1 Akworentiyi7
Nyawu tu n mwula tukwo
1Nsaiye ntu əɓonya ɓo, n fye ɓə ka ga mi nyi: “Kwo bmyalo to zanugbai wa yama nyikwoza m.”2Ama shikwonyi asisiɓozhni lo n mwa nyi, zanugbai dəhodəhoi wo ɓwa yama əwo nyikwo nu, jesnu nyikwoza dəhodəhoi wo ɓwa yama əwohni ənu nu.3Ənu wo nu əwo mwula tnutnuzhni ga əwo nyikwo, n kasnu nyikwo ga əwo ənu.4Nyikwo wo ga əwo əɓa əwo nayi ɓəznu, n kasnu əɓa wo ga əwo nyikwo əwo nayi ɓəznu.5Fye to wo aje əfye anayi ɓyi m, akpəge fye kwu ɓəda da n ajei kwonyi kwu fye lodo n ɓwasnu əsa fyewyi nya, nabai n fye ɓa myi fya kwu əfyehni ga fyi n aduwazhni. Nlonu fye je yegwu aje nabai n Shetam taa mwu fye ntu tna əfyehni wnashi ɓo m.6Mi da dəye ngye gbedolo ɓo nu, ɓəgbetu nu to m.7A wo mi lo ngye əfye vnyanya, fye yee wulo ngye əmi nu. Ama zahozahoyi n fye, wo n əwo nyagai lo n wa gwo n Shekwoyi; əza gbmanyi n nyagai yei lo, n kasnu əzado n nyaga ədoi lo gbowo.8Nsayi mi daɓo ga atna amwulapayi nu ń anyigbayii, mii gna: kwo bmyalo ɓa kwu zhi ntna mwulapa, ngye she mi gnyi nyi.9Ama ngye ɓa taa myi ɓa wna əɓahni shi m, ɓa kwu amwula pa, ntuge kwo gnabmya lo a pamwula a fa ədo n əza ɓa əwohni byidna ń nayi shakpe nyi.10Amwulapayi mi ga fye ɓəgbetu ye (əmi nu to m, ama Dagayi nu) Ɓəshishi nu nyikwo taa ya əwo ənu m.11Ama n wa zhni lonu, ɓəshishi nu wa gnyi ntna ənuso; n kwo ɓá cecelonu, wa jezelo da əwo ənu. Njesnu ɓəshishi nu ənu taa ya əwo nyikwo m.12Azaje n ɓa ce nyi, mi gnage, əmi, toge Dagayi m: Ń zanugbai ho n nyikwoi lo n wo to zhni vyiyi nu m jesnu wonyi ncei ye lo waa dna n woi, ɓəshishi nu wo taa ya wo m.13Njesnu n nyikwo n ənui lo n wo to zhni vyiyi nu m, wonyi ncei ye lo wa dna n woi ɓəshishi nu wo taa ya wo m.14Ntuge a la ənu tnavyiyi pmyaya ntu əwo nyikwo ɓo, jesnu a la nyikwo tnavyiyi pmyaya ntu əwo ənu ɓo. Ntolonu m, əfye aɓyi ɓá kwu zè atnagyiyi, ama ngye shikwo wu ń lai nyi, ɓa gyigyiyii lo.15Ama n tnavyiyi ncei pmalo wa gbmiya n mwula yi, kwa la zè lonu. Zanugbai yi kwo nyikwoza yi, to papai lo n ɓəye m; Shekwoyi wo la yi yì, ya gyianyì fyi n bwugbafu nu.16Nyikwo, ho ɓa kpé n wunanu, kwo əho nu ɓa gnyi əho əɓa a? Kwo əho, ənu, ho ɓa kpé n wunanu, kwo əho nu ɓa gnyi əho nyikwo a?Asese pya n kwo dá Dagayi
17Dudulonu, zahozahoyi wo gyianyì ngye gaiciyagayi n ɓəhoɓəhoi shi Dagayi wa knyi ga wo, n ɓwasnu shi Shekwoyi ɓə yi wo nyi. Dəye nu zhni ɓəgbetu n mi ga aikilisiya vnyanya.18A ɓəə la əza lu nyaznu, əsa n a ɓə yi wo ncei nyi? To, wo to la zè tnanyaznuzhniyi m. A ɓəə la əza lu yìi, ntna nyaznuzhnii? A to zhni wo nyaznu ɓo m.19Nyaznu zhni to zhni nyaho nu m, jesnu tnanyaznuzhni to zhni nyaho nu m. Shekwoyi aɓəgbetu ɓwashi nu zhni ənya kpokəloi.20Zahozahoyi wo la kpedna n aba n a ɓəi snu wo dna əsa n Shekwoyi ɓə yi wo ncei nyi.21Ho ɓə zhni fyenu nu əsa n a ɓə yi ho ncei nyi? To fa kwo kwa wnu ho bwugba m; kwo shikwonyi ngye ho ɓa myi ha ɓwa əho loloya, akpəge ho zhni lonu.22Ntuge əza n wo ɓə zhni fyenu nu, əsa n a ɓə yi wo ncei dna n gaiciyaganunui n Dagayi, əwo nu zhni əza n Dagayi n la wo loya; n jewulonu, əza n wo ɓə loloiya, əsa n a ɓə yi wo ncei nyi, wo zhni Kirisiti fyenu nu.23A ɓə la fye si n kwoná; fye to kwu zè azanyikwoci afyenu m.24Əmi azaje azanugbai n anyikwozai, zahozahoyi, ngye shi əwo tnutnu lo, ga Shekwoyi, wo la kpedna n aba n wo ɓə dna əsa n Shekwoyi ɓə yi wo ncei nyi.Nyawu tu ntna amwulapayi ɓo
