ROM12
Edida Mme Enọ Emi Abasi Ọnọde Nsin Ke Edinam
1Ke ntre nditọ ete mi, ami mmada mbọm Abasi ñkpe mbufo ubọk nte, eyak idem mbufo enọ Abasi nte odu uwem uwa, ke ndiyak idem mbufo nnọ ke utom esie ke edisana usuñ emi enemde enye esit. Emi edi nnen nnen ntuak ibuot emi mbufo enyenede ndinọ Enye.2Ekunam ñkpọ ke edu uwem mbufo nte asañade akababa ye edu uwem mbon ererimbot emi midiọñọke Abasi, edi eyak Abasi ọkpuhọde mbufo oto esit esit ke edikabade esit mbufo ofuri ofuri. Ke ntre ke mbufo edikeme ndifiọk uduak Abasi, se ifọnde ye se inemde Enye esit, ye se ifọnde ima.3Ndien ke ntak utibe enọ emi Abasi ọnọde mi, ami ndọhọ kpukpru mbufo nte: Ekukut idem mbufo ekan nte ekpedide. Edi ekam enyene mfarakeidem nte asañade ekekem ye udomo mbuọtidem emi Abasi ọnọde mbufo.4Ñnyin imenyene ediwak ndido ke ikpọkidem ñnyin, ndien kpukpru ndido emi enyene nsio nsio utom ndinam.5Kpasuk ntre, okposuk edi emi ñnyin iwakde, ñnyin idi idem kiet ke ebuana ye Kraist ndien edian kpukpru ñnyin ebiet kiet nte asaña asaña mbak ke idem kiet.6Do ñnyin inyene ndida nsio nsio enọ ñnyin nsin ke edinam nte asañade ekekem ye mfọn emi Abasi ọnọde ñnyin. Edieke enọ owo kiet edide edisiak uduak Abasi, yak enye ada esin ke edinam ke idaha mbuọtidem esie.7Edieke edide edinam ñkpọ, yak enye anam ñkpọ; edieke edide edikpep ñkpọ, yak enye ekpep ñkpọ;8edieke edide ndidọñ owo efen esit, yak enye ọdọñ esit; edieke edide ndinọ mme mmọ efen se inanade mmọ, yak enye ọnọ ke ntatubọk; edieke edide ndida usuñ yak enye ada ye ntiñ enyin; edieke edide editua owo mbọm, yak enye anam ke idara.9Ima enyene ndidi ke akpanikọ. Esua se idiọkde edi esọñọ emum se ifọnde ekama.10Ema kiet eken ye ufiop ufiop ima nte nditọ ete ke Kraist. Kpono kiet eken kan nte ekponode idem mbufo.11Sin ifik nam utom, kudi ifu. Nam ñkpọ nọ Abasi ke ufiop ufiop spirit ukpono ye ifik.12Eyak idorenyin mbufo anam mbufo edu ke idara, enyene ime ke ukut mbufo, ndien ebọñ akam kpukpru ini.13Ebuana inyene mbufo ye mme nditọ ete mbufo emi enanade, enyuñ ekpep ndifọn ido ye mme isenowo.14Ebeñe Abasi ọdiọñ mme mmọ emi ekọbọde mbufo, ebeñe Enye ọdọdiọñ, ekusuñi mmọ.15Edara ye mme mmọ emi edarade, enyuñ efuhọ ye mme mmọ emi efuhọde.16Eda idem mbufo ukem ukem, ekutañ idem, edi ebeñe idem ndibuaha ye mbon usuhọde itie. Ekubat idem mbufo nte imọfiọk kpukpru ñkpọ.17Edieke owo anamde fi idiọkñkpọ kuda idiọk usio enye usiene. Ñwana ndinam se ifọnde ke enyin kpukpru owo.18Nam kpukpru se afo ekekeme ke ñkañ fo ndidu ke emem ye kpukpru owo.19Mme ufan mi, ekusio owo usiene, edi ekam eyak iyaresit Abasi anam emi ọnọ mbufo. Koro ikọ Abasi ọdọhọde ete, “Ọbọñ ọdọhọ ete: edi Ami nyene ndisio usiene, Ami ñyesio usiene.”20Utu koro, nte ñwed Abasi etiñde, ete, “Edieke owo usua fo okopde biọñ, nọ enye udia; edieke itọñ asatde enye, nọ enye mmọñ ọñwọñ; koro ke edinam ntem afo eyewobi mbubek ikañ odori enye ke ibuot.”21Ekuyak idiọkñkpọ akan mbufo, utu koro, eda nti ido ekan idiọkñkpọ.Biblica, Inc.