2 Tesalonika1
1Ñwed emi oto Pọl, Sailas ye Timoti. Enọ esọk mbon ufọk Abasi emi edude ke Tesalonika, mme mmọ emi edide inyene Abasi Ete ñnyin, ye eke Ọbọñ ñnyin Jisọs Kraist.2Abasi Ete ye Ọbọñ Jisọs Kraist akpakam ọnọ mbufo mfọn ye emem.3Ñnyin imenyene ndikọm Abasi kpukpru ini kabaña mbufo, nditọ ete. Edi nnen nnen ñkpọ ñnyin ndinam ntre, koro mbuọtidem mbufo ke ọkọri eti eti. Ndien ima emi mbufo enyenede ebaña kiet eken konyuñ okpon eti eti.
Ndutuhọ Enyene Ntak
4Ntak edi emi ñnyin ke idem ñnyin iburede mbure ibaña mbufo ke otu mme ufọk Abasi. Ñnyin ibure mbure ibaña usuñ emi mbufo ekada iso ndiyọ ñnyuñ nnim ke akpanikọ, ke ufọt kpukpru mme ukọbọ ye ukut emi mbufo ebede ke esit.5Emi edi nnen nnen ediyarade edinen ikpe Abasi, koro ke ntak mme ñkpọ emi mbufo eyedi mme mmọ emi edotde ndida obio ubọñ Esie ñnyene, emi mbufo ekutde ukut ebaña,6Abasi eyenam se ifọnde. Enye eyeda ukut odori mme mmọ oro esinde mbufo ke ukut.7Ndien Enye eyenọ mbufo emi ekutde ukut ifure, ye ñnyin nde. Enye edinam emi ke ini Ọbọñ Jisọs editode ke enyọñ iwọrọ iwut idem, ye mme ñkpọsọñ enjel Esie,8ye edeme ikañ, ndimia mme mmọ emi midiọñọke Abasi ufen, ye mme mmọ emi misukke ibuot inọ Eti Mbuk emi abañade Ọbọñ Jisọs.9Mmọ eyebọ ufen nsinsi nsobo, eyediañade mmọ ekpọñ iso Ọbọñ ye ke ñkoñkoñ odudu Esie,10ke ini Enye edidide ke usen oro ndibọ ubọñ nto kpukpru ikọt Esie, ye ukpono nto kpukpru mme mmọ emi enimde ke akpanikọ. Mbufo ñko eyedu ke otu mmọ, koro mbufo ñko emenim Eti Etop emi ñnyin iketiñde inọ mbufo ke akpanikọ.11Ntak edi emi ñnyin isinde mbufo ke akam kpukpru ini. Ñnyin ibeñe Abasi ñnyin anam mbufo edot ke uwem emi Enye okokotde mbufo ndidu. Yak Enye, ke odudu Esie, anam kpukpru uduak esit mbufo ewọrọ esu ke eti, onyuñ anam utom mbuọtidem mbufo ọyọhọ.12Ke usuñ emi ke enyiñ Ọbọñ ñnyin Jisọs ọbọ ubọñ oto mbufo, mbufo ñko enyuñ ebọ eto Enye, ke mfọn Abasi ñnyin ye Ọbọñ Jisọs Kraist.Biblica, Inc.