VALOMA8
1Ndeni, nondee kwihela lihigo kwa vala vanu vevawungine na Kilisito Yesu.2Kwakuva, malagilicho lwa Muhe yeiletela uwumi kwa kwiwunga na Kilisito Yesu, inivikile pekesu mululagilicho lwa sambi na kufuwa.3Kwakuva, Nguluvi akagitile lukani lula, ambalyo malagilicho seliwesile kuligita, kwakuva lya usosovafu va vanu. Nguluvi akamlagiliche Mwana vake akiva na mvili wiuwana na mvili vetu nefwe vene sambi, neke aihige sambi na kwa mvili ugo akaihanangile sambi.4Nguluvi akagitile ndeni neke tuwese kwikala ngita malagilicho peikela, ila nondee tuwesa kwikala ndeni kwa kulongochwa na ludali lwa Muhe va Nguluvi na sekwa kukovekela ludali lwa mvili va munu.5Kwakuva, vanu vevakwikala kwa kukovekela mvili pewisaka, avo mahocho gyawo gilongochwa kwa gala gegisaka mvili. Ila vala vevakwikala kwa kukovekela Muhe va Nguluvi pewisaka, avo mahocho gyawo gilongochwa na Muhe va Nguluvi.6Vanu vevilongochwa na mahocho ga mvili giletela kufuwa, ila vanu vevilongochwa na Muhe va Nguluvi giletela uwumi na lutengamaso.7Kwakuva, munu yealongochwa na mahocho ga mvili ndi mchundwama va Nguluvi, seadikila malagilicho ga Nguluvi na kwa undakyene seivesa kudikila.8Vanu vevadikila gala mvili gewisaka, sevawesa kumkelesa Nguluvi.9Ila nyenye ngita Muhe va Nguluvi akikala mugati lyenu dasemudikila gala mvili gewisaka, ila damudikila Muhe va Nguluvi, ngita munu yeyonda seyeivecha na Muhe va Kilisito, uyo seva Kilisito.10Nondee, Kilisito akwikala mugati lyenu. Ata ngita mivili gyenu gifuwa kwakuva lya sambi, suwe, Muhe va Nguluvi akuvagavila uwumi kwakuva Nguluvi avagitile mudikilwe pautalo lyake.11Ikiva Muhe va Nguluvi yeamchulubuche Kilisito akwikala mugati lyenu, suwe uyo yeamchulubuche Kilisito na mwene daakuigavila uwumi mivili gyenu gegifuwa. Daigita ndeni kuchumbila Muhe vake yeikwikala mugati lyenu.12Suwe, vakolo vangu, nefwe setwing'ang'a kangi kwikala kwa kulongochwa na ludoboko cha mivili gyetu.13Kwakuva, mukikala ngita mvili peing'ang'a, ndakyene damfuwa. Ila ngita mukikala kwa kulongochwa na Muhe va Nguluvi, damuvecha wumi.14Kwakuva vonda vevalongochwa na Muhe va Nguluvi ndi vana va Nguluvi.15Kwakuva, Muhe yemugavilwe na Nguluvi seivakuvagita nyenye muveche vasutu na kuvagita muwogofye, ila Muhe va Nguluvi akuvagita muveche vana va Nguluvi na kwa umwimike va Muhe uyo nefwe tukumkemela, “Aba!” Mana lyake Daada!16Muhe va Nguluvi yumwene ilonga ndakyene pamwi na muhe chetu kuva nefwe ndi vana va Nguluvi.17Kwakuva, nefwe ndi vana vake, ndeni nefwe datuwanuka finu finofu kwa Nguluvi, datuwanuka pamwi na Kilisito, ngita petugudile pamwi na mwene, ndeni ndeni datukwikala na mwene muukomi vake.18Kwakuva, magudo gyendigudika nondee sekinu na segiwana na gala Nguluvi geatuvikile, ambago datugubututuliwa kwa nefwe.19Finu fyonda fyefiwumbilwe, fichindila kwa ludoboko ngoni, pala Nguluvi daakuvawonesa wachi vana vake.20Kwakuva, kila kinu kyekiwumbilwe na Nguluvi akakilekile kiveche na mapungufu gake, finu ifyo