyaka ntu n əmi ɓo.47“Ama shikwonyi fye ta ga gaiciya lo əɓo n wo ɓə ka nyi m, fye ɓa ga gaiciya n wuna n əɓo n mi da nyi a?”Biblica, Inc.