1Eji ejahbe Isreel kpee ma siiri aya mao ma Jodan mal, owo Jehova kehm bungu tong Josua re,2<<Yehke ewubu aneblum abal, go ellong ane baa, nne awohng awohng go etˈtohngo.3Tong ane bao, bo song rod ewubu atal abal, go yefono edi jio ji abalimajom yiimi no, go elka efabe aya ma Jodan, song bum go edi ji e bahke reke ekv atv ma lela.>>4Josua kehm lungu ewubu ane abal, ba á ma yehke, nne awohng awohng go etˈtohngo,5kehm bungu tong bo re, <<Songen go efabe ji Jodan, esꞌsong bi elkohl atahm ni Esowo yim no, wahn song rod, no nne eltal anehng kunu ekpakebahk, etˈtohngo ajehng ajehng rod eltal anehng anehng,6bahke jolo ejum elliingi go egahne ellong. Go ngare esˈsong, abon ebahne lˈbahb-n re, <Atal nyaa lohngo jen?>7Ḿ bahke tongo bo re, aya ma Jodan kimi ekpidi ebbal. Atal nyaa bahke jolo ejum elbuumu ka anebe Isreel, ngare kpe kpe.8Owo anebe Isreel kehm limi ana Josua ka bo elkahn. Bo yehke ewubu atal abal go elka efabe ji Jodan, jang jang ana nfange atˈtohngo nya Isreel li no, ana Jehova ka Josua elkahn. Bo solo song bum go edi ji bo jo re ekv atv mao, owo bo bumu atal nyao.9Josua fvfo tob lo ewubu atal abal go elka efabe aya ma Jodan, go edi jio ji abalimajom ba solo elkohl atahm ni Esowo yiimi no. Li o tete rehng efung bi lela.10Abalimajom ba solo elkohl atahm ni Esowo yiimi go elka efabe aya Jodan tete ane lim nsol kpee nyi Jehova ka Josua elkahn, ana Mosis tibi Josua. Ane jene elwaare siiri aya,11eji nne awohng awohng ma siiri rehng go egbuk jehko, owo abalimajom tob siiri, a elkohl atahm ni Jehova, ga ane kpee yiimi jꞌrii jo seenge.12Aneblum ba etꞌtohngo ji Ruben a ba Gad, a ejang etꞌtohngo ji Manase tob siiri aya a nsol ebta ebo go ebo abo. Bo gbo anebe Isreel mbang, ana Mosis ka bo elkahn.13Atahntahn ane baa jolo ane atahltahl nkpel atahl alon (40,000), bo siiri aya song rehng go emahng ji Jeriko ji li ebal ebal re bo song nok ebta, fvfo Jehova jolo a bo.14Efung bio Jehova mehle Josua wahre go esamahr bi Isreel kpee. Israel ka Josua ekpunu tete á kpo, ana bo ka Mosis.15Owo Jehova kehm bungu tong Josua re,16<<Ka abalimajom ba solo elkohl Ntianse elkahn re bo lohng go efabe aya Jodan, ba ga egbuk.17Josua kehm kake abalimajom elkahn re, <<Lohngen go efabe aya Jodan, wahn ba yiimi ga egbuk.>>18Abalimajom kehm lohngo a elkohl atahm ni Jehova ni bo solo no. Ana bo kpˈlohngo go efabe alahb akpade bo ba rehng egbuk, ano wo alahb ma Jodan kpe kehme elfabe, yel rehng egbuk ana wuku wuku.19Nfung ewubu nyi ngbokambanga nnyahng, owo anebe Isreel siiri aya ma Jodan, bo bumu edi erekekv go Gilgal ji li nkonandi nyi Jeriko, ero nfam.20O Gilgal wo Josua lange ewubu atal abal nya bo yehke go elka efabe aya ji Jodan.21Josua kehm bungu tong anebe Isreel re, <<Ngare esˈsong, abon ebahne bahke bahbe babnde re, <Atal nyaa lohngo rejen?>22Tong bo re, <Anebe Isreel siiri efabe Jodan go ewumwum ndi.>23Tibre Jehova, Esowo ebahne, ye wo limi aya ma Jodan ka go egahne esamahr, tete wahn siiri sehng. Jehova Esowo ebahne limi aya ma Jodan, jang jang ana á limi go aya nkpafa, eji á limi no ka egahre esamahr tete e siiri sehng.24Á limi jia eji ane ba njini kpee lˈkahn re ebo bi Jehova kpi nsahm, á tob limi eji wahn fvfo lˈtob jo fahl Jehova ji li Esowo ebahne go njinanjini.>>