1 Akworentiyi15
Kirisiti kalala n əfyi
1Nsaiye, əmi azaje azanugbai n anyikwozai, mi ncei pmalo ma ce fye ɓəpá nabagyi manai nya n mi ɓə zhni fye əkwo waazi nyi, ədo n fye ɓə gwo jesnu ədo n fye gnyiagnyi kpe n kwo nyi.2N nabagyi manai yei nu n fye kwu gnyignyi ɓwa, ń fya kwu ɓədagbma shiɓwa kamkam, n mi ɓə zhni fye kwo waazi nyi. Ntolonu m, əfye gaiciyaga kwo la zè gbəloi.3Ntuge ənya n mi ɓə gwo nyi, əkwo nu n mi ɓə ga fye ngye əɓo kpokəloi kpmisnui: nge Kirisiti ɓə la fyí ntu əyi aleifyi ɓo ngye shi Anyakagyigyiyi ncei da lo,4nge a ɓə la wo byi, nge a ɓə la wo laka n nyipyei taayii, ngye shi kwo kafyilo n Anyakagyigyiyi,5jesnu nge wo ɓə la kpeya da Kefas, nlonu wa kpeya da awoceaba yi.6N dəye avnu, waa kpeya da əyi azaje azanugbai n anyikwozai n du tagyi-atnu (500) ya n əsagbmanyii, aza n mwa bəgyé n əɓa mi, ɓa ye zhi lo n wyewyeyii, kwo shikwonyi azaho n ɓa, ɓa kwu wnagye.7Nlonu wo ɓə la kpeya da Jemyis, jesnu ga atnutnuloyi vnyanya,8N kpmasnu n aza vnyanya avnu, wo ɓə la kpeya da mi ce, ngye əza n a to ɓə ma wo, shi a shni azaje ma nyi m.9Ntuge əmi nu zhni gnagbagbai n atnutnuloyi, njesnu mi to kwnuce lo, kwo a yi mi nge tnunuloyi m, ntuge mi ɓə kwu Shekwoyi Ikilisiya wu awyesnugbegye ɓo n mwa.10Ama n shebmyashi Shekwoyi nyai, mi zhni əza nu n mi zhni nyi, jesnu əwo shebmyashi n əmi aba to ɓə ɓe ntna gyiba m. Aawo, mi ɓə kwu tnutnu zhni n du ɓa vnyanya; dudulonu əmi nu to ɓə zhni m, ama shebmyashi Shekwoyi nya n kwo ɓə kwnusnu n mii nyi.11Nlonu, kwo ngye əmi nu kwo əɓa, əɓo nyi n yi zhni kwo waazi, jesnu əɓo nu nyi n fye ɓə ga kwo gaiciya.Afyífyiyi kalakwu
12Ama ngye a zhni waazi lo nge a ɓə la Kirisiti laka ń əfyi, kwo ɓa zè n wunanu azaho n fye ɓa gna nge əfyikalakwu to lo ma a?13Ngye əfyikalakwu to lo m, to a gye kwo Kirisiti n əwohni a to ɓə la wo kala nu m.14Njesnu ngye a to ɓə la Kirisiti kala m, əyi waazizhni zhni gbəloi nu, nlonu ce əfye gaiciyaganunui.15N du dəye, a gye yi kwu zè aɓəkwnuyi akatai ntu n Shekwoyi ɓo, ntuge yi la əɓəgbmi ntu Shekwoyi ɓo ge wo ɓə la Kirisiti laka n əfyi. A gye wo to ɓə la wo kala nu m, ngye ɓəhnihni nu ge, a ta kwu azafyí kala lo n əfyi m.16Ntuge ngye a ta kwu azafyí kala lo m, a gye a too la Kirisiti kala nu ce m.17Njesnu ngye a too la Kirisiti kala m, a gye əfye gaiciyaganunui zhni tnatukwogyii nya nu; jesnu fye ye fyilo n əfye aleifyi nu.18Nlonu aza yi ce n ɓa kwu wnagye fyi n Kirisiti nyi, ɓa kwu ɓwi nu.19Ngye n ɓwasnu dna n anyì ye nu, n yi n