VALOMA4
1Suwe, tulonge kinu liki kutigila daada vetu Ibulahimu? Akachele wuli munu peakudikilwa pautalo lya Nguluvi?2Ngita Ibulahimu akali adikilwe pautalo lya Nguluvi kuhumila na magito gake, suwe, anakyo kinu kya kwidumbila ila se pautalo lya Nguluvi.3Masimbo ga Nguluvi gilonga, “Ibulahimu akamdikile Nguluvi, ndeni akadikilwe pautalo lyake.”4Munu peigita kasi, seihombwa ngita fupo ila ihombwa kinu kyeing'ang'wa kuhombwa.5Ila munu yeseihuvila magito gamwene, ila akumdikila Nguluvi yeakuvahechela vanu sambi chawo, suwe, Nguluvi akuilolela ludikilo lwa munu uyo na kumgita msanzi pautalo lyake.6Dawudi akalongile njowo ichi ichi, pealongile ndi lukeduko kwa munu yula yeagitilwe na Nguluvi kuva msanzi ngajila kulolela magito gyawo,7“Vafunyilwe vala yevahechilwe nongwa chawo, ambavo sambi chawo chihechilwe.8Vafunyilwe munu yula, ambalye Nguluvi seiviwuka sambi chake!”9Wuli, lufunyo ulu ndi kwa vala Vayawudi vevadumulwe bina hela awu ata kwa vala se Vayawudi sevadumulwe bina? Kwakuva tukalongile suwe, “Ibulahimu akamdikile Nguluvi na mwene akamgitile msanzi pautalo lyake.”10Wuli, Ibulahimu akadikilwe pautalo lya Nguluvi pandili? Peadumilwe bina awu peave kudumulwa bina? Akadikilwe kuva msanzi pautalo lya Nguluvi ngajila kudumulwa bina.11Ibulahimu akadumulwe bina pambele na kudumulwa bina kwa mwene ikali kimanyilo lya kuwonesa kuva Nguluvi amdikile kuva kwakuva lya ludikilo lwake ngajila seadumilwe bina. Ndeni Ibulahimu ndi daada kwa vala vonda ata ngita sevadumulwe ila vakamudikile Nguluvi navo vakadikilwe na Nguluvi.12Ndeni ndeni, Ibulahimu ndi daada va vevadumulwe bina muludikilo, ikiva vakumudikila Nguluvi. Sevavecha daada vawo kwakuva vadumulwe bina, ila ndi daada vawo kwakuva vamudikile Nguluvi ngita peagitile mwene, pala peave kudumulwa bina.13Nguluvi akavikile jangi kwa Ibulahimu na ulelo vake, kuva inyi yonda daivecha lyake, sekwakuva Ibulahimu akagitile ngita malagilicho peing'ang'a, ila kwakuva amudikile Nguluvi na Nguluvi akamudikile kuva msanzi pautalo lyake.14Kwakuva ngita gala geajangile Nguluvi davapata vala hela yevakolele malagilicho, suwe, kumudikila Nguluvi se kinu na gala geajangile Nguluvi dasevecha kinu.15Malagilicho ga Nguluvi ileta luvipo kwa Nguluvi ila ngita kwihela malagilicho, daiwesekana kudenya malagilicho.16Kwa ndeni, ijangi ilyo ihuvilila ludikilo, ndeni ujangi lulo ihumila na usangi va Nguluvi na ndakyene kuva ijangi lulo ndi kwa vanu vonda, ila se kwa vala vevikwikala kwa kukolela malagilicho, ila ndeni kwa vala vevakwikala kwa ludikilo ngita Ibulahimu. Mwene ndi daada vetu vonda,17ngita masimbo ga Nguluvi pegilonga, “Ndikuhaguwe uveche daada va vanu va inyi chongofu.” Mwene ndi daada vetu pautalo lya Nguluvi yeamdikiye. Nguluvi yeakuvagavila uwumi vanu vevafuwe na kwa malagilicho gyake finu fyefikali kwihela, dafigehe.18Ibulahimu pealongilwe njowo icho, ikali ikagangafu kuchidikila, ila akaendelela kudikila na kuhuvilila, kuva Nguluvi dakumgita aveche daada va vanu va inyi chongofu, kwakuva Nguluvi akali amulongile Ibulahimu, “Dauvecha na vilelo volofu ngita nondwa!”19Chipindi icho Ibulahimu akali mgogolo va myaka gyake ikali ngita miya yimwi, akali ichela kuva mvili vake ukali ngita ufuwe, ndeni ata mdala vake Sala akali mugumba. Ila Ibulahimu seakalikile kumudikila Nguluvi.20Ibulahimu akali ihela uwogofi na yila jangi lya Nguluvi, akaendelela kuvecha na ludali muludikilo lwake, ndeni akamnjumile Nguluvi.21Ibulahimu akachele kwa undakyene kuva Nguluvi iwesa kugagita gala gyeajangile.22Ndeni Ibulahimu kwa kumdikila Nguluvi, “Nguluvi akamudikile kuva Ibulahimu ndi msanzi pautalo lyake.”23Njowo ichi, “Akagitilwe kuva msanzi pautalo lya Nguluvi.” Sechisimbilwe kwa Ibulahimu hela,24ila pamwi na nefwe twetumudikile Nguluvi yeamchulubuche Mtwa vetu Yesu.25Yesu akahecheliwe adochwe kwakuva lya sambi chetu, baho akachulubuchwe neke tudikilwe kuva vasanzi pautalo lya Nguluvi.
The Word for the World International