1 Akworentiyi10
Ɓəkwnukwnù n kwo kwnu n Israila nabagyiɓəpá
1Əmi azaje azanugbai n anyikwozai mi to ncei pmalo fya kwu zhi ntna ɓəye gənyikpe m, nge əyi azakwoyi vnyanya ɓə fyi n ənyì snuta nu jesnu əɓa vnyanya ɓa znazna fyi n shikwo nuwna yaakwo.2A ɓə kwu batizima zhni ɓa vnyanya fyi n Mwusa, fyi n ənyì ɓədo n shikwoi.3Əɓa vnyanya ɓə gyi zafnu nyagyi gbmanyigbmanyi nu,4jesnu ɓa sni zafnu nyasnisni gbmanyigbmanyi; ntuge ɓa ɓə sni nuwna n apmá zafnu nya nu n kwo ɓə kwnu lo n ɓai nyi, jesnu apmá yi ɓə zhni Kirisiti nu.5Dudulonu, aza bəgyé n ɓa, to ɓə zhni əɓo n kwo da Shekwoyi m: a ɓə la əɓa anayi gnamyiya fyi n zhabwikawu.6Nsaiye, aɓo ye ɓə zhni ɓa kwu zè aɓədogbe nu nabai to ya kwu əyi adu fyi n aɓo nukwoi m; ngye she ɓa ɓə ncei fyi nyi m7Fye to kwu zhni ashnagbayi ngye shi azaho n ɓa ɓə zhni nyi m, ngye shi kwo kafyilo: “Aza ɓə sase zhi ɓai gyi ɓai sni, jesnu ɓa kwukala zhi ɓa lofyi n nyanyakasa.”8Yi to zhni asisiɓo, ngye shi ɓa ɓə zhni nyi m, ń nyipyei gbmanyi aza adugwu-shiiba-ceata (23,000) n əɓa mi, ɓa kwu fyí.9Yi to mwi Kirisiti ngye shi azaho n ɓa, ɓə zhni nyi m, awa ɓa kwu ɓa wu.10Njesnu fye to da gwnunugwnunu, ngye shi azaho n ɓa ɓə da; njesnu maləka zawu nya wa wu ɓa nyi m.11Aɓo ye ɓə zhni ɓa ngye aɓədogbe nu, jesnu a ɓə ka ɓa zhi ngye ɓəkwnukwnù nu n əyi aba, aza n əsa kpmaknayi kwo la ɓe tu ɓa nyi.12Ntulonu, ngye fye zhninubwo lo nge fye gnyiagnyi zhi lo dəidəi, fye zhni pəceye nabai to fya myiya m!13Mwumwu ho too ɓe da əfye m, akpəge ədo pya n kwo ɓe da zanyikwoci dəhodəhoi. Njesnu Shekwoyi zhni gaiciyazhninunui nu; wo taa ye nge fye ɓwa mwumwu n du əfye kaláwyi m. Ama əsa n mwumwu kwa ɓe da fye, wo ɓa wu zokwo n fye ɓa kwnuya, nabai n fye ɓa kwu əmi fyi ntu əkwo ɓo.Ashna awyefna n Dagayi nyagyii
14Ntucenu, əmi anugwnudo ayeyeyi, fye shetusii n ashnagba.15Mi daɓo n aza agənyidai nu; fye zhni əɓonubwo n mi da nyi.16Bwoɓyi Shekwoyi amisa nya nu to n yi saami ncei n ɓwadodna n Kirisiti ami nyi m? Njesnu biledi nu to n yi saya n ɓwadodna n Kirisiti nayi m?17Ntuge biledi knana lo ɓwasnu gbmanyi nu, əyi, n yi mwa bəgyé lo nyi, yi zhni nayi gbmanyi nu, ntuge əyi vnyanya, yi gna biledi knana gbmanyi nu.18Fye pa Aisrailayi ɓo: aza n ɓa gyi nyagyi akwnukwnuii nyi, ɓa ta zhni ɓa dnaɓwado n bəgədi m?19Mi gna nu nge ashna nyagyi zhni nyaho nu, kwo nge əshna zhni nyaho nu?20Aawo, ama anyakwnukwnu n ashnagbayi kwnu nyi, ɓa ga ase nu, toge Shekwoyi m, jesnu mi to ncei pmalo fya kwu zhni aɓwadodnayi n asei m.21Fye taa sni bwoɓyi Dagayi nya ɓədo n bwoɓyi ase nyai m; fye taa dnaɓwa n Dagayi nyagyi fyaa əɓwa dna n ase nya ce m.22Yi ye ya la Dagayi shewo kala nu? Yi du wo lo nu n kala a?Loloya agaiciyagayi nya
23Fye da lo, “Mi ɓa myi ma zhni ɓəhoɓəhoi,” ama ɓəhoɓəhoi nu to n apmai lo m, “Mi ɓa myi ma zhni ɓəhoɓəhoi,” ama ɓəhoɓəhoi nu to n tukwoi gyilo m.24Zahozahoyi to ɓwa əwohni əɓo manai nu znashni m, ama əɓo manai azaje nya.25Gyi nyahonyahoi n a kwnu n abwu gnyikwo ntna aɓonya tukwovnyi nya,26ntuge, “Anyi zhni Dagayi nya nu, n nyahonyahoii n kwo dnalo n kwo.”27N tnavyiyi ho wa pa ho nyagyi gyi jesnu ho nyi cei pmalo ha lo, gyi nyahonyahoi n a shi n ho abye to hoi nyaɓo tukwovnyi nya m.28Ama n əzaho wa gna ho nge, “A kwu dəye ga n ashna,” nlonu to gyi kwo m. Ntu n əza ɓo n wa gna ho nyi jesnu ntu n tukwovnyi ɓo.29Mi da əzado tukwovnyi ɓo nu, toge əho nya m. Knyiyi nu ɓa zhni əzado tukwovnyi kwa da əmi loloya owa a?30Ngye ma gyi nyagyi ɓədo n amisai, knyiyi nu zhni ai na əmi aɓo ntu əɓo n mi kwu amisa Shekwoyi ntu n əkwo ɓo a?31Ntulonu kwo fyei gyi nyagyi, kwo fyei sni ənyasnisniyi kwo ɓəhoɓəhoi n fye ɓa zhni, fye zhni kwo vnyanya kwa ɓe Shekwoyi n latui.32Fye to zhni zahozahoyi wa cebwonyi m, kwo Ayahudiyi, kwo Agirikiyi kwo Shekwoyi Ikilisiya m;33n ɓwasnu shi mi zhniatna ma zhni əɓo kwa da zahozahoyi n zokwo dəhodəhoi. Ntuge mi ta zna əmihni agbmada nu shni m, ama agbmada azabəgye nya, nabai n ɓa ɓa myi ɓa ɓwa gnyignyi.Biblica, Inc.