VALOMA10
1Vakolo vangu, numbula lyangu idobokela hilo na ndikumsuka Nguluvi kuva Vaisilaeli vayangu, vakomboliwe.2Nene ndilonga ndakyene, vene vayihechile hilo kumdikila Nguluvi, ila se vichela unofu.3Kwakuva sevamchele Nguluvi peakuvagita vanu vaveche vasanzi pautalo lyake, ila vene vakagitile pevihocha na ndeni vakakanile kudikila fila Nguluvi peakuvagita vanu vaveche vasanzi pautalo lyake.4Kwakuva Kilisito akakamilise makani gala lagilicho pelisaka neke kila yumwi yeakumuidikila aidikilwe pautalo lya Nguluvi.5Munjowo cha kudikilwa pautalo lya Nguluvi kwa kukolela malagilicho, Musa akasimbile ndeni, “Munu yeyonda daikolela malagilicho dakwikala kuchumbila malagilicho ago.”6Munjowo cha kuidikilwa pautalo lya Nguluvi kwa kudikila, masimbo gilonga ndeni, “Ubihile kulonga ani daakang'ala paluhano kwa Nguluvi amkwise panyi Kilisito ache kutukombola?”7Vala mubihile kwihucha, “Ani daihelela panyi pono pa vanu vevafuwe amchulubuche Kilisito ache kutukombola?”8Ila masimbo ga Nguluvi gilonga ndeni, “Unanzi ulu lwa Nguluvi ugehe pepi na veve, ugehe pamulomo na munumbula vako.” Ugu nde unanzi va ludikilo lwetukuvadalikila vanu.9Ngita uhongecha kwa mulomo vako yumwene kuva Yesu ndi Mtwa na kudikila munumbula lwako kuva Nguluvi amuchulubuche kuhuma kwa vanu vevafuwe, dailowelwa.10Kwakuva munu kwa kuidikila munumbula na akudikilwa pautalo lya Nguluvi na kwa mulomo munu ihongecha na kulowolwa.11Masimbo ga Nguluvi gilonga, “Kila yeakumdikila Kilisito dasepatila nyoni.”12Lukani ulu nde kwa vonda, kwakuva Nguluvi seakuvabagula Vayawudi na vanu se Vayawudi, kwakuva Nguluvi ndi Mtwa va vanu vonda na msanzi kwa vanu vonda vevakumsuka lutango.13Ngita fila masimbo ga Nguluivi galonga, “Kila munu daisuka kwa litawa lya Mtwa, dailowelwa.”14Nondee davakumsuka wuli, yula sevakumdikila? Baho davakumdikila wuli, yula sevakumpulika Njowo chake? Na davapulika wuli, ngita kwihela munu va kuvadalikila?15Na vanu davadalika wuli, ngita sevalagilichwe? Ngita masimbo ga Nguluvi pegilonga, “Lolele peiveche unofu kwacha kwa vanu kuvadalikila Njowo Chinofu!”16Ila sevonda vevawanuka Njowo Chinofu, ngita Isaya mvichi va Nguluvi pealongile, “Mtwa, ndi ani yeadikile unanzi vetu?”17Kwihela yeivecha na ludikilo peseipulika luchowo lya Njowo Nofu cha Kilisito.18Ila ndihucha, wuli, Vaisilaeli sevapulike ugo unanzi? Kwa ndakyene, kupulika vakapulikile, ngita masimbo ga Nguluvi pegilonga, Vanu vakapulike Lichwi pa inyi chonda, Vanu vakapulike unanzi muinyi chonda.19Ndihucha kangi, wuli, Vaisilaeli sevachelege? Nguluvi akalonguwe kulonga kuchumbila Musa, “Dandikuvagita vanu se Vaisilaeli Nguluvi daakuvakang'icha neke, vavawonele wifu, dandikuvagita vanu se Vaisilaeli na luvipo, kwa vanu va inyi lya vapufi.”20Kangi Isaya mvichi va Nguluvi akalongile ngajila kuwogofiya, “Vanu vala sevakanisakile, vakaniwonile, ndikayihumiche kwa vanu sevahuchile njowo changu.”21Ila kwa vanu va Isilaeli Nguluvi ilonga, “Pamunyi ponda ndikasakile vaniwuyile ila nde vanu sevaidikila na nde va vasugu.”
The Word for the World International