awyetui lo dna n Kirisiti, a gye a ɓa gna əyi nu snusnugye n du azaje vnyanya.20Ama ɓəhnihni nu, a ɓə la Kirisiti laka n əfyi, əwo nu zhni əfyi gyigyikpmisnui n aza yi aba n ɓa kwu wnagye nyi.21Shikwonyi əfyi ɓə ɓe n zanyikwoci zokwo nu, kala la n əfyi cè kwo ɓe n zanyikwoci zokwo nu.22Ntuge ngye dna n Adamwu, aza vnyanya ɓə kwu fyí, ntulonu dna n Kirisiti aza vnyanya ɓa ɓwa wyewyeyi.23Ama zahozahoyi n əwo əsai: Kirisiti nu zhni gyigyikpmisnui n kala la; əsa ń wo ɓə jezezhi ncei, nsayi aza yi n ɓa zhni əwo anya nyi.24Nlonu əsa kpmaknayi ɓə ɓe, she wo ɓə la əbemi dna Shekwoyi Dada n akwnu; woi la abegyi vnyanya wnuya, n əgbeznui n kalái.25Ntuge ɓəshishi nu wa gyi əbe nya əsa n wo ɓə kwu əwo anuwnuyi vnyanya fyi n əwo apitabwada snuta.26Nuwnuyi kpmaknayi n a ɓə zhni kwo agbma nyi, əkwo nu zhni əfyi.27Ntuge wo “kwu nyahonyahoi fyi n əwo apitabwada snuta.” Nsaiye she kwo gna nge “anyahonyahoi” fyilo n wo snuta, kwo wulo pəipəi nge dəye to n Shekwoyi əwohnii dnalo n ɓo, n əwo nu ɓə fyi anya vnyanya n Kirisiti snuta nyi m.28She wo ɓə kwu dəye zhni, nlonu Nugwnu n əwohnii, wo ɓə la dna n əwo akwnu; əwo n wo ɓə fyi anya vnyanya n əwo snuta nyi, nabai n Shekwoyi ɓə la zhni vnyanya fyi n aɓo vnyanya.29Nsaiye, ngye əfyikalakwu to lo m, aza yi ɓə zhni knyiyi nu n a ɓə zhni ɓa batizima ntu n əfyi ɓo nyi a? Ngye a to ɓə kwu afyífyiyi kala m, nanyinanyi, a zhni aza batizima n əfyi ɓo ge na?30Njesnu ntu əyi ɓo, knyiyi nu zhni yii fyi əyihni n azhnìgye n snukna dəhodəhoi a?31Mi gye əfyi əwye lo fyegyifyegyi; əə, n ɓwasnu shi mi gyigbe n əfyei, ɓəhnihni nya, dna n Kirisiti Yeisu əyi Dagayi nyi.32Ngye mi ɓə kwu okwnu snu n anyawnanyawnai dná n Afyisus n awyetui n ɓa to du zanyikwoci nya ya lo m, mi kwu knyi gyibai nu gyi a? Ngye a to ɓə kwu afyífyiyi kala m,“Fa ya gyi jesnu yii sni,ntuge nsu yi ɓə fyí.”33Fye to vyi abaɓwi m: “Anugwnudo nukwoi zhni ɓa wnu alu manai ya.”34Fye jezeɓe fya kwu lo əfyehni ací shi kwo gwo, jesnu fya kwu fa aleifyizhni ɓo; ntuge azaho lo ntna Shekwoyi yekpé; Mi da dəye fya wo vnyinkwo nu.Nayi kala la
35Ama əzaho ɓa nyaɓo, “A kwu azafyí kala n wunanu a? Ɓa ɓə ɓe fyi n knyi nayi pyai nu a?”36Amama aɓo! Ənya n fye bye kwo taa pa m, akpəge kwo la fyí kpa.37She fye bye, fye ta bye gnayi nu n kwo ɓa ɓe kwa gnyi nyi m, ama byegye nu ɓwasnu, kpesnu alikama kwo ənyado gbowo.38Ama Shekwoyi nu ga kwo gnayi ngye shi wo ncei dna nge wo ɓa ga kwo, jesnu n nyabye dəhodəhoi wo ga kwo əkwohni nayi.39Anayi