Atnutnu16
Timoti ɓwadodna n Bwulusii n Silai
1Bwulus wa ɓe Dabye, wa gbmi wa lo Listira, aba n mwutuyi ɓə dna ai yi wo nge Timoti. Əwo əya ɓə zhni Yahudiyi nu jesnu gaiciyagayi, ama əwo dada ɓə zhni Girik nu.2Agaiciyagayi n ɓa ɓə fyi n Listira n Ikwoninyai, ɓa ɓə kwu əɓo manai da tu n əwo tukwo.3Bwulus ɓə ncei pma wa lo əzna n woi, ntulonu waa wo znunya ntu Ayahudiyi ɓo n ɓa ɓə fyi n səpai nyi, ntuge əɓa vnyanya ɓə kpe nge əwo dada ɓə zhni Girik nu.4Shi ɓa ɓə zna ɓai kwnu n əzhi gbmanyi ɓai lo əzhido, ɓa gna ɓəpitala n kwo ɓə gbmi n atnutnuloyi aba n abyedai; ədo n ɓa ɓə la n Urishelima ntuge aza ɓa shiɓwa nyi.5Ntulonu aikilisiya ɓa kwu myizhi dna n gaiciyaganunui jesnu ɓa mwaɓe fyegyifyegyi n bəgyé.Bwulus ɓəwyegye Makidoninyayi nya
6Bwulus n əwo anugwnudoi, ɓa znazna fyi n Fyirgiya əknyisəpa vnyanya n Galatiyai, ntuge Zafnu Gyigyiyi ɓə la wo kpma ɓədagbma waazizhni n Asiya əknyi.7She ɓa ɓə ɓe Masiya əknyi əgna, ɓa zhni shi ɓa ɓá myi ɓa lofyi n Byitinya, ama to Yeisu Zafnu wa ye ɓa nge ɓa lofyi m.8Ntulonu ɓa du Masiya ya ɓa shnilo Trowas.9Dna n sukwo yi, Bwulus wa gye ɓəwyegye Makidoninyayi wo gnyi woi ɓa wo, “Fye piya ɓe Makidoninya fya bma yi zhni.”10Shi Bwulus ɓə kwu ɓəwyegye ye gyewye, ya ye əyihni wolowolo n əsagbmanyii ya kwuka ya lo Makidoninya, ya gwo kwo nge Shekwoyi wo la yi yi nu, nge yi zhni waazi ga ɓa.Lidiya abwuye dna n Fyilibyi
11Ya kwuka n Trowas ya kwnufyi n shikwo, ya lo əya nuwnanya lo Samotira jesnu əfye kwa gyi zhi ya lo Ninyapwolis.12Ya kwuka n abaayi ya znazna lo Fyilibyi, Aromayi əknyifna-begyidnaba n əknyii. Əkwo nu ɓə zhni əzhiyaakwo dnagbmai n Makidoninya əknyi. Yi ɓə kwu fyi n ɓo n anyipyei yi mwa bəgyé.13N Sibyiwyii, ya kwnuya zhi n əzhiyaakwo aduba, zhi n əbmyi kwoi lo əlà, aba n yi ɓə n əwyei tu ge, yi ɓə ɓwa aduwazhni aba. Ya kwu sase zhi, ya ya ɓəda da n anyikwozai, n ɓa ɓəə la yezhi n ɓo nyi.14Əzaknayi n aza yi n ɓa ɓə zhi ɓai knatnubwa nyi, nyikwoza nu, woi gbmi n Tiyatira, ai yi wo ge Lidiya. Wo ɓə zhni woi kwnú aje ayeda nu. Wo ɓə zhni Shekwoyi mwamwagayi nu. Dagayi wa gwu əwo ədu ya nabai wa gwo Bwulus nyawu.15She a ɓə zhni wo batizima n əwo apwuwadai, wa yì əyi fyi n əwo pwuwa. Wa gna, “Ngye fye la mi gwo nge mi zhni gaiciyagayi nu n Dagayi, akpəge fye ɓe fya kwu fyi n əmi pwuwa.” Njesnu wa tna yi aɓwa.Bwulus n Silai fyi n zhalu
16N əwyihoi she yi ɓə zhi yii lo aduwazhni aba, ya shegwnu fyenu ɓyinyikwoi n wo ɓə n zafnui dna n kwo wu aɓo n ɓa ye ɓeɓelo n abye. Wo ɓə zhni woi ɓwa gyiwye n mwa ga əwo adagayi n zokwusheshei.17Wa vyi Bwulus n əyii n yi ɓə kwnusnu n woi nyi, woi fyiakwu, “Aza ye zhni Shekwoyi Ikwoda Duduyi Atnutnuyi nu, n ɓa wu fye zokwo n fye ɓa ɓwa gnyignyi.”18Əɓyinyikwoi ye wa gwodu woi da ɓəye fyi n anyipyei bəgyé. Kwa ɓe kwaa Bwulus gyi minagyi dəidəi, kwa zhni wo wa