2 Kọrint6
1Nte mme mmọ emi ebuanade utom ye Abasi, ñnyin imekpe mbufo ubọk ite, