1 Qorontos15
Duʼaa Kaʼuu Al-Masiihii
1Ammas yaa obboloota, ani waaʼee injiila ani isinitti lallabe, kan isin fudhattanii ittiin dhaabatan sanaa isin yaadachiisuu nan barbaada.2Isin yoo dubbii ani isinitti lallabe sana jabeessitanii qabattan injiiluma kanaan ni fayyitu. Yoo kanaa achii akkasumaan amantan jechuu dha.3Anis waanan fudhadhe duraan dursee dabarseen isinitti kenneeraatii; akka Katabbiiwwan Qulqulluun dubbatanitti, Al-Masiihiin cubbuu keenyaaf jedhee duʼe;4ni qabbarames; akka Katabbiiwwan Qulqulluun dubbatanitti guyyaa sadaffaatti duʼaa kaafame.5Inni duraan dursee Keefaatti, ergasiis warra Kudha Lamaanitti mulʼate.6Sana booddee yeroo tokkotti obboloota dhibba shanii ol taʼanitti mulʼate; isaan keessaas yoo muraasni boqotan iyyuu hedduun isaanii hamma ammaatti ni jiru.7Ergasiis Yaaʼikuubitti, itti aansee ergamoota hundatti mulʼate;8dhuma irratti immoo ana kan akka gatataatti dhalateetti lakkaaʼamutti mulʼate.9Ani ergamoota hundaa gadi; ergamaa jedhamee waamamuun iyyuu naaf hin malu; ani waldaa kiristaanaa Allaaha ariʼachaan tureetii.10Garuu ani ayyaana Allaahatiin akkuman jiru kana jira; ayyaanni isaa kan naa kennames akkasumaan hin hafne. Ani hunduma isaanii caalaa jabaadhee hojjedheera; kanas utuu ana hin taʼin ayyaana Allaaha kan na wajjin jirutu hojjete.11Egaa anas taʼu yookaan isaan, wanni nu lallabnu, wanni isin amantanis kanuma.Duʼaa Kaʼuu Warra Duʼanii
12Al-Masiihiin warra duʼan keessaa akka kaafame erga lallabamee, isin keessaa namoonni tokko tokko akkamitti duʼaa kaʼuun warra duʼanii hin jiru jechuu dandaʼu ree?13Erga duʼaa kaʼuun warra duʼanii hin jirre, Al-Masiihiin iyyuu duʼaa hin kaafamne jechuudha kaa!14Erga Al-Masiihiin duʼaa hin kaafamin immoo lallabni keenya faayidaa hin qabu; amantiin keessanis faayidaa hin qabu.15Kana malees Allaahan Al-Masiihii duʼaa kaaseera jennee waaʼee Allaaha waan dhugaa baaneef, nu waaʼee Allaaha dhuga baatota sobaa taanee argamneerra. Garuu erga warri duʼan hin kaafamin inni Al-Masiihii hin kaafne jechuu dha.16Yoo warri duʼan kaafamuu baatan, Al-Masiihiinis duʼaa hin kaafamneetii.17Erga Al-Masiihiin duʼaa hin kaafamin amantiin keessan faayidaa hin qabu; isinis ammuma iyyuu cubbuu keessa jirtu.18Yoos warri utuu Al-Masiihiidhaan jiranuu boqotan baduu isaanii ti.19Yoo jireenya ammaa qofaaf Al-Masiihii abdanne nu warra namni hundi naʼuuf taʼuu keenya.20Amma garuu Al-Masiihiin warra boqotaniif hangafa taʼee dhugumaan warra duʼan keessaa kaafameera.21Akkuma duuti karaa nama tokkootiin dhufe, akkasuma immoo duʼaa kaʼuun warra duʼanii karaa nama tokkootiin dhufeetii.22Akkuma hundinuu Aadamiin duʼan, hundinuu Al-Masiihiin jiraatoo ni taasifamuutii.23Kun hundinuus yeroo dabaree isaatti ni taʼa; Al-Masiihi hangafticha, ergasii immoo yeroo inni deebiʼee dhufutti warra kan Al-Masiihii taʼan.24Innis erga bulchiinsa hunda, taayitaa fi humna hunda balleessee booddee, yeroo Allaah Abbaatti mootummaa dabarsee kennutti dhumni ni taʼa.25Inni hamma diinota isaa hunda miilla isaa jala galfatutti moʼuu qabaatii.26Diinni dhumaa kan barbadeeffamuu qabu duʼa.27Inni, “Waan hunda miilla isaa jala galcheeraatii.” Garuu “Wanni hundi” isa jala galfameera jechuun akka isa waan hunda isa jala galche sana hin dabalatin beekamaa dha.28Erga waan kana godhee booddee akka Allaahan waan hundumaan hundumaa taʼuuf Ilmi mataan isaa iyyuu isa waan hundumaa miilla isaa jala galche sanaaf ni bula.29Yoo duʼaa kaʼuun jiraachuu baate namoonni warra duʼaniif jedhanii cuuphaman maal gochuu isaanii ti? Warri duʼanis yoo duʼaa hin kaafamin namoonni maaliif qooda isaanii cuuphamu ree?30Nu maaliif saʼaatii hunda balaaf of saaxilla?31Yaa obboloota, ani guyyuma guyyaan akkan duʼu of jajuu karaa Gooftaa keenya Al-Masiihii Iisaatiin isin irratti qabuun nan kakadha.32Ani akka namaatti Efesoonitti bineensa wajjin wal loluun koo, erga warri duʼan hin kaafamnee, maal na fayyada?