Atnutnu10
Kwonoliyos tnu Byitusu ɓo
1Dna n Kaisariya, əza ɓə nyi ai yi Kwonoliyos, bəzhetagyida, n a ɓə zhni ai yi nge Italiya Gwodo nyi.2Əwo n əwo pwuwai vnyanya ɓa ɓə zhni Shekwoyi-adnawoi nu n əɓahnii gagai; woi ga awyekwoyi anya n əɓwai loya jesnu woi zhniaduwa ga Shekwoyi n asai n a ncei kpe aduwazhni nya.3N əwyihoi, əsa ngye snukna ngwnu-ata n nyipyeii, wa gye ɓəwyegye. Wa gye maləka Shekwoyi nya pəipəi, n wo ɓə ɓe da wo wa gna, “Kwonoliyos!”4Kwonoliyos wa shi wo awye byiwuu n ədnai. Wa nyaɓo, “Dagayi, knyiyi nu a?”Maləka wa dnaɓəgbe, “Əho aduwazhni n anyagai n ho ga awyekwoyi nyi, ɓa kwu gwnuzhi n zhni nyaga ɓəpá nya n Shekwoyi abye.5Nsaiye tnu n azai ɓa lo Joppa ɓa lo ɓəə ɓe n əzai n wo əye nyi ge Sima, n a je wo yi ge Byitusu nyi.6Wo dnalo n kwnusnu n Sima yi əpabmyiyi, əza n əwo pwuwa ma shikwonyi.”7Əsa n maləka n wo ɓə daɓo n woi nyi ɓə la lo, Kwonoliyos wa yì əwo atnutnuyi ngwnu-aba ɓədo n okwnuyi wyenyiyii n wo ɓə zhni woi vyi wo əɓo nyi.8Wa gna ɓa ɓəhoɓəhoi n kwo ɓəə kwu zhni jesnu wa tnu ɓa tnutnu lo Joppa.
Byitusu ɓəwyegye
9Əfye kwa gyi zhi, nyipyei kwoi tu n atukwo, əsa n ɓa fyilo ncei n əzna ɓai wo vyivyiwyi n əzhiyaakwoi, Byitusu wa gwnulo nyakwnusni tukwo ntuge wo zhniaduwa.10Myikwnu kwaa wo gwnu, woi ye nyaho wa gyi, jesnu əsa n a ɓə ye gnyi ai zhni nyagyi ɓo, wa gye ɓəgyegye dna n zafnu.11Wa gye əshemi n gwuya gnyi, jesnu nyaho ngye shnipa yaakwo ai shnizhi n kwoi n əknyi n kwoi shi n əkwo aɓwakwonu ngwnu-anyi.12Kwo ɓə n anyafwanya apita-anyi da dəhodəhoi pyai kpe vnyanya, ɓədo n anyai n ɓa kwó n nubwoi kpe n əknyi jesnu n alui.13Nlonu bəgye kwa gna wo, “Byitusu, laka gnyi. Wu jesnu ha gyi.”14Byitusu wa dnaɓəgbe, “Dagayi nlonu nu to m kpeekpe! Mi too shni ənya ajegbmii gyi kwo tnagyii m.”15Bəgye kwa daɓo n woi əɓwa baayi, “To yi nyahonyahoi nge ajegbmiyi n Shekwoyi la kwo zhni gyigyiyii m.”16Dəye kwa zhni nlonu aɓwa ngwnu-ata, jesnu n əsagbmanyii a je kwo lagwnu lo ncei n əshemi.17Aɓwazhilo Byitusui dna n ɓəwowoi ɓətukwo zafnu ɓəwyegye nya, aza n Kwonoliyos ɓə tnu n ɓai nyi, ɓa kpe Sima pwuwa aba jesnu ɓa kwu kpezhi n aduba.18Ɓa ɓe ɓai nyaɓo kwo Sima n a je wo yi ge Byitusu nyi, ɓə dna n abaayi.19Shi Byitusu ɓə gnyi woi ye zhni ɓənubwo zafnu ɓəwyegye nya, Zafnu wa gna wo, “Sima, aza ngwnu-ata zhi lo ɓai zna ho shni.20Ntulonu laka ha kashi lo əknyi. Ɓwato to wo ho ha kwnulo n ɓai m, ntuge əmi nu naa tnu ɓa.”21Byitusu wa shnilo wa gna aza yi, “Əmi nu zhni əza n fye znashni nyi. Knyiɓei nu naa ɓe n fyei a?”22Aza yi ɓa dnaɓəgbe, “Yi kwnu n Kwonoliyos aba nu, bəzhetagyida. Wo zhni ɓəfyeceyi nu jesnu əza n wo n Shekwoyi dnawoi. Ayahudiyi vnyanya ga wo mwamwa. Maləka gyigyiyi ɓə gna wo nge wo gna ho ha ɓe əwo pwuwa nabai n wo ɓa wo əɓo n ho ncei lo ha da.”23Nlonu Byitusu wa yì ɓa fyi n apyimi ɓa kwu zè əwo azhiɓeyi. Byitusu dna n Kwonoliyos pwuwaƏfye kwa gyi zhi Byitusu wa wna əzna n kwnusnu n ɓai, jesnu avyiyi ho n Joppa ɓa kwnulo n ɓai.24Əfye kwa gyi zhi wa si Kaisariya. Kwonoliyos ɓə dna n əɓa awyetui jesnu wo ɓə la əwo əbyéɓala yezhi n abagbmanyi ɓədo n əwo anugwnudoi n ɓa wo vyivyiwyi n