3 Jọn1
1Ñwed emi oto Ada Idaha ufọk Abasi. Ñwet nnọ edima Keyọs, emi ami mmade ke esit akpanikọ:2Edima ufan mi, ami mbọñ akam kpukpru ñkpọ akpakam ọfọn ye afo, afo ñko onyuñ odu ke nsọñidem, onyuñ ọfọn ye afo ke spirit.3Esit ama enem mi eti eti ke ini emi ndusuk nditọ ete ekebehede editiñ enọ mi nte afo ọbuọtde idem ye akpanikọ, kpa nte afo osuk odude uwem fo kpukpru ini ke akpanikọ.4Ñkpọ ndomokiet inemke mi esit ikan emi ñkopde nte ke mme nditọ mi edu uwem mmọ ke akpanikọ.
Tiene Se ifọnde
5Edima ufan mi, afo amanam akpanikọ ke utom emi afo anamde ọnọ nditọ ete, kpa ye emi mmọ edide mme isenowo.6Mmọ etiñ ebaña ima emi afo enyenede ọnọ ufọk Abasi mi. Mbok ñwam mmọ ndika iso ke isañ mmọ ke usuñ emi enemde Abasi esit.7Koro mmọ ekewọñọde eka isañ emi ke idak utom Kraist ikọbọhọ uñwam ndomokiet ito mme mmọ emi mibakke Abasi.8Ñnyin nditọ Abasi ndien, inyene ndiñwam mme mmọ emi, man otodo ñnyin ibuana ke utom emi mmọ enamde ke ntak akpanikọ.9Ami mma ñwewet ibibio ñwed nnọ esọk Ufọk Abasi; edi Diotrefes, emi amade ndidi adausuñ, inyimeke ndikpañ utọñ nnọ se ntiñde.10Ke ini ami mma ndi do ndien, ke ami ndimen kpukpru se enye anamde ntiñ, mme oburobut ikọ emi enye etiñde adian ñnyin, ye mme nsu emi enye osude! Edi oro ikemke enye, enye inyimeke ndidara nditọ Ete emi edide do, edi ọbiọñọ mme mmọ oro ekeyomde ndidara mme mmọ oro, ndien añwana usuñ ndisioño mmọ ke Ufọk Abasi!11Edima ufan mi, kukpebe se idiọkde, edi kpebe se ifọnde. Owo ekededi emi anamde eti edi eke Abasi; owo ekededi emi anamde se idiọkde ikwe Abasi.12Kpukpru owo etiñ nti ikọ ebaña Demetriọs, akpanikọ ke idem esie etiñ se ifọnde abaña enye. Ndien ñnyin idian se ñnyin ikutde ke idem ñnyin, ndien afo ọmọfiọk ete ke se ñnyin itiñde edi akpanikọ.13Ami mmenyene ediwak ñkpọ emi ñkpetiñde ye afo, edi ami ñyomke ndinam ntre ke etoñwed ye mmọññwed.14Ami modori enyin ndikut fi ke ini emi midibighike, ndien ñnyin iyeneme nneme iso ye iso.15Emem odu ye afo. Kpukpru mme ufan fo enọ ekọm. Kọm kpukpru mme ufan ñnyin ke enyiñ ke enyiñ nọ ñnyin.Biblica, Inc.