Atnutnu2
Zafnu Gyigyiyi ɓeɓe dna n pyentikwos əwyi
1She pyentikwos əwyi ɓə si, əɓa vnyanya ɓa ɓe yefyi n aba gbmanyi n kwnusnu.2N əsagbmanyii, kəsnu ngye ase yaakwo kwa gbmiɓe n əshemi jesnu kwaa nu nyakwnu vnyanya aba n ɓa ɓə sase fyi nyi.3Ɓa gye ənya n kwo ɓə wu ngye əná-anyitala, ɓa gnajeya jesnu ɓa ɓe ɓa yakpe n zahozahoyi n ɓa.4Əɓa vnyanya ɓa kwu nu n Zafnu Gyigyiyii jesnu ɓa ya ɓai daɓo n anyitala ajei ngye shi Zafnu ɓə ga ɓa kalá.5Nsayii Ayahudiyi Shekwodnawoyi ɓə fyi n Urishelima ɓai kwnu n əknyi dəhodəhoi n anyì.6Shi ɓa ɓə wo kəsnu ye, deeji kwa yezhi n ɓəwowoi, ntuge zahozahoyi ɓə kwu wo ai da əwo əbye.7N zhi n ɓəwowo yaakwoi, ɓa nyaɓo: “Aza ye vnyanya to zhni Agəliliyi nu m?8To, kwa ze n wunanu zahozahoyi n yi, woi wo əɓa ɓəda dna n əwo əbye mama nya a?9Apatiyi, Amyedeyi n Aəlamyitiyi; aza n ɓa fyi n Myesopwotamyinya, Yahuda n Kapadosiyai, Pwontus n Asiyai,10Fyirgiya n Pamfyiliyai, Masar n Libyiya səpa hoi n kwo wo vyivyiwyi n Sirenii nyi; azhiɓeyi n ɓa kwnu n Roma11(Ayahudiyi n kwnusnu n azai n ɓa kwu vyi Ayahudiyi kwnunu); Akəretiyi n Arabyiyii; ya wo ɓai da Shekwoyi aɓəwowoi n əyi anyitalai!”12N zhi n ɓəwowoi jesnu n vnyivnyii, ɓa nya aje əɓo, “Dəye wu knyiɓei nu a?”13Ama azahoo da, ɓa kpe ɓa agyè nu ɓa gna, “Əje nu n ɓai kwnúgbe zhi.”Byitusu awyeknaya ga deeji
14Nlonu Byitusu wa laka gnyi n kwnusnu n awocei-gbmanyi yi, wa la bəgye tu jesnu wa ga deeji awyeknaya: “Əmi Ayahudiyi aje, n əfyei vnyanya n fye fyilo n Urishelima nyi, fye fa ma ga fye ɓəye awyega; fye kna əɓo tnubwa pəceye n mi da nyi.15Aza ye to n əjei nu sni zhi, ngye shi fye zhninubwo nyi m. Snukna ciwagbmanyi laabmi nya nu ye ɓwagnyi!16Aawo, əɓo nu nyi n sheɓəgwognayi Jowel ɓə da:17“ ‘Fyi n anyipyei kpmaknai, Shekwoyi da lo,Mi ɓə zè əmi Zafnu kpe n aza vnyanya.Əfye anugwnu n anyigwnui ɓa ɓə da sheɓəgwogna,əfye aɓyikasa ɓə fyi n ɓəwyegye dna n Zafnu,əfye azakwoi ɓə nu ana.18Kwo kpe n əmi atnutnuyi,azanugbai n anyikwozai,Mi ɓə la əmi Zafnu zekpe ɓa fyi n anyipyei yi,jesnu ɓa ɓə da sheɓəgwogna.19Mi ɓə wu aɓo awowoi kpe n ashebmana əsniijesnu n aznùi kpe n əknyi snuta,ami n ənái ɓədo n awú akwoloi.20Nyipyei ɓə la pmyibma kwaa zè wyegbmajesnu əpya ɓə la pmyibma kwaa zè aminabai əwyi yaakwo n latu Dagayi nyai kwoi kpe ɓe.21Njesnu zahozahoyi n wo yiDagayi əye, wo ɓə la pwo.’22“Əmi Aisrailayi aje, fye kna ɓəye tnubwa: Yeisu Nazeretiyi ɓə zhni əza nu n Shekwoyi ɓə knyí ga fye n aɓo wowoi, aɓo awowoi n aznùi ado n Shekwoyi ɓə wu dna n əfye atasni dna n wo, ngye shi fye kpəlo n əfyehni nyi.23Ama Shekwoyi n əwo ɓəmwushi tnadoshnai, n wo ɓə pma əkwo əɓo yekpé n sapa; wo ɓə la Yeisu taya ga fye jesnu n bmazhni akpizhniyi nyai, fyaa wo wu, fya knyi wo akwusa tu n znudu.24Ama Shekwoyi waa wo laka n əfyi, waa wo loya n azhnìgye əfyi