Yohana20
Yeisu nayi to ye dnalo n vnyigwo m
1N labmilabmii, n nyipyei kpmisnui laadi yi nya, to ənyai kwoi zo knaya m, Mariyamwu Magadalayi wa lo vnyigwo, wa gye a la kwuta pmyiya n vnyigwogbe.2Ntulonu wa ɓe woi bwusi lo da Sima Byitusu n mwutuyi dəyii, əza n Yeisu ɓə zhni woi ye wo nyi, wa gna, “Ɓa la Dagayi nayi gbmi n vnyigwo jesnu yi ta kpe aba əye lo n ɓa n woi shi m!”3Ntulonu Byitusu n mwutuyi dəyii ɓa kwuka lo vnyigwo.4Əɓa ngwnu-aba ɓai bwusi, ama mwutuyi dəyii waa du Byitusu ya jesnu waa si vnyigwo n əwo abye.5Wa ya awyeshi wa gye azafyí aje aluweluwei n ajebwei yakpe n abaayi, ama to wa lodna m.6Nlonu Sima Byitusu wa kpma ɓe n avnu wa lodna ceewo n vnyigwo. Wa gye aje aluweluwei ajebwe n yakpe n abaayi,7ɓədo n əjebwei n a ɓə ncei pa n Yeisu tukwo nyi. Əje yi ɓə ye yakpe n əkwo aba, n kpe n əkwo ɓwai, n aluweluwei nyai əkwo ɓwai ce.8N kpmasnu mwutuyi dəyii, n wo ɓə la si vnyigwo n abye nyi, wa lodna ce. Wa kwu gyewye jesnu waa gaiciyaga.9(Ba to ɓə du ɓa ɓwa awyega n Nyakagyigyiyi nge Yeisu ɓə ɓa laka n əfyi m.)10Nlonu amwutuyi ɓa jezelo aba n ɓa ɓə fyi nyi.Yeisu wo kpeya da Mariyamwu Magadalayi
11Nsayi, Mariyamwu ɓə gnyi n əbmyi n vnyigwo aba woi ciɓwi. Shi wo ɓə ciɓwi, wa yami, wa yawyeshi n vnyigwo,12wa gye amaləka ngwnu-aba n aje abwuibwui kpe, n sase kpe n aba n Yeisu nayi ɓə shi nyi, gbmanyi n tukwo ɓwa jesnu baayi n apita ɓwa.13Ɓa nya wo əɓo, “Nyikwoza, knyiyi nu zhni hoi ciɓwi a?”Wa gna, “Ɓa la əmi Dagayi la, jesnu mi ta kpe aba əye lo n ɓa n woi shi m.”14N ɓəda yei, wa pmyiawye nlonu wa gye Yeisu n gnyiagnyi gnyi n abaayi, ama to wa kpəge Yeisu nu gnyi m.15Nlonu Yeisu wa nya wo əɓo, “Nyikwoza, knyiyi nu zhni hoi ciɓwi a? Nyika nu n ho znashni a?” Woi zhninubwo nge əwo nu zhni əkna ofwayi, wa gna, “Haamwasa, ngye ho la wo la nu, wu mi aba n ho n woi shi, ma lo mii la wo.”16Yeisu wa gna wo, “Mariyamwu,” Wa pmyiawye wu n əwo əɓwa, jesnu wa sakwu n Aramyiyii, “Rabboni!” (N əkwo nu gyi “Nyawuyi”).17Yeisu wa gna, “Too to əmi əɓwa m, ntuge mi too gwnulo Dada aba kpa m. N əkwoɓwi, lo da əmi azaje, ho gna ɓa, ‘Mi gwnulo da əmi Dada aba nu, jesnu n əfye Dadai, da əmi Shekwoyi n əfye Shekwoyii.’ ”18Mariyamwu Magadalayi wa lo da amwutuyi n nabagyi manai yei: “Mi la gye Dagayi!” Nlonu wa gna ɓa nge wo kwu aɓo ye gna wo.
Yeisu wo kpeya da amwutuyi
19N wyesheɓwai, n nyipyei kpmisnui laadi yi nya, əsa n amwutuyi ɓə fyi n aba gbmanyi, n əɓa akpakwoi gwu ntu n ədnawo Ayahudiyi atukwoda nya ɓo, Yeisu wa ɓe jesnu wa gnyiagnyi dna n əɓa atasni wa gna, “Bwugbafu kwo kwnusnu n fyei!”20Shi wo ɓə kwu ɓəye da, wa wu ɓa əwo aɓwa n abmayii. Əsa n amwutuyi ɓə gye Dagayi əwye ɓa dagbma n mwa.21Njesnu Yeisu wa gna, “Bwugbafu kwo kwnusnu n fyei! Ngye shi Dada ɓə tnu n mii nyi, mi gnyi nnu mii tnu n fyei.”22N ɓəda yei, wa ya əsnu kpe ɓa jesnu wa gna, “Fye gwo Zafnu Gyigyiyi.23N fya zo zahozahoyi əwo aleifyi, a kwu əɓa aleifyi zo; n fye to zo əɓa aleifyi m, əɓa aleifyi too zo m.”Yeisu wo kpeya da Toma
24Nsayi Toma (n a je wo yi nge Didimwus nyi), zaknayi n awoceaba, wo to ɓə kwnusnu n amwutuyii əsa n Yeisu ɓə ɓe nyi m.25Ntulonu amwutuyi aje ɓa gna wo, “Yi kwu gye Dagayi əwye!” Ama wa gna ɓa, “Akpəge ma gye akwusa acigwusa əwye n əwo aɓwa, jesnu ma dna əmi ɓwanyi aba n akwusa ɓə fyi nyi, jesnu ma dna əmi əɓwa n əwo abmayi əciɓwi, mi taa ga gaiciya m.”26Ń laadi gbmanyi avnu, əwo amwutuyi ɓə je fyi n pwuwa jesnu Toma ɓə kwnusnu n ɓai. Kwo shikwonyi akpakwo ɓə gwugwuyi, Yeisu wa ɓe wa gnyiagnyi dna n əɓa atasni jesnu wa gna ɓa, “Bwugbafu kwo kwnusnu n fyei!”27Nlonu wa gna Toma, “Dna əho ɓwanyi n ya; gye əmi aɓwa əwye. Ta əho əɓwa ya, ha dna kwo n əmi abmayi. La fa abwugba-aba fyi ɓo jesnu ha ga gaiciya.”28Toma wa gna wo, “Əmi Dagayi jesnu əmi Shekwoyii!”29Nlonu Yeisu wa gna wo, “Ntuge ho la gye mi əwye nu, ho nyi ga gaiciya; anabəlikada nu n aza yii n ɓa too gye mi əwye m, dudulonu ɓa kwu gaiciyaga.”Ɓətukwo Yohana nabagyi manai nya
30Yeisu wa wu aznù bəgyé n əwo amwutuyi awye, n ɓa to kafyilo n pafyi ye m.31Ama aɓo ye n kafyi nabai fya ga gaiciya nge Yeisu nu zhni Kirisiti, Shekwoyi Nugwnu, jesnu nge n gaiciyagai nu dna n əwo əye n fye ɓa ɓwa wyewyeyi.Biblica, Inc.