Akwolosiyi3
Anyìgyi n wyewyeyi gyigyii dna n Kirisiti
1Nsaiye, shikwonyi, a la fye kwnu kalakwu n Kirisitii nyi, fye kwu əfye adu zhi ntu anya ɓo nu n ɓa lo n əshe, aba n Kirisiti dna nyi, n sasetu n Shekwoyi ɓwaizheɓwa.2Fye kwu əfye abwugba zhi ntu ń anya ɓo nu ń ɓa lo əshe, toge n zhi ń anya anyì nya ɓo m.3Ntuge fye ɓə kwu fyí, jesnu nsaiye, əfye wyewyeyi sodna lo n kwnusnu n Kirisitii nu dna n Shekwoyi.4Əsa n Kirisiti, n wo nu zhni əfye wyewyeyi nyi, ɓə kpeyaɓe, əfyehni ce, fye ɓə kwnú kpeyaɓe n woi dna n latu.5Ntucenu, fye la nyahonyahoi wu n kwo zhni əfye nyinyì anyì nya: asisiɓozhni, nyadodna, shakpe, aɓəpwawo nukwoi ɓədo ǹ fnanai, n kwo nu zhni shnagba nyi.6Ntu n aɓo ye ɓo nu ń Shekwoyi minagyi napyei ɓəlo.7Fye ɓə zhni fyei gyianyì nlai nu, fyi n əfye anyìgyi sapa nya.8Ama nsaiye, kwo zhni ɓəshishi nu fya kwu aɓo ye pya yaɓwa vnyanya n ɓa kpe nyi: minagyi, napyé, ɓəshinmì n əzai, əyewnuya n aɓəda kasai n ɓa kwnu n əfye agbe.9Fye to ceakata fyi aje m, shikwonyi fye la əza kwokwoi kpmaya ɓədo n əkwo atnutnui.10Jesnu fye kwu əzawoiwoyi kpe, n a gnyi ai shna kwo ədo n ɓəyekpe dna n əkwo Zhniyi dogbe nyi.11Ń ya, a ta wu Abyedo kakai lo n Yahudiyi m, əza nyaznui kwo əza tnanyaznuyi, zhabwida, Sitiyayi, fyenu kwo əza loloiya m, ama Kirisiti nu zhni nyahonyahoi jesnu əwo dna n əɓa əmi vnyanya.12Ntucenu, ntuge fye zhni Shekwoyi aza aknyiknyiyi nu, agyigyiyi njesnu ayeyeyi dəidəi, fye kwu fyehni pwi n snusnugyei, n ɓəmanaizhnii, n tukwogbai, n aɓəzhnii pəceye ɓədo n bwugbaɓwai.13Fye ɓwa əmì n ajei njesnu ngye əzaho ń fye n minagyii lo n əwo zadoi, fya zo aje abwi. Fye zo abwi ngye shi Dagayi ɓə kwu abwizo fye nyi.14Jesnu kpe n alu amanai ye vnyanya, fye kwu yeye kpe, n əkwo nu ye ɓa ɓədo ń abagbmanyi dna n ɓwadodna nunui.15Fye fa Kirisiti bwugbafu kwa gyibe fyi n əfye adu, shikwonyi fye zhni aga nayi gbmanyi nya nu, a ɓə yi fye fyi n bwugbafu nu. Jesnu fye kwu zhni Shekwoyi amisayi.16Fye fa Kirisiti ɓədatnu kwaa sase dna n fye mi n mwa, əsa n fye ɓe aje n nyawui, fyei gnaknyi aje n wyemwai vnyanya dna n anyiásásayii, anyíciciyii jesnu n anyii n ɓa kwnu n Zafnu, fyei kwoanyi ga Shekwoyi ń amisai fyi n əfye adu.17Jesnu ɓəhoɓəhoi n fye ɓa zhni, kwo dna n ɓədagbma nu, kwo n ɓəzhni, fye zhni kwo vnyanya dna n Dagayi Yeisu əye, fyei sa Shekwoyi Dada ami dna n wo.Agbega ntu Kirisitiavyiyi apwuwa ɓo
18Anyikwo anusei, fye kwu əfyehni ga əfye aɓá, ntuge kwo wulo cewo dna n Dagayi.19Aɓá, fye ye n əfye anyikwoi jesnu to fya pyena n ɓai m.20Aɓyi, fye vyi əfye azamayi ɓəda fyi n ɓəhoɓəhoi, ntuge dəye kwo da Dagayi agbma.21Adada, fye to wnu əfye aɓyi bwugba m, sakwnu bwugba kwa bma ɓa.22Afyenu, fye kwu əfye adagayi anyì nya ɓəda shiɓwa dna n ɓəhoɓəhoi; jesnu fya zhni kwo, toge n ɓwasnu n əsa n ɓa gye fye əwye lo m, ntuge fya ɓwa əɓa bmyashi m, ama n ɓəhnihni nya dna n ədu ɓədo n mwamwagai ga Dagayi.23Nyahonyahoi n fye ɓa zhni, fye zhni kwo n əfye ədui vnyanya, ngye fye zhni ga Dagayi nu, toge Dagayi zanyikwoci nya m.24Shikwonyi fye kpəlo nge fye ɓə gwo əgwú n Dagayi akwnu nu ngye gyiba. Fye zhni Dagayi Kirisiti nu tnutnu.25Əza n wa zhni ɓənukwoi, wo ɓə gwo ɓənukwoizhni gyiba, jesnu a to n azai knyiknyi lo n a ɓə wu ɓa bmyashi m.Biblica, Inc.