nya, ntuge kwo to ɓə ɓa yezhni əfyi kwaa wo shiɓwa dna m.25Dawuda ɓə kwu əɓo da tu n əwo ɓo:“ ‘Mi ɓə kwu gye Dagayi əwye gnyi n əmi abye ciici.Ntuge wo gnyilo n əmi ɓwaizheɓwa,mi taa shnashna m.26Ntucenu əmi ədu n agbmadai lo jesnu əmi nyitala kwoi dagbma;əmi nayi ce, kwo ɓə la snu dna n awyetu,27ntuge ho to ɓə lá mi zamwi dna n akwu m,ho to ɓə ye əho əza gyigyiyi nge wo bwo m.28Ho kwu awogye anyìgyi nya wu mi;ho ɓə nu mi n agbmadai gnyi n əho abye.’29“Əmi Aisrailayi aje, mi da fye əɓo n agwumyii, nge dada-zakwoi Dawuda ɓə la fyí, aa wo byi, jesnu əwo vnyigwo shilo n ya, nya n naiye.30Ama wo ɓə zhni sheɓəgwognayi nu jesnu wa kwu kpe nge Shekwoyi ɓə la ɓəgbeshi shi wo n nyasíi ge, wo ɓə la əwo əɓyi ho tu n əwo əbeshnikpegye.31Wo ɓə kwu əɓo gyewye n kwo ɓə ye kwa ɓe, wa da Kirisiti kala la ɓo, nge a to ɓə fa wo dna n akwu m, kwo əwo nayi kwoi bwo m.32Shekwoyi wo la Yeisu ye laka gnyi n wyewyeyi, jesnu əyi vnyanya yi zhni əkwo aɓəgbmiyi nu.33A la wo latu gnyi n Shekwoyi ɓwaizheɓwa, wo la ɓəgbeshi Zafnu Gyigyiyi nya gwo n Dada aba, jesnu wo la anabəlika zekpe, n fye gyewye nsaiye jesnu fyei wo nyi.34Ntuge Dawuda to ɓə gwnulo əshemi m, dudulonu wa gna,“ ‘Dagayi ɓə kwu gna əmi Dagayi:“La sasetu n əmi ɓwaizheɓwa35nya əsa ń mi ɓə zhni əho anuwnuyi ɓa kwu zè əho apitakpeba.” ’36“Ntucenu fa Israila vnyanya kwa kwu ɓəye kpeye nge ɓəhnihnii nu: Yeisu ye, n fye ɓə la wo znudu nyi, Shekwoyi la wo zè Dagayi n Masifui.”37Shi aza ɓə wo ɓəye, kwaa əɓa adu saya, ɓa gna Byitusu n atnutnuloyi ajei, “Əyi azaje, knyiyi nu n yi ɓa zhni a?”38Byitusu wa dnaɓəgbe, “Fye yeabwi jesnu a zhni fye batizima, zahozahoyi n fye, dna n Yeisu Kirisiti əye ntu əfye aleifyi zo əɓo. Nlonu fye ɓa gwo Zafnu Gyigyiyi nyaga.39Ntuge ɓəgbeshi ye zhni əfye nya nu, n əfye aɓyii, jesnu ntu n aza vnyanya ɓo, n ɓa lo n kpaai, jesnu ntu n aza vnyanya ɓo n Dagayi əyi Shekwoyi ɓə yi.”40N aɓədagbma bəgyé ajei, wa kwnù ɓa; jesnu wa tna ɓa əɓwa, “Fye gnyi əfyehni n cala wnuwnuiya ye.”41Aza yi n ɓa ɓə gwo əwo ɓəda, a zhni ɓa batizima, jesnu aza ngye adugwu-ata ɓa kwu sheɓe ɓa n bəgyé n əwyii.Avyiyi jedoɓəzhni
42Ɓa kwu əɓahni ga fyi n atnutnuloyi nyawu n jedoɓəzhnii, ga nyagyi gyi n aduwazhnii.43Zahozahoyi waa nu n ɓəwowoi ntu n aɓo awowoi bəgyé nyai, n aznùi n atnutnuloyi ɓə zhni.44Avyiyi vnyanya ɓa ɓə kwnusnu n ajei jesnu ɓai zhni ɓəhoɓəhoi n ɓwaidnado.45Ɓa kwnu aknyi n anyaɓwai, nabai ɓa ga əzahozahoyi n wo ɓə dna n snagyi.46Wyihowyihoi ɓa gwodu ɓai yezhi n abagbmanyi fyi n Dagayipwuwa ashilagyí. Ɓai gyi nyagyi fyi n əɓa apwuwa jesnu ɓai kwnu nyagyi gyi n ajei fyi ń abwugbada jesnu n adu agaiciya nyai,47ɓai ci Shekwoyi jesnu ɓai wo agbmada aza vnyanya bmyashi nya. Njesnu Dagayi woi ɓe ɓa bəgyé fyegyifyegyi, aza yi n ɓa ɓə gnyi ɓai ɓwa gnyignyi nyi.Biblica, Inc.