2 Kọrint8
Ntatubọk Mbon Masidonia
1Ke emi ñyom nditiñ nnọ mbufo, nditọ ete, se Abasi ke mfọnido Esie anamde ọnọ mme ufọk Abasi emi odude ke Masidonia.2Okposuk edi emi mmọ ekekutde ediwak ukut ye ọkpọsọñ ini ntem, mmọ ema ebuak akwa idara mmọ ye ọkpọsọñ unana, emi akanamde mmọ enọ enọ ke ntatubọk okposuk edi emi mmọ ekedide mme ata ubuene.3Ami nnam emi añwaña mbufo nte ke mmọ ema enọ awak nte mmọ ekekemede, ndien ema enọ ekan idem ukeme mmọ; mmọ ekenọ ke ima esit mmọ.4Mmọ ema ekpe ye ñnyin, ndinọ mmọ ifet ke edinyene ubọk ke ediñwam ikọt Abasi ke Judia.5Mmọ ema enam ebe nte idorenyin ñnyin ekedide, koro akpa ñkpọ emi mmọ ekenamde ekedi ndiyak idem mmọ nnọ Ọbọñ; ndien ke uduak Ọbọñ mmọ ema eyak idem mmọ enọ ñnyin ñko.6Ke ntre ñnyin ima inọ Taitọs uyo, enye emi ọkọtọñọde utom emi, ndika iso ke esit ñnyuñ ññwam mbufo ndinam utom ima emi ñkesim utit.7Kpa nte mbufo edade iso ke kpukpru ñkpọ, ke mbuọtidem, ke editiñ ikọ, ke ifiọk ke ifiopesit edinam ñkpọ, ye ke ima emi mbufo emade ñnyin, ekut ete ke mmimọ imonyuñ ida iso ke mfọn edinọ ima esit.8Ami nnọhọ mbufo ewuhọ, edi ami ñyom ndidomo udobi ima emi mbufo enyenede, ke ndida ifiop esit mbon efen ndomo ye eke mbufo.9Mbufo emefiọk adaña nte Ọbọñ ñnyin Jisọs ọkọyọhọde ye ima ye mfọnido; okposuk edi emi enye eke nyenede ñkpọ eti eti, edi ke ntak mbufo Enye ama akabade edi ubuene, man oto ke oro Enye edide ubuene, Enye ekeme ndinam mbufo ekabade edi mme enyene ñkpọ owo.10Emi edi item emi nnọde kabaña se ifọnde ye mbufo ke mbubehe emi: ọfọn mbufo ndikure se mbufo eketọñọde isua oko. Mbufo ekedi mme ebem iso, ikedighe ke edinam ikpọñ, edi ekedi ke edibiere nditọñọ idem edinam.11Anam ke ntre, enam utom emi ema; enyene udọñ ndinam utom emi man kpa nte mbufo ekenyenede udọñ nditim utom emi, ndien eda se mbufo enyenede idahaemi enam utom emi;12Koro edieke udọñ edinọ odude, Abasi eyebọ enọ fo etiene nte afo enyenede ndinọ, idighe ke se afo munyeneke.13Udọñ esit ñnyin idighe ndikut nte efigherede mme mmọ eñwen mbiomo mmọ ndien ekabade efefik mbufo ye ndodobi mbiomo.14Edi sia mbufo enyenede ediwak ke uto ini emi, odot nte mbufo eñwam mme mmọ emi edude ke unana.15Nte ewetde ke Ñwed Abasi, “Enye emi ọkọkọde ediwak ikenyeneke nte awakde akaha, ndien enyemi ọkọkọde esisit ikenanake ikaha.”16Ami mọkọm Abasi nte Enye anamde Taitọs enyene ukem udọñ emi ñnyin inyenede ke ndiñwam mbufo.17Taitọs ikokopke uyo ñnyin ikpọñ, edi ke ifiopesit ye udọñ idem esie ndiñwam mbufo, akanam enye edi ebine mbufo.18Ñnyin imonyuñ idian enye ye eyen ete kiet emi ofuri ufọk Abasi ekponode nte enye emi ọkwọrọde Eti Mbuk emi.19Ke ebede oro, mme ufọk Abasi ekemek enye ndisaña ye ñnyin nte ñnyin ikade iso ke utom mfọn emi ñnyin inamde ndinọ Ọbọñ ukpono ye ndinyuñ ñwut udọñ emi ñnyin inyenede ndiñwam.20Ñnyin inyene nditim ñkpeme, man owo edinyene se etiñde edian ñnyin ke usuñ nte ñnyin idade inam utom enọ mfọn emi.21Uduak ñnyin edi ndinam se inende, idighe ke enyin Abasi ikpọñ, edi se inende ke iso owo ñko.22Ke ndidian do, ñnyin imonyuñ idian eyen ete ñnyin kiet efen ye mmọ, emi ñnyin ikodomode enye ke ediwak ini, inyuñ ikut ite ke enye enyene udọñ eti eti kpukpru ini ke ndiñwam, enye onyuñ etim esin ifik, oto ke akwa mbuọtidem emi enye enyenede ke idem mbufo.23Edieke owo kiet ekededi obupde mbufo owo emi Taitọs edide edọhọ enye ete ke enye edi nsañautom mi, emi asañade ye ami anam ñkpọ ọnọ mbufo, ndien mbufo emekeme nditiñ ñko ete ke nditọ ete iba eken edi ke ibuot mme ufọk Abasi; mmọ edi ubọñ Kraist.24Mmọdo ewut mmọ ima emi mbufo enyenede ye ntak emi ñnyin idade mbufo inam inua, man ofuri ufọk Abasi ekeme ndikut.Biblica, Inc.