2 Akworentiyi6
1Ngye Shekwoyi atnutnu kwnuzhniyi, yi gyi fye əwye nge fye to gwo Shekwoyi shebmyashi kwaa zè gbəloi m.2Ntuge wo ncei da lo nge,“N əsa əmi bmyashi nya, mi ɓə kwu əfye ɓəda wo,jesnu dna n gnyignyi əwyi, mi ɓə kwu fye bmazhni.”Mi gna fye, nsaiye nu zhni Shekwoyi bmyashi əsa. Nsaiye nu zhni əwyi gnyignyi nya.
Bwulus azhnìgye
3Yi ta shi zahozahoyi kwuta bwonyice nya lo n zokwo m, nabai to a ci əyi ɓəvyitnutnu aɓoya m.4N əkwoɓwi, yi kwu əyihni wu ge dna n zokwo dəhodəhoi, yi zhni Shekwoyi atnutnuzhniyi nu: n bwugbaɓwa yaakwo; n aɓəsnu, azhnìgye n snuwnai;5dna ń lulu, n gwugwufyi n zhalu, n gbuzui; dna ń tnutnu shnawoi, n əgyewnakpmá n myikwnui;6ń gyigyii, ń gənyikpekpe, ń bwugbaɓwa ɓədo n abmyazhnizhni; dna n Zafnu Gyigyiyi jesnu ń yeyewu ədu gbmanyi nya;7ń gaiciyanunui ɓəda jesnu n Shekwoyi kalái; ɓədo n akwnukaya ɓəfyece nyai shi, ń ɓwaizhe n ɓwaipmii;8dna ń latu n wyegbacii, dna ń nabagyi nukwoi ɓədada n manaii ɓədadai, n ɓəhnihnizhni, dudulonu ai gye yi ngye akwocednai;9ai kpe yi əye, dudulonu ngye a ta kpe yi əye lo m; ngye afyífyiyi dudulonu yii gyianyì; n luluyi, dudulonu a too wu yi m;10n bwugbawnui, dudulonu yii fyilo ciici n agbmada; dna n əsna, dudulonu yii zhni bəgyé ɓai zè anyaɓwayi; ntna nyaho, dudulonu n nyaɓwa dəhodəhoii.11Yi kwu ɓəda da n bwugbai yayai n fyei, əfye Akworentiyi, jesnu yi la əyi adu gwuya ga fye n patai.12Yi to fa fye əyi ayeyewu ɓo m, ama əfye nu kwu fa əfye yeyewu ɓo ga yi.13Ngye nyadoshna manai; mi daɓo ngye mi da n əmi aɓyii nu; fye la əfye adu gwuya ce n patai.Ɓəkwnukwnù tu n ashnagba ɓo
14Fye to kwu əfyehni cigyido najei n atnavyiyi m. Ntuge knyiyi nu n ɓəfyecezhni n əkpízhnii cigyido lo a? Kwo knyi jedoɓəzhni nu ń bwuznagna ncei lo n wyegbmai a?15Knyi gbədolo nu lo n Kirisiti atasni n Beliyai a? Vyiyi n knyiyi nu lo n wo ɓa kwnuzhni n tnavyiyi a?16Dagayipwuwa n knyi ɓəgbedoloi nu lo n ashnapwuwai a? Ntuge əyi nu zhni Dagayipwuwa Shekwoyi wyewyeyida nya. Shi Shekwoyi kwu da nyi:“Mi ɓa sase n ɓai jesnu ma znazna dna n əɓa atasni,jesnu mi ɓaa zhni əɓa Shekwoyi,jesnu ɓa ɓá kwu zhni əmi aza.”17Ntucenu,“Fye la kwnuya n əɓajesnu fyaa knyiyazhi.Dagayi da lo.Fye too to ənya tnagyii ɓwa m,nlonu mi ɓa gwo fye.”18Jesnu,“Mi ɓaa zhni əfye Dada,jesnu fya kwu zhni əmi anugwnun əmi anyigwnui,Dagayi Kaláda Duduyi vnyanya nu da ɓo.”Biblica, Inc.