Aibraniyi10
Kirisiti n zhni nyagbmi znugbmanyi ntu aza vnyanya ɓo
1Owa ɓwa jejelukwo nu zhni anya amanai nya n ɓa ɓe lo nyi; əɓa nu to zhni aɓo hnihnii m. Ntu dəye ɓo, kwo taa yezhni, nge anyakwnukwnu gbmanyigbmanyi yezeyeze tnazoi, n kwo ɓa zhni aza yi n ɓa ɓe mwamwaga nyi, ɓa kwu zhni anunui m nanyinanyi.2Ntolonu m, ɓa to ɓə ɓa kwu fa anyakwnukwnu ga ɓo m? Ntuge amwamwagayi ɓə ɓa kwu zè agyigyiyi n əɓwa znugbmanyi kpeekpe, jesnu ɓa to ɓə ɓa shna əɓa aleifyi ɓəgyi wo m.3Ama anyakwnukwnu yi zhni aleifyi ɓəpá nya nu yezeyeze.4Kwo taa yezhni, anakwonugba ami n abwui nyai ɓa kwu aleifyi ya m.5Ntucenu, shi Kirisiti ɓə ɓe dna n anyì, wa gna:“Nyagbmi ɓədo n nyagai ɓa ta wo ho əpwa lo m,ama nayi n ho la zhni ga mi nyi;6anyaga anakpei n aleifyi anyagaiəɓa aɓo to ɓə da ho m.7Nlonu ma gna, ‘Gye mi gnyi nyi; a ncei kafyilo n əpakpmikpmii ntu n əmi ɓo;Əmi Shekwoyi, mi la ɓe ma zhni əho ɓəye.’ ”8Kpmisnuyi wa gna, “Anyakwnu n anyagai, anyaga nakpei ɓədo n aleifyi anyagai, əɓa əpwa ta wo ho lo m, kwo ge ho ɓə kwu əɓa agbmada wo m,” kwo shikwonyi a ɓə kwu ɓa ga shi owa ncei tu.9Nsayi wa gna, “Gye mi gnyi nyi, mi la ɓe ma zhni əho ɓəye.” Waa ɓəgbeshi kpmisnui pmyishi nabai wa shi baayi.10Njesnu n tukwoi tu n ɓəye yi ɓo, a kwu yi zhni agyigyiyi ntu Yeisu Kirisiti nayi nyagbmi ɓo znugbmanyi ntu n aza vnyanya ɓo.11Fyegyifyegyi pirisiti dəhodəhoi gnyiagnyi gnyi woi zhni akwnunukwnu tnutnu; woi ga anyakwnukwnu gbmanyigbmanyi; woi bmakpe-bmakpe, n ɓa taa myi ɓa kwu aleifyi ya m nanyinanyi.12Ama shi pirisiti ye ɓə la aleifyi nyagbmi ga znugbmanyi ntu n əsa vnyanya ɓo, waa sasetu n Shekwoyi ɓwaizhe ɓwa.13Njesnu ənya n kwo ɓə ya nsayi, wo gnyilo woi pmi a kwu əwo anuwnuyi zè əwo apitakpeba.14Ntuge n nyagbmii gbmanyi, wo kwu aza yi zè anunui nyalonyalo nya, ń a zè ɓa agyigyiyi nyi.15Zafnu Gyigyiyi ce wo la ɓəgbmi ga yi ntu dəye ɓo. Kpmisnui wo gna:16Dagayi da lo, “Dəye nu zhni ɓəgbeshi n mi ɓə shi n ɓain dəye avnu.Mi ɓə fyi əmi awa n əɓa adu,jesnu mii kwu ɓa kafyi n əɓa abwugba.”17Nsayi wa ɓe əɓo:“Əɓa aleifyi tna-owaɓwashi atnutnuMi to ɓə shna əɓa əɓo pá m kpeekpe.”18Njesnu aba n a kwu aleifyi ye zo, leifyi nyagbmi to shnasnu lo n apmai m.Yiyi ntu əmìfyi ɓo dna n gaiciyaganunui
