1 Yohana5
Gaiciyaga dna n Shekwoyi Nugwnu
1Zahozahoyi n wo la gaiciya ga nge Yeisu nu zhni Kirisiti, a la wo shna ma dna n Shekwoyi, jesnu zahozahoyi n wo ye dada, wo ɓa ye əwo əɓyi ce.2Nlai nu n yi kpe nge yi ye Shekwoyi aɓyi lo: she yi wu Shekwoyi yeye jesnu yii shi əwo aɓəgbetu əɓwa.3Ɓəhnihni dəye nu zhni yeyewu ga Shekwoyi: ya shi əwo aɓəgbetu əɓwa. Njesnu əwo aɓəgbetu to dnaɓo lo m,4ntuge zahozahoyi n a la wo shna ma dna n Shekwoyi, wo kwu nasalagyi nu n anyii. Dəye nu zhni nasalagyi n kwo la myi n anyi ɓo; əkwo nu zhni əyi gaiciyaga.5Nyika nu lo n wo myi n anyi əɓo a? Əza yi nu ɓwasnu n wo n gaiciyai ga nge Yeisu nu zhni Shekwoyi Nugwnu.6Əza yi nu nyi n wo ɓə ɓe n nuwnai ɓədo n amii, Yeisu Kirisiti. Wo to ɓə ɓwa ɓe n nuwnai nu gbmanyi m, ama nuwna n amii. Njesnu Zafnu nu gbmi əɓo ye, ntuge Zafnu nu zhni gaiciyanunui.7Ntuge əɓa ngwnu-ata nu gbmiɓo [n əshemi: Dada, Ɓədagbma n Zafnui; əɓa ngwnu-ata zhni gbmanyi nu.8Jesnu ɓa lo ngwnu-ata n ɓa gbmiɓo n anyì]: Zafnu, nuwna n amii; njesnu əgbe kwo kwu ɓa lodo əɓa ngwnu-ata yi.9Yi gwo zanyikwoci ɓəgbmi, ama Shekwoyi ɓəgbmi kwo dulo ntuge kwo zhni ɓəgbmi Shekwoyi nya nu, ədo n wo la ga ntu əwo Nugwnu ɓo.10Zahozahoyi n wo la gaiciya ga dna n Shekwoyi Nugwnu, wo la ɓəgbmi ye gwo nu. Zahozahoyi n wo to ga Shekwoyi gaiciya m, wo la wo zè katayi, ntuge wo too ga Shekwoyi ɓəgbmi gaiciya ntu əwo Nugwnu ɓo m.11Njesnu dəye nu zhni ɓəgbmi: Shekwoyi wo la wyewyeyi nyalonyalo nya ga yi, njesnu wyewyeyi ye kwo dnalo n əwo Nugwnu nu.12Zahozahoyi n wo n Nugwnui lo, wo n wyewyeyii lo; zahozahoyi n wo to n Shekwoyi Nugwnui lo m, wo to n wyewyeyii lo m.Ɓəda kpmasnui
13Mi ka aɓo ye ga fye n fye kwu gaiciya ga dna n Shekwoyi Nugwnu nyi, nabai n fye ɓa myi fya kpe nge fye n wyewyeyi lo nyalonyalo nya.14Dəye nu zhni agwumyi n yi ncei ɓwa yii yegwu Shekwoyi: nge n ya nya wo nyahonyahoi əɓo n kwo vyi əwo ɓəmwi, wo wo yi lo.15Njesnu n yi kpəlo nge wo woi yi lo, ənyahonyahoi n ya nya kwo əɓo, yi kpəlo nge yi la ənya ɓwa n ya nya wo əkwo ɓo nyi.16N fya gye əfye zado kwo mapwi woi zhni leifyi n kwo taa lo n əzai n əfyi m, fye zhniaduwa njesnu Shekwoyi ɓa ga ɓa wyewyeyi. Mi da aza yi nu əɓo, n əɓa leifyi ta lo n əzai n əfyi m. Leifyi lo n kwo lo n əzai n əfyi. Mi to gnyi mii gna nge a zhniaduwa nu ntu əkwo ɓo m.17Ɓənukwoi dəhodəhoi n zhni leifyi nu, jesnu leifyi lo n kwo ta lo n əzai n əfyi m.18Yi kpəlo nge zahozahoyi n a la wo shna ma dna n Shekwoyi, wo taa gwodu woi zhni leifyi m; Əza n Shekwoyi nu ɓə ma nyi, wo wna wo akna jesnu əzanukwoyi ta myi wa wu wo əɓwa m.19Yi kpəlo nge yi zhni Shekwoyi aɓyi nu jesnu nge anyì vnyanya dna gnyi n əzanukwoyi akwnu nu.20Yi kpəlo nge Shekwoyi Nugwnu wo la ɓe, wo la awyega ga yi, nabai n yi ɓa myi ya kpé əwo əye, n wo zhni gaiciya nyi. Njesnu yi fyilo n wo nu n wo zhni gaiciya nyi, əsa n yi fyilo ncei n əwo Nugwnu Yeisu Kirisiti. Əwo nu zhni Shekwoyi gaiciya nya ɓədo n wyewyeyi nyalonyalo nyai.21Aɓyi ayeyeyi, fye la aɓwakwnu n ashna aɓo.Biblica, Inc.