pmyiawye wa gna zafnu nukwoi, “Dna n Yeisu Kirisiti əye, mi tu ho ɓəgbe, gbmiya ɓe n wo!” Dna n əsayii, zafnu nukwoi kwa gbmiya n wo.19She əwo adagayi ɓə kwu kpəge əɓa awyetu gyiwye ɓwa nya kwo kwu zo, ɓa wna Bwulus n Silai, ɓa gnyì ɓa lo adubayaakwo n ɓai ntuge ɓa lo ɓə gye əɓo n atukwoda ɓa zhni ɓa.20Ɓa ɓe n ɓai n awadayi aba ɓa gna, “Aza ye zhni Ayahudiyi nu, ama ɓa zhi ɓai la gbuzui kala gnyi n əyi əzhiyaakwo21ɓai wu akwnunu n əyi Aromayi ta ye m, kwo ge ya zhni m.”22Deeji kwa dnaɓwado ń Bwulus lulu n Silai, jesnu awadayi ɓa ga əgbe nge a la aje kpma ɓa, a lu ɓa n abwusii.23She a ɓə kwu ɓa lu dəidəi, a kwu ɓa sheya fyi n zhalu, a gna zhalugwuyi ge wo gwu ɓa n əwyei bmyibmyii.24She wo ɓə gwo gbetu ye, wa kwu ɓa gwufyi n zhalu miimii nya jesnu wa kwu ɓa gyizhi n agbmai n apita.25Dna n sukwo sadu, Bwulus n Silai ɓa ɓə fyi ɓai zhniaduwa jesnu ɓai kwoanyi ga Shekwoyi, əɓa azhaluda aje ɓai kna ɓa tnubwa.26N əsagbmanyii əknyi kwa jeashna n kalái, kwa zhni zhalu yi ashnipa kwa jeashna. N əsagbmanyii zhalu akpakwo ɓa gwuya zhi vnyanya, nlonu əzahozahoyi agbma ɓa kwnuya.27Zhalugwuyi wa kwnu-agyewyi, she wo ɓə gye zhalu akpakwo n gwuya zhi, wa wa əbeyaakwo woi ye wa wu əwohni ntuge wo ɓə zhninubwo nge azhaluda ɓa la bwusi.28Ama Bwulus wa sáwyi, “To wu əhohni əɓwa m, əyi vnyanya fyilo n ya!”29Zhalugwuyi wa tnu pyitila ɓo, wa lodna lo əmi əsii, wa she əwohni yazhi n Bwulus abye n Silai, woi vnyi n ədnai.30Nlonu wa kwnu ɓa ɓe ncei n əbmyi, wa nya ɓa əɓo, “Fyaamwasa, knyiyi nu n mi ɓa zhni ntuge ma pwo a?”31Ɓa dnaɓəgbe, “La gaiciyaga n Dagayi Yeisu, ho ɓa pwo; əho n əho apwuwadai.”32Nlonu ɓa da wo Dagayi ɓədagbma ɓədo n azajei vnyanya n ɓa fyi n əwo pwuwa.33Dna n sukwoyii, zhalugwuyi wa kwu ɓa, wa zhna ɓa aci ya; nlonu n əsagbmanyii əwo n əwo apwuwadai vnyanya a zhni ɓa batizima.34Zhalugwuyi wa ɓe n ɓai n əwo pwuwa wa ga ɓa nyagyi; waa nu n agbmadai ntuge wo la gaiciyaga n Shekwoyi; əwo n əwo apwuwadai vnyanya.35She əfye ɓə gyi zhi, awadayi ɓa tnu əɓa atnutnuyi tnutnu lo zhalugwuyi aba n gbetu yei: “Kwu aza yi ya aɓwa.”36Zhalugwuyi wa gna Bwulus, “Awadayi ɓa la əgbe ga nge, əho n Silai, a la fye kwnuya. Nsaiye fye ɓa myi fya lo. Fye lo n bwugbafui.”37Ama Bwulus wa gna atnutnuyi: “Ɓa kwu yi lu n aza awye ntna owada, kwo shikwonyi yi zhni Aromayi nu, jesnu ɓa kwu yi sheya fyi n zhalu. Nsaiye ɓa ye ɓa kwnu yi ya fyaa? Aawo! Ɓa ɓe n əɓahnii ɓa da yi apye yii kwnuya.”38Atnutnuyi ɓa lo ɓa da awadayi ɓəye, she ɓa ɓə wo nge Bwulus n Silai ɓa zhni Aromayi nu, ɓa kwu wodna.39Ɓa ɓe, ɓa tna ɓa aɓwa, jesnu ɓa da ɓa apye ɓai kwnuya n zhalu, ɓai ɓa ɓa nge ɓa la kwnu n əzhiyaakwo yi.40She Bwulus n Silai ɓə kwnuɓe n zhalu, ɓa lo Lidiya pwuwa, aba n ɓa ɓə snu n azajei, azanugbai n anyikwozai jesnu ɓa dna ɓa bwugbakala. Nlonu ɓa kwnuya, ɓa lo.Biblica, Inc.