“Kottaa ni nyaannaa; ni dhugnas;bor ni duunaatii.” 33Hin gowwoomfaminaa: “Hiriyaan hamaan amala gaarii balleessa.”34Gara qalbii keessan isa qajeelaatti deebiʼaa; cubbuu hojjechuus dhiisaa; namoonni Allaah hin beekne tokko tokko isin gidduu jiruutii. Anis isin qaanessuufin waan kana dubbadha.Dhagna Duʼaa Kaʼuu
35Garuu namni tokko, “Warri duʼan akkamitti kaafamu? Dhagna akkamiitiin dhufu?” jedhee ni gaafata taʼa.36Yaa gowwaa! Wanni ati facaaftu yoo duʼe malee jireenya hin argatu.37Wanni ati facaaftu sanyiidhuma, jechuunis sanyii qamadii yookaan sanyii midhaan biraati malee dhagna midhaan biqilee guddachuuf jiru sanaa miti.38Allaahan garuu akkuma fedhetti dhagna isaaf kenna; tokkoo tokkoo gosa sanyiitiifis dhagna mataa isaa kenna.39Foon hundinuu tokko miti; namni foon gosa tokkoo qaba; horiin foon gosa biraa, simbirroon foon gosa biraa, qurxummiinis foon gosa biraa qabu.40Akkasuma immoo dhagnawwan shamaayʼun irraa ni jiru; dhagnawwan lafa irraas ni jiru; garuu ulfinni dhagnawwan shamaayʼun irraa gosa tokko; ulfinni dhagnawwan lafa irraa immoo gosa biraa ti.41Aduun ulfina gosa tokkoo qabdi; jiʼis ulfina gosa biraa, urjiiwwanis ulfina gosa biraa qabu; urjiin tokko ulfinaan urjii biraatiin addaatii.42Duʼaa kaʼuun warra duʼaniis akkasuma. Dhagni facaafamu kan baduu dha; kan hin badne taʼee immoo kaafama.43Inni salphinaan facaafama; ulfinaan kaafama; dadhabbiin facaafama; humnaan kaafama;44dhagna fooniitu facaafama; dhagna hafuuraatu kaafama.Erga dhagni foonii jiraate, dhagni hafuuraas ni jira.45Kanaaf, “Aadam namichi jalqabaa lubbuu jiraataa taʼe” jedhamee barreeffameera; Aadam inni dhumaa immoo hafuura jireenya kennu taʼe.46Inni jalqabatti dhufe garuu isa hafuuraa utuu hin taʼin isa foonii ti; inni hafuuraa immoo ergasii dhufe.47Namichi duraa lafa irraa dhufe; inni kan lafaa ti; namichi lammaffaan immoo shamaayʼun irraa dhufe.48Warri kan lafaa taʼan akkuma namicha lafa irraa sanaa ti; warri kan shamaayʼun taʼan immoo akkuma namicha shamaayʼun irraa dhufe sanaa ti.49Nu akkuma bifa namicha lafaa sanaa uffanne, akkasuma immoo bifa namicha shamaayʼun sanaa ni uffanna.50Yaa obboloota, akka foonii fi dhiigni mootummaa Allaaha dhaaluu hin dandeenye yookaan akka inni badu isa hin badne dhaaluu hin dandeenye ani isinitti nan hima.51Kunoo, ani icciitii tokko isinittin hima: Hundi keenya hin duunu; nu hundi garuu ni geeddaramna;52kunis yeroo malakanni dhumaa afuufamu yeruma sanatti hamma liphsuu ijaatti raawwatama. Malakanni ni afuufamaatii; warri duʼanis kanneen hin badne taʼanii ni kaafamu; nus ni geeddaramna.53Inni badu kun isa hin badne, inni duʼu kun immoo isa hin duune uffachuu qabaatii.54Yeroo inni badu isa hin badne uffatee, inni duʼu immoo isa hin duune uffatutti dubbiin akkana jedhamee barreeffame sun ni raawwatama; “Duuti moʼichaan liqimfameera.” Akkasumas,55“Yaa duʼa, moʼichi kee meerre?Yaa duʼa, ilkeen kee meerre?” 56Ilkeen duʼaa cubbuu dha; humni cubbuu immoo seera.57Allaah karaa Gooftaa keenya Iisaa Al-Masiihiin moʼicha nuu kennuuf garuu galanni haa taʼu!58Kanaafuu yaa obboloota koo jaallatamoo, jabaadhaa dhaabadhaa. Wanni tokko isin hin sochoosin; akka dadhabbiin keessan Gooftaa biratti faayidaa malee hin hafne waan beektaniif yeroo hunda hojii Gooftaatiif guutummaatti of kennaa.
Biblica, Inc.