sefisakile fyene kuvecha ndeni, ila Nguluvi akalekile gahumile ago kwakuva lya luhuvililo lya kukomboliwa neke fibihile kuhanangilwa.21Kangi finu ifyo fyefiwumbilwe fichindila kigono kya kwiwunga pamwi na vana va Nguluvi muupekesu ukomi va kuhuma mukufuwa na kuhanangilwa.22Kwakuva, tuchela kuva mbaka nondee, finu fyonda fyefiwumbilwe fing'ung'ulika kwa matuno ngita uvafi lwa kubaba mwana.23Sefiwumbe hela, ila ata nefwe yetugehe na Muhe va Nguluvi, yeagehe va kwanja mufupo cha Nguluvi, nefwe ndeni ndeni twing'ung'ula kwa mugati, kuno tuchindilila kugitwa kuvecha vana va Nguluvi na kukombolwa na kugalambula mivili gyetu.24Kwakuva, tukombilwe muluhuvililo ulu. Ila ngita datulola luhuvililo ulo, baho kwihela luhuvililo. Wuli, yeani yeihuvilila kinu kyekiwene?25Ngita tuhuvilila kila kinu setukilola, suwe tukihuvilila kwa luchindilo.26Ndeni ndeni, Muhe va Nguluvi akututanga muusosovafu vetu. Kwakuva setuchela kumsuka Nguluvi ngita peing'ang'wa. Ila Muhe va Nguluvi yumwene akutusukila kwa Nguluvi kwa kung'ung'ula seiwesa kulongeka.27Na mwene Nguluvi yealola mbaka mugati lya numbula cha vanu, ichela Muhe vake kyekihocha, kwakuva Muhe akuvasukila vanu va Nguluvi ngita peikela Nguluvi.28Twichela kuva, mufinu fyonda, Nguluvi igita gyonda gaveche manofu kwa vanu vala yevakumkela na vala vevakemilwe, ngita mwene peakeliye.29Kwakuva, vanu vale Nguluvi akavachele kuhuma dahila, akavahagule vawane na Mwana vake, neke Mwana uyo aveche mwana mlongola va vana va Nguluvi.30Ndeni, vala yevahaguliwe na Nguluvi, akavakemeliye na vala yevavakemele akavagitile vadikilwe pautalo lyake na vala yeavadikilwe pautalo lyake akakala navo pamwi muukomi vake.31Munjowo ichi, nondee tulonge liki? Ikiva Nguluvi agehe lubali lwetu, ani yeiwesa kutupinja?32Nguluvi seamuwonela lusungu ata Mwana vake vaweka, ila akamuhechile Mwana vake neke afuwe kwakuva lya nefwe vonda, suwe, ndakyene datugavila kangi finu finofu fyonda.33Ndi ani, yeakuvalata vanu vevahaguliwe na Nguluvi? Nguluvi yumwene alongile kuva vahela nongwa!34Ndi ani daakuvahiga nongwa? Kwahela! Kwakuva Kilisito Yesu akachulubuke kwakuva lya nefwe na akwikala lubali lwa ndewo lwa Nguluvi, akutusukila kwa Nguluvi!35Ani yeawesa kutunenga na lukelo lwa Kilisito? Wuli, magudo, utumama, utatala, njala, ufula, fita awu kufuwa?36Ngita masimbo ga Nguluvi pegilonga, “Kwakuva lyako, vanu vigecha kutudocha pamiye na pamunyi, vakutulola ngita kondolo vevihinjwa.”37Ila munjowo chonda nefwe tuwesile, kuchumbila mwene yeatukela.38Kwakuva, kwa ndakyene ndichela, kwihela kinu kyekiwesa kutunenga na lukelo vake, sekufuwa vala uwumi, sevandumindumi va kuluhano kwa Nguluvi awu mihoka gegigehe na ludali, vala semakani gigituhumila nondee vala semakani gegikwacha,39vala makani ga inyi gegagehe kukyanya vala makani ga inyi gegagehe panyi, vala kiweumbe kyokyonda, kyekiwesa kutunenga na lukelo lwa Nguluvi lweugehe mugati lwa Kilisito Yesu, Mtwa vetu.
The Word for the World International