Gogelelo19
1Ḋabolo de ngohi toise o kia naga moi maro o nyawa yadadala o sorogaka imanenere, <<Awalele! O Gikimoi Awi ronga posilamo. To ngone nanga Jou Una magena o nyawa wasisosalamati,Una lo wisimulia de Awi kuasa ilamo.2Sababu Una nako o dorou wafanggali de o sangisara magena,itiai de itero.Muna ami sundali ifofoloi genade o bi nyawa o duniaka o nyafusu ma dorou magaka,to muna magena amidorou asa Una de o sangisara wosifanggali ḋaboloka.De to muna ami dorou mangale to Una Awi sosulo-sosulo matotoomaka,so muna magenena asa Una womisangisara ḋaboloka.3Awalele! O Gikimoi Awi ronga posilamo. De o uku o kota ilalamo magena yatupuso ḋaukuka de ma ḋopo idola,gena itogu-toguwa.>>4Magena de o roriri yamonahalo de yaruha de lo o dodadi iooho ngai iha magena ibukuku de manga suba yatide o Gikimoika, Una o pareta ma kursika wotatamiye. De itemoli, <<Wewe! O Gikimoi Awi ronga posilamo. Una magena powigiliri igogou.>>5De kagena o pareta ma kursino o ili ilalamo moi itemo, <<He! Ngini o Gikimoi Awi sosulo-sosulo,bai ikakaya bai lo isususa,ningodu gena Una niwihohoromatihika Una Awi ronga nisilamo.>>
Awi kawi ma rarame
6Ḋabolo de ngohi toise kali o ili moi koloko o nyawa yadadala manga ili, eko o selera ma ake de ma deneta ma kuguru, eko lo o diwotu ilalamo ma dupuru, gena itemo, <<Hika! O Jou Gikimoi Awi ronga posilamo,sababu Una Wokokuasa de lo o nyawa yangodu wakolano.7Hino la ngone gena nanga siningaka cawali o nali de o moreka ka Una magena powisigiliri de powisihoromati.Sababu o Duba ma Goho Awi kawi ma wange he yaadokade lo ma peḋeka momasidailako ḋaboloka.8Muna gena o Gikimoi womisimahala o baju lenan ḋaaare de ma are isiru-siru aku magena momasitiba.>>(O baju lenan ḋaaare ma ngale ona gena o Gikimoi Awi nyawa masirete o bi moi-moi itotiai yaaaka.)9Ḋabolo de o malaikat moili wotemo ngohika, <<O nyawa la kanaga yakoro de yahino o Duba ma Goho Awi kawi ma rarameka, ona magena igogou de manga sininga isosanangi. Magena hika nalefo. O demo magena ka igogou o Gikimoi Awi demo.>>10So kagena de ngohi asa to una awi simaka tobukuku la ai suba tatide unaka. Duma una wosibicara wotemo ngohika, <<Upa! Ngohi gena ka to ngini nia dodiao moi o Gikimoi Awi sosulo, imatero maro ngona de lo ani dodiao ona o habari ma ngale o Yesus Kristus yosihohabari. So tanu ka o Gikimoi Una magenaka asa ngona nosuba. Sababu o bi nabi ona yangodu lo, bai o orasi manena bai o orasi ipapasaka, ma ngale o Yesus Awi dodoto itotiai gena yosingangasu ḋaboloka.>>o haiwani ilalago imatekekudoti
11De kagena de ngohi takelelo o gogelelo moili tamake kali o soroga ma ngora ipelenga. Kanaga o jara ḋaaare moi de kugena wopapaneku, Una magena wisironga Una Wotetero de Wototiai so aku wipiricaya. Una wahiri itiai o nyawa manga loha de manga dorou ma sopo wafanggali de o loha eko de o sangisara, de lo nakoso o kudoti ma rabaka, o kia naga itiai magena lo Una waaka.12Una Awi lako gena isora-sora maro o uku ma sora. Awi saheka o mahkota idala, de Una Awi roheka yalefo o ronga moi, duma Awi ronga magena o nyawa nagoona lo yanakowa, ka cawali Una masirete.13O juba Una womasititibaka gena yatono kasi o auku. Una wisironga lo o Gikimoi Awi Demo.14Una o Gikimoi Awi prajurit-prajurit gena wimomote so ona o bi jara ḋaaareku yopane de imasitibaku o baju lenan ḋaaare, gena ma are ka isiru-siru.15Una Awi uruno isupu o sumarangi moi ḋadodoto la ma ngale o bi nyawa Una wihoholu ona yangodu asa watooma. Una manena de Awi kuasa foloisi ilamo so asa ona wakolano wasidipito de lo o bi nyawa ma dorou wasisangisara. O Gikimoi Awi doosa foloisi ilalamo o nyawa ma dorouka, gena maro o anggur yateteho ma riho ma dodopusa wotagi so wosidodipitoku.16So to Una Awi jubaka de lo Awi uguka kanaga yalefoka o ronga moi, ena gena, O Jou Wilalamo de o Kolano Wokokuasa.17Magena de ngohi takelelo kali o malaikat moi kanaga womaokoye kagena o wangeka. De una magena asa woaso womaili-ilika o bi namo isososo ḋangoduka wotemo, <<He! Niahinosi la nimatolomuno o Gikimoi to Una Awi oḋo ma rarame ilalamoka.18Niahino niaoḋo isosone ona yangodu manga lake, komagena lo o bi kolano isosone manga lake de lo o bi kapita, o bi nyawa ikudoti yapoputuru, o bi jara de ma nyawa ipapane, bai ikokuasa bai lo ikokuasawa, bai igogilalo bai lo igogilalowa ona magena yangodu.>>19De ngohi takelelo kali kanaga o haiwani ilalago magena, de o bi kolano o duniaka, de lo to ona manga prajurit-prajurit ona yangodu imatolomuka la ma ngale yokudoti de iwilawangi Una magena o jara wopapane de to Una Awi prajurit.20Kagena de asa o haiwani magena de lo o nabi wokokulai ona magena yatagoka. O nabi wokokulai gena una o nonako ihahairani o haiwani magena ma simaka waakaka. Komagena o bi nyawa o haiwani ma nonako yamamake de lo o giki yatotulada yasusuba ona magena yakulaika. So o haiwani de lo o nabi ona magena asa Una o jaraku wopapane ka waumo o uku ma talaga ma rabaku la yatupu de o walira.21De lo ona manga prajurit-prajurit magena asa watooma de to Una Awi sumarangi Awi uruno isusupu. So kagena de to ona manga sone de manga lake o bi namo ḋangodu yaoḋoka.The Seed Company