Read Hibru 3

Hibru3

Jisos wo ga gbal sehnge Moses

¹Abarebare abonanee ba Esowo ma-n tob lung, jo seengen Jisos ji li ntiingetib, a ntubesi abalimajom no e kpo yiimi ntianse ka-e. ²Á bele ekakesehk, taame tv nne no yehk-e no kak go eltum ene, jang jang ana Moses bele ekakesehk go eltum kpee ni á jo lim go etahk Esowo.³Jisos wo fuumu re á ga bel ellub sehnge Moses, jang jang ana nne no si etahk ga kpi ellub sehnge etahk ji á si no.⁴Tibre etahk ajehng ajehng nne wo sii. Wo, Esowo bi li nne no limi nsol kpee.

⁵Moses bele ekakesehk go eltum kpee ni á jo lim go etahk Esowo, ye ji jolo nlokeltum, eji á lꞌyiimi ntianse ka nsol nyi Esowo bahke bungu go ngare esꞌsong.⁶Wo, Kraist bele ekakesehk go eltum ni á limi go ege etahk, ye ji jolo mmon. Etahk eje jio, wahr ba, e lꞌyiimi tꞌtahne go esahb, a elgeere ni e kpꞌgeere kak nsol nyi e kpꞌkunu ekpu tete rehng go esꞌkohro.

Jo kunen ekpu, eji ń lꞌkꞌ yake Esowo abo

⁷Ana Etingi Etohko bungu re,“Ń lꞌwuk alum enye lela,⁸kana tahne asi enyahne ana babnso ejahne limi noefung elgaare bio bi bo ten-m no go elka emahng.⁹Go wo bo wuung-m no,jol eji bo nyehne nyehn nsol nyi n limi go nnya atahl abal.¹⁰Ano wo wahng ka atahng rak-m no tob ane bao,n kehm bungu re,‘Bo kpo kono elsoodo go bo a ntir atahng.Bo ka tiki kahn mbang enyame.’¹¹Owo n kehm tiri go egame erakatahng re,‘bo nehm tiki yel go egame edi erekekv.’ ”

¹²Abonanee, jo kunen ekpu, eji nne awohng awohng ewahne lꞌkꞌbel ebi eltim ni á kil taame, toono o, á sennge Esowo bi kpi elkpin njahm.¹³Jo rehken atemtem efung abehng abehng, eji ngare kpeke li nyi bo kpo lung re, “lela”, eji nne awohng awohng ewahne lꞌkꞌtahne esi tib go elnehme ni abiafem kpo nehm ane.¹⁴Wahr ebjol ane ba kpꞌkodo eljen a Kraist, e lꞌjabb-e tꞌtahne, fere bum-e go etingitingi tete rehng go esꞌkohro, ana e bomo go mbomo,¹⁵ana nwer Esowo bungu no re,“Ń lꞌwuk alum enye lela, kana tahne asi enyahne, ana babnso ejahne tene Esowo mahne.”

¹⁶Anv, elkohn ane aba wuku alum Esowo, fere ten? Ane kpee ba Moses yehke bo go Ijib sanga? ¹⁷Anv, ane aba Esowo rake atahng tob bo go nnya atahl abal? Ane ba limi abiafem, fere kpo go elka emahng sanga?¹⁸Anv, ane aba Esowo tiri re, bo nehm tiki yel go ege edi erekekv? Ane ba ki taame sanga?

¹⁹Wahr ebnyehn re, bo maam yel tib go bo ekꞌtaame.