25Nsaiye ntu n akwului ɓo: mi to n ɓəgbeshii lo n kwa gbmi n Dagayi aba m, ama mi znuɓəya ngye əza nu n wo dna n Dagayi snusnugye, n wo la kwnuce a kpema wo.26Ntu aɓobwufyi ɓo n ɓa zhi nsaiye nyi, mi zhninubwo lo nge kwo bmyalo əza waa gnyi ngye shi wo gnyi nyi.27Ho n nyikwozai shigbe lo o? To zna loloya shni m. Ho to n gbèshi ye pyai shi lo m? To la nyikwo m.28Ama n ho ɓa pamwula, ho too zhni leifyi m; jesnu n ɓyinyikwoikwului wa pamwula, wo too zhni leifyi m. Ama aza yi n ɓa pamwula nyi, ɓa ɓá gyeazhnì n mwa fyi n anyìmi ye; mi ncei pmalo maa fye gwoya n aɓo ye.29Əmi azaje azanugbai n anyikwozai, əɓo n mi da nyi, əkwo nu ge, əsa to ye mwalo m. Ənya n kwo laka nsaiye kwoi lo n abyei, aza yi n ɓa n anyikwoi fyilo, ɓa gyianyì ngye ɓa to ncei fyilo m.30Aza yi ń ɓa fyilo n bwugbazhii, ngye ɓa to fyilo n kwo m; aza yi ń ɓa n bwugba bwuibwui lo, ngye ɓa to ncei lo m; aza yi n ɓa si anyaho lo, ngye əɓa anya nu to n ɓa ɓá shi m.31Aza n ɓa zhni apma n cala ye anyai, ngye ɓa to n əɓahnii gagailo fyi n ɓa m. Ntuge anyìmi ye n kwo shi nsaiye nyi, kwoi gnyi kwo duya nu.32Mi ncei pmalo fya kwnuya n aɓəsna. Zanugbayi n wo too pa amwula m, əwo aɓonubwozhni lo ntu Dagayi tnutnu ɓo nu; shi wo ɓa zhni əɓo kwa da Dagayi.33Ama əza n wo la nyikwo la, əwo aɓonubwozhni nyi ntu anya anyìmi nya ɓo nu; əɓo n wo ɓa zhni kwa da əwo nyikwo,34əwo aɓo ye n gnaje-gnagnai lo. Nyikwoza n wo too pamwula m, kwo ɓyinyikwoikwului əwo aɓonubwozhni nyi ntu Dagayi atnutnu ɓo nu: Əwo ɓəmwi əkwo nu ge waa əwohni knyishi, n əwo nayi ɓədo n zafnui ntu Dagayi ɓo. Ama nyikwo mwulapai əwo aɓonubwozhni nyì ntu anyìmi ye nya ɓo nu; əɓo n wo ɓa zhni kwa da əwo əɓa.35Mi da aɓo ye ntu əfye apma ɓo nu, toge ma kpma fye aɓəho zhni nu m, ama nabai n fye ɓa gyianyì n cefyé, n əfyehnii knyi zhi, n tnajegnai, ga Dagayi.36Ngye əzaho n aɓəsai lo nge, wo zhni aɓo lo n ɓa to wulo cewo n ɓyinyikwoikwului n wo ncei shigbe gnyi nyi m, jesnu ngye əwo nayi shakpe n kalái dnalo n mwa, jesnu n wo wolo ngye wo pamwula, akpe wo zhni shi wo ye. Wo ta zhni leifyi nu m. Ɓa pamwula.37Ama zanugbai n wo kwu aɓo wnado fyi n əwo bwugba, n a ta yekwofyi wo nu m, ama wo n əwohnii wnashi lo n əwo ɓəmwi, jesnu əza n wo la bwugbadna nge wo ɓa gnyi nlonu, wo ta la ɓyinyikwoikwului m; əza ye ce wo zhni əɓo manai nu.38Ntulonu nsaiye, əza n wo la ɓyinyikwoikwului, wo zhni əɓo manai nu, ama əza n wo to la nyikwo m, wo kwu əɓo zhni nkwo gnabmya.39Ɓəshishi nu nyikwoza waa dna n əwo əɓa akwnu, əsa n əwo əɓa ye gnyilo n wyewyeyii. Ama n əwo əɓa wa fyí, wo ɓa myi wa so əzado n wo ye, ama ɓəshishi nu, a gye əza yi n zhni Dagayi nya nu.40N əmi ɓəznuya, kwo ɓa gna wo agbmada n wa gnyi ntna ənuso, jesnu mi zhninubwo lo nge mi da ɓəye n Shekwoyi Zafnui nu.Biblica, Inc.