Kolosi3
Eyak Obio Ubọñ Abasi Ọyọhọ Ekikere Mbufo
1Sia ema ekemenede mbufo esin ke uwem ye Kraist, esin esit mbufo ndien ke mme ñkpọ emi edude ke Obio Ubọñ Abasi ke ebiet emi Kraist etiede ke ebekpo Esie ke ubọk nnasia Abasi.2Yak esit mbufo ọwuhọ ke mme ñkpọ emi odude do, okudi ke mme ñkpọ emi edude mi ke isọñ.3Koro mbufo ema ekpa, ndien edip uwem mbufo ye Kraist ke Abasi.4Ata uwem mbufo eyedi Kraist, ndien ke Enye ama ọwọrọ owut idem, do ke mbufo edinyuñ iwọrọ iwut idem ye Enye enyuñ ebuana ke ubọñ Esie!5Mbufo enyene ndiwot ndien udọñ obukidem emi anamde utom ke idem mbufo, ñkpọ nte use, mbubiam ido, idiọk udọñ, ifiopesit, edinam idiọkñkpọ ye idiọkitọñ, (koro idiọkitọñ edi usuñ ukpono ndem kiet).6Ke ntak mme ñkpọ ntem, iyaresit Abasi eyedoro mme mmọ emi etutde utọñ ye Abasi.7Ama enyene ini emi mbufo ekedude uwem nte asañade ekekem ye mme utọ idiọk udọñ emi, ke ini oro mmọ ekekarade uwem mbufo.8Edi ke emi, mbufo enyene ndisana kpukpru mme ñkpọ emi ñyak! Iyaresit, idiọk udọñ, ye ekikere usua. Ekuyak ikọ isuñi, mme ndedehe ikọ ndomokiet ededei ewọrọ mbufo ke inua.9Ekusu nsu enọ kiet eken, koro mbufo ema esio akani owo oro efep ye mme ido esie,10ndien ema emen obufa obot esine. Emi edi obufa owo oro emi Abasi andibot akade iso ndinam ọwọrọ obufa ke mbiet Esie, man ada mbufo ekesin ke ọyọhọ ifiọk emi abañade Enye.11Ke ntre, mme mmọ emi midighe mme Ju ye mme Ju, ana mbobi ye enye emi minaha mbobi, owo ikọt, mme ata unam owo, ifin, mme nditọ isọñ, iduhọ, edi Kraist edi kpukpru ñkpọ, Kraist odu ke kpukpru ñkpọ.12Mbufo edi ikọt Abasi, Enye akamama mbufo onyuñ emek mbufo nte udeme Esie. Ke ntre mbufo enyene ndisine ke idem mbufo, esit mbọm, mfọnido, nsuhọde idem, ifure ifure ido, ye ime.13Enam uñwam enọ kiet eken enyuñ edahado enọ kiet eken ke ini ekededi emi mbufo enyenede mfina ye kiet eken. Enyene ndidahado nnọ kiet eken, ke ukem usuñ emi Ọbọñ akadahadedo ọnọ mbufo.14Ndien ke kpukpru mme ñkpọ emi edian ima, emi ọbọpde kpukpru ñkpọ adian ọtọ kiet ke mfọnmma edidiana kiet.15Emem emi Abasi ọnọde enye ndidi ebiere ikpe ke esit mbufo, koro edi ke ntak emem emi ke Abasi okokot mbufo obok ọtọ kiet ke ikpọkidem kiet emi. Ndien enyene esit ekọm.16Mme etop Kraist ke kpukpru Uyọhọ uforo Esie enyene ndiduñ ke esit mbufo. Ekpep, enyuñ eteme kiet eken ke kpukpru eti ibuot. Ekwọ Sam, ikwọ ñwed ikwọ, ye mme ikwọ emi enyenede uteñe, ekwọ enọ Abasi ye esit ekọm,17Kpukpru se nte mbufo enọde ekọm ebe ke enye ekesim Abasi Ete.Eti Iman
18Mme iban ndọ, esuk ibuot enọ mme ebe mbufo, koro oro edi se mbufo enyenede ndinam nte ikọt Abasi.19Mme ebe ndọ, ema iban mbufo, ekunam ido obom obom ye mmọ.20Ñkpri nditọ, edi utom mbufo nte nditọ Abasi ndisuk ibuot nnọ ete ye eka mbufo kpukpru ini, koro, oro edide se inemde Abasi esit.21Mme ete ye mme eka, ekunam nditọ mbufo ñkpọ iyaresit, man esit iditimede mmọ.22Mme ifin, esuk ibuot enọ mme eteufọk mbufo ke obukidem ke kpukpru ñkpọ okudi ke ini emi ekpemede mbufo ikpọñ ikpọñ man ebọ itoro mmọ edi enam utom enọ mmọ ke ofuri esit ke ntak uteñe emi mbufo enyenede enọ Ọbọñ Jisọs.23Se ededi emi mbufo etukde ubọk ndinam, enam ke ofuri esit mbufo nte mbufo enam enọ Ọbọñ Jisọs, idighe nte enam enọ owo.24Eti ete ke Abasi eyenọ mbufo utib, mbufo eyebọ se Enye ekenimde ọnọ ikọt Esie. Koro Kraist edide idem Eteufọk emi mbufo enamde ñkpọ enọ.25Ndien owo ekededi emi anamde idiọkñkpọ, eyekpe enye utib idiọkñkpọ emi enye anamde, koro Abasi ekpede ikpe kpukpru owo ukem ukem.Biblica, Inc.