Aibraniyi7
Myelkizedek Shekwoyi Pirisiti
1Myelkizedek ye nu ɓə zhni əsu Salem nya, jesnu pirisiti Shekwoyi Ikwoda Duduyi Vnyanya nya. Wo ɓə shegwnu Ibrahim woi zhi okwusnu nu, woi kwu nasalagyi tu ń asu aje, wa tu wo anabəlika.2Njesnu Ibrahim wa ga wo zaka (okwu gbmanyi n akwu ngwnu-awo) n nyahonyahoi nya. Kpmisnui əye Myelkizedek awyega nyi, “Əsu ɓəfyecezhni nya” jesnu, “Əsu Salem nya.” N kwo nu gyi, “Əsu bwugbafu nya.”3Ntna əda ntna əya, ntna azakwoi ofye, to ai kpe nyipyei ye n a ɓə ma wo m, kwo əwo wyewyeyi azoba m, wo gbedolo n Shekwoyi Nugwnui nu, wo zhni pirisiti nu nyalonyalo.4Zhni əɓə nubwo shi Myelkizedek ye ɓə zhni əza yaakwo nsnu. Kwo dada-zakwoi Ibrahim, wo ɓə la okwu gbmanyi n akwu ngwnu-awo ga wo ń okwnugyi nyaɓwa!5Nsaiye, owa da ge Levyi ayawyi n ɓa ɓə kwu zhni apirisiti nyi; nge ɓa gwo okwu gbmanyi n okwu ngwnu-awo n aza aba. Ɓa gwo əkwo n əɓa Aisrailayi aje nu; kwo shikwonyi əɓa azaje zhni Ibrahim ayawyi nu cè.6Əza ye, Myelkizedek, to ɓə zhni Levyi ofye nu m, ama wo ɓə la okwu gbmanyi n okwu ngwnu-awo gwo n Ibrahim, jesnu waa wo tu anabəlika, əza n wo ɓə n aɓəgbeshii nyi.7Njesnu ntna bwugba-aba, əzayaakwo nu tu əzagbagbayi anabəlika.8Dna n ɓəho, a zhni a knyi okwu gbmanyi dna n okwu ngwnu-awo a ga apirisiti nu; aza ń əɓahni ce fyí nyi; ama n əɓədo ho gbowo, ngye Myelkizedek ɓəda nya ye, a ga əza nu n a kpəlo ge wo ye gnyilo n wyewyeyi.9Əza ɓa myi wa da nge Levyi, n wo gwo okwu gbmanyi n okwu ngwnu-awo nyi, nge wo ɓə kwu okwu gbmanyi gba ce n Ibrahim aɓwai,10ntuge she Myelkizedek ɓə shegwnu Ibrahim, Levyi ɓə ye dna n əwo zakwoyi nayi nu.Yeisu gnyi ngye Myelkizedek nu
11Ngye a ɓə gna ge a ɓa ɓwa ɓəzhni nunui n Levyi pirisiti atnutnu ofye nu; jesnu ge ɓəhnihnii nu ge, owa n a ɓə ga aza nyi, nge, pirisiti ofye yi nu ɓə ɓa myi kwo gnyi; to, knyiɓei nu ɓə zhni ai ye zna pirisiti ədo shni wa ɓe; əza n wo gbmi n Myelkizedek ofye, toge Haruna əfye m ma?12Ntuge she a shna pirisiti ədo, ɓəshishi nu, a shna owa ədo cè.13Əza n a da aɓo ye ntu n əwo əɓo nyi, wo gbmi n əbyedo nu, toge əbye n kwo shni tnutnuzhni n bəgədi m.14Kwo wulo nlonu pəipəi nge əyi Dagayi ɓə gbmi n Yahuda əbye nu, jesnu tu n əbyeyi tukwo, Mwusa to ɓə da ɓəho ntu n apirisiti ɓo m.15Njesnu ənya n yi kwu da nyi, kwo gna wulo n awyeknayai ndei n pirisiti ədo ɓa kpeya ɓe ngye Myelkizedek,16əza n wo la zhni pirisiti, toge n əwo azakwoyi ɓəvyi kwnunui m, ama ntu n kalá əwo wyewyeyi nya ɓo, n a taa myi n əkwo agbmazhni nyi m.17Ntuge a ncei da lo:“Ho zhni pirisiti nu nyalonyalo,n kwo vyi Myelkizedek əfye.”18Ɓəvyi kwnunu kwokwoi, a ɓə la kwo pmyima n gnagna ntuge ɓa ɓə gbakalá jesnu n tna-apma,19(ntuge owa to ɓə zhni ɓəho n nunui m) jesnu a la awyetu gnabmyai əɓo ceci, ń əkwoi nu n yi ɓa wó vyivyiwyi n Shekwoyii.20Njesnu kwo to ɓə nyi ntna nyasi nu m! Azaje ɓə kwu zhni apirisiti ntna nyasi dəhodəhoi,21ama wo ɓə zhni pirisiti n nyasii nu əsa n Shekwoyi ɓə gna wo:“Dagayi wo la nyasi sijesnu wo ta shna əwo bwugba do m:‘Ho zhni pirisiti nu nyalonyalo.’ ”22Ntu nyasi ye ɓo, Yeisu wo la zhni ɓwagwoyi ɓəgbeshi gnabmyai nya.23Nsaiye a kwu apirisiti zhni n mwa bəgyé, shi əfyi to ɓə ye ge ɓa gyiabye fyi n əɓa atnutnu nyi m,24ama ntuge Yeisu n wyewyeyi lo nyalonyalo, wo n pirisiti-tnutnu nyalonyalo nyai shilo.25Ntucenu wo ɓa myi wa gnyi aza yi n nunui, n ɓa ɓe Shekwoyi aba dna n əwo nyi, ntuge wo gnyilo ciici, wa gbimì ga ɓa.26Ɓəhnihni Pirisiti dnagbmai ye pya, wo ga yi anya n yi n əɓa apmai lo: əza n wo gyigyiyi, n tnaɓətui, n tnadodnai, n a n woi knyignyi n taya n aleifyizhniyii, n latui n kwo du ashebmana nya.27Toge ngye apirisiti adnagbmai aje m; wo to n apmai lo wa kwnu anyakwnukwnu fyegyifyegyi m, kpmisnui ntu əwohni aleifyi ɓo, nlonu ntu n aza aleifyi ɓo. Wo ɓə la ənyagbmi ntu əɓa aleifyi ɓo, əsa wo ɓə ga əwohni tukwo əɓwa znugbmanyi ntu əɓa vnyanya ɓo.28Ntuge owa tnu apirisiti adnagbmai n aza nu fyi n əɓa akalágba; ama nyasi n kwa kpma ɓe n owa avnu nyi, kwo ɓə la Nugwnu knyi, əza n a la wo zhni n nunui nyalonyalo.Biblica, Inc.