19Ntucenu, əmi azaje azanugbai n anyikwozai, shikwonyi yi n bwugbakalai lo, ya lofyi n Aba Gyigyiyi Duduyi ntu Yeisu ami ɓo nyi,20n zokwo woiwoyi n wyewyeyi nyai n a la gwuya ga yi dna n əjesasai zokwo ń əkwo nu zhni əwo nayi nyi,21jesnu shikwonyi, yi n pirisiti yaakwoi lo dna n Shekwoyi pwuwa nyi,22fa ya yegwu Shekwoyi n ədu hnihnii nyai, jesnu n əɓo awyekwnui n nunui fyii n gaiciyaganunui ɓe ncei nyi; ai kwu əyi adu myi ami, ɓa zhna yi ya n ɓəgyi tukwovnyi nya, jesnu a la əyi anayi zhnaya n nuwna gyigyiyii.23Fa ya kwu awyetu ye shiɓwa ntna bwugba-aba fyii, n yi da əɓa aɓo nyi, ntuge əza n wo ɓə ga yi ɓəgbeshi ye nyi, wo zhni gaiciyazhninunui nu.24Njesnu fye fa ya zhni ɓənubwo, shi yi ɓa ceaje aɓwa fyi n yeye ɓədo n aɓo manaizhnii.25Fye to fa yezhi ɓo n abagbmanyi m, ngye shi azaho ɓa lá kwo shiɓwa ɓai zhni nyi m, ama n agwumyizhii ga aje; n gnasnusnu nsaiye, shi fye gye Nyipyei yi kwoi yawye wu ɓe nyi.26N ya gyiabye n aleifyizhniyi yii gwo kpe ge yi la gaiciyanunui yekpé gwo, nyagbmi ho to ye lo ntu n aleifyi zo ɓo m,27ama ənya n a ɓa tuwye, əkwo nu zhni ədnawo owada nya ɓədo n minagyi əná-gwogwoi nyai, n kwo ɓə gyi Shekwoyi anuwnuyi nyi.28Zahozahoyi n wo ɓə la Mwusa owa aɓəna, wo ɓə la fyí ntna snusnugye tu n aseyedada n aɓəkwnuyi agbe ngwnu-aba kwo ngwnu-ata ɓəgbmi.29Ho zhninubwo lo ge əza tata ɓə zhiná nsnu wunanu, n wo la Shekwoyi Nugwnu dnaya n apitai, n wo kwu ami ɓəgbeshi nya zhniagbma ngye ənya tnagyii, n əkwo nu ɓə pmya ɓa nyi, jesnu wo kwu Zafnu shebmyashi nya knyiakpmi a?30Ntuge yi kpe wo əye lo n wo ɓə gna, “Tagba zhni əmi nya nu; mi ɓə gbaɓota,” njesnu, “Dagayi ɓə da əwo aza owa.”31Kwo zhni əɓo ədnawo nya nu, əza wa kaya dna n Shekwoyi wyewyeyida akwnu.32Fye pa anyipyei asapai nya ɓo, n əfye bwuznagna gwogwo avnu, she fye ɓə kwu fyimì fyi n bwugba gwnukpaje yaakwo nya, n nunui n azhnìgyei.33N asahoi a ɓə zhni aa fye kwnuzhi n əbmyi, ai da fye aɓəda nukwoi, ai wu fye awyesnugbegye ɓo; n asahoi, fya kwu kwnuzhni n aza yii n a zhni ɓa lonu nyi.34Fye ɓə kwu azhnìgye n kwnusnu n azhaludai jesnu fya zhni bwugbabwui n azai n ɓa gwo əfye anyaɓwa, ntuge fye ɓə kpe nge əfye, n əfyehni, fye ɓə n anyaɓwa gnabmyai, n ɓa to zo nyi m.35Ntulonu fye to kwu əfye bwugbamyignyi ya m; ntuge a ɓə gwo kwo gyiba yaakwo.36Kwo gwo fya kwu əmìfyi, nabai shi fye ɓə kwu Shekwoyi ɓəye zozhni, fye ɓə gwo ənya n wo ɓə la əkwo ɓəgbeshi shi nyi.37Ntuge,“N ɓwasnu n əsai fyewyi,əza n wo ɓe lo nyi, wo ɓa ɓejesnu wo taa gyisa m.”38Njesnu,“Ama əmi ɓəfyecezhniyi ɓa gyianyì n gaiciyaganunui nu.Njesnu mi taa wo agbmadan əza yi n wo jeze n avnui m.”39Ama yi to fyilo n aza yi nu n ɓa jeze n avnui nyi, ai zhni ɓa agbma m, ama yi fyi n aza yi nu n ɓa n gaiciyaganunui lo njesnu ɓa kwu pwo.Biblica, Inc.