woi.25Shi Byitusu ɓə lodna n pwuwa, Kwonoliyos wa shegwnu wo jesnu wa yashi n əwo apitaba dna n mwamwaga.26Ama Byitusu wa zhni wo wa laka gnyiagnyi. Wa gna, “La laka gnyiagnyi. Mi zhni zanyikwoci cè ngye əho.”27Woi ye gnyi woi daɓo n woi, Byitusu wa lodna n əmi wa gye deeji yaakwo n yezhi.28Wa gna ɓa: “Fye kpəlo dəidəi nge, kwo dnalo n əyi owa nge, Yahudiyi taa dna əɓwado kwo wa lo Əbyedo gnaɓyi m. Ama Shekwoyi wo kwu wu mi nge mi to yi zahozahoyi nge ajegbmiyi kwo tnagyii m.29Ntulonu shi a ɓə tnu əmi ɓo, ma ɓe ntna aɓəna ho. Mi ɓa myi ma wo əɓo n ha tnu əmi ɓo n cenyi?”30Kwonoliyos wa dnaɓəgbe, “Anyipyei ngwnu-ata n ɓa la duya nyi, mi ɓə dna n əmi pwuwa mii zhniaduwa n əsa yei, snukna ngwnu-ata n nyipyeii. N əsagbmanyii əza n aje anabmyaii kpe wa gbmignyi n əmi abye31nlonu wa gna, ‘Kwonoliyos, Shekwoyi kwu əho aduwa wo, jesnu wo kwu əho anyaga ga ɓə pa, n ho ga awyekwoyi nyi.32Tnu Sima ɓo n Joppa n a je wo yi ge Byitusu nyi. Wo dnalo n azhiɓeyi n Sima əpabmyiyi pwuwa, n wo ma n shikwo əgbe nyi.’33Nlonu ma tnu ho əɓo n əsagbmanyii, jesnu kwo bmyalo she ho la ɓe. Nsaiye, əyi vnyanya yi zhinyi n Shekwoyi abye, nyahonyahoi n Shekwoyi wo la tu ho əgbe, ho gna yi.”34Nlonu Byitusu wa ya ɓəda: “Nsaiye, mi la gaiciya ye kpeye, nge Shekwoyi ta knyi aza knyiknyi m35ama wo gwo əza n əbyé dəhodəhoi n wo n əwo dnawoi dna n mì jesnu woi zhni əɓo n kwo zhni ɓəfyece.36Fye kpe nabagyi ye lo n Shekwoyi ɓə tnu Israila aza ncei nyi, woi da nabagyi manai bwugbafu nya dna n Yeisu Kirisiti; n əwo nu zhni aza vnyanya Dagayi nyi.37Fye kpe əɓo ye lo n kwo kwu zhni n Yahudiya əknyi vnyanya, ənya n kwo ya n Gəlili n Yohana batizimazhniyi waazizhni avnu:38Shi Shekwoyi ɓə pmya Yeisu Nazeretiyi n Zafnu Gyigyiyii ɓədo n kalái, wa zna laɓa woi zhni aɓo amanai jesnu woi ká aza gna vnyanya n ɓa ɓe fyi n Shetam kalá akwnu, ntuge Shekwoyi ɓe kwnusnu n woi.39“Yi zhni aɓəkwnuyi nu ɓəhoɓəhoi nya n wo ɓə zhni dna n Ayahudiyi əknyi jesnu dna n Urishelima. Ɓaa wo wu n gyitu n znudu,40ama Shekwoyi waa wo laka n əfyi n nyipyei taayii, jesnu wa zhni a kwu wo gyewye.41Aza vnyanya nu to ɓə gye wo əwye m, ama aɓəgbmiyi n Shekwoyi ɓəə la pmaknyi zhi, ɓədo n əyii, n yi ɓe kwu nyagyi kwnugyi n woi jesnu ya kwnu nyasnisnii sni n woi, əsa n wo ɓe laka n əfyi nyi.42Wa tu yi əgbe nge yi da nabagyi ye ga aza, jesnu ya daɓo ge əwo nu n Shekwoyi wo la knyi wa da aza awyewyeyida owa n afyífyii.43Sheaɓəgwognayi vnyanya gbmi wo əɓo nge zahozahoyi n waa gaiciyaga dna n wo, wo ɓa gwo aleifyi zozo dna n əwo əye.”44Byitusu woi ye gnyi woi da aɓədagbma ye, Zafnu Gyigyiyi wa shnikpe n aza vnyanya n ɓa ɓə kwu ɓəda wo.45Avyiyi n ɓa ɓə anyai znuznui, n ɓa ɓə kwnuɓe n Byitusui, ca wo ɓa shi nyaga Zafnu Gyigyiyi nya kwo kwu ɓe kpe n Abyedo ce.46Ntuge ɓa ɓə wo ɓa zhi ɓai daɓo n anyitala ədoi jesnu ɓai ci Shekwoyi.
Nlonu Byitusu wa gna,47“Ɓəhnihni zaho to lo wa kpma ɓa batizima zhni n nuwnai m. Ɓa la Zafnu Gyigyiyi gwo n ɓwasnu shi yi ɓə gwo nyi.”48Ntulonu wa ga əgbe nge a zhni ɓa batizima dna n Yeisu Kirisiti əye. Nlonu ɓa gna Byitusu nge wo la kwnudna n ɓai anyipyei fyewyi.
Biblica, Inc.