vnyanya to zhni gbmanyigbmanyi nu m: Azanyikwoci n nayi ho pyai nu, anyafwanya n ədoi, alú n ədoi, jesnu abmya n ədoi nu.40Əshemi anayi lo jesnu anayi anyìmi nya lo; ama əshemi anayi bmyabmya n wu lo n əkwo ɓwai, jesnu anyìmi anayi bmyabmya n zhni dəho pya nu.41Nyipyei n bmyabmya ho pyai lo, əpya n ədohoi, jesnu akpasi n dəhoi; jesnu kpasi n wu gbowo n kpasi doi n bmyabmya.42Nlonu nu n kwo ɓə wu n əfyikalakwu sa. Nayi ń a bye kwo nyi kwo zhni bwobwoi nu, a ɓə la kwo kala dna ń tnabwobwo;43a bye kwo dna wyegbaci nu, a la kwo kala dna n latui; a bye kwo dna n kalagba nu, a la kwo kala dna n kalá:44a bye kwo dna n nayigəm nu, a la kwo kala dna n nayi zafnu nya.Ngye a n nayigəm nyai lo, a gye nayi zafnu nya lo ce.45Ntulonu a cei kafyilo: “Əza kpmisnuyi Adamwu ɓə la zè əza wyewyeyida”; Adamwu kpmasnui zafnu wyewyeyi ga yi.46Zafnunayi nu to ɓə ɓe n abye m, ama nayigəm nya, jesnu n əkwo avnu zafnunayi.47Əza kpmisnuyi ɓə zhni ɓwutukwnu nu əknyi nya; əzabaayi wo zhni əshemi nya nu.48Ngye shi əza anyì nya ɓə wu nyi, nlonu nu n aza n ɓa zhni anyì nya n wu lo; jesnu ngye shi əza əshemi nya n wu lo nyi, nlonu nu ce n aza n ɓa zhni əshemi anya n wu lo.49N ɓwasnu ngye shi yi fyi n dogbe əza anyì nya nyi, nlonu ce n yi ɓə fyi n dogbe əza əshemi nya.50Mi znuɓəya ga fye, əmi azaje azanugbai n anyikwozai, nge nayi n amii taa gyi Shekwoyi əbemi əgwú m, kwo ənya bwobwoi kwa gyi ənya n kwo taa bwo əgwú m.51Fye knatnubwa, mi gna fye asigyi ɓo: Yi to ɓə kwu wnagye vnyanya m, ama əyi vnyanya a ɓə la yi shnado;52n əsagbmanyii, n mwayi kpmaknayi byebyei, kwo ɓə wu para ngye əwye kpmatna. Ntuge a ɓə wo mwayi əɓwi, a ɓə kwu afyífyiyi kala ntna bwobwo, jesnu a ɓə la yi shnado.53Ntuge ɓəshishi nu ənya bwobwoi kwoi la zhni ənya tnabwobwoi, jesnu ənya fyifyiyi kwoi la zhni ənya tnafyifyiyi.54She a ɓə la bwobwoi zhni tnabwobwoi, jesnu ai la ənya fyifyiyi zhni tnafyifyiyi, nlonu n ɓəda n kwo kakpe nyi, kwo ɓə la zè gaiciya: “A la əfyi myi dna n nasalagyi.”55“O, əfyi, əho nasalagyi gnyi n nanu a?O, əfyi, əho zhnìzhnì gnyi n nanu a?”56Leifyi nu zhni əfyi zhnìzhnì, jesnu owa nu zhni leifyi kalá.57Ama amisa zhni Shekwoyi nya nu! Əwo nu ga yi nasalagyi dna n əyi Dagayi Yeisu Kirisiti.58Ntucenu, əmi azaje ayeyeyi azanugbai n anyikwozai, fye kwu myizhi. Fye to ye nyahonyahoi kwa shna fye ashna m. Ciici fye kwu əfyehni ga fyi n Dagayi tnutnu n nunui, ntuge fye kpəlo nge əfye tnutnu fyi n Dagayi kwo to zhni gbəloi nu m.
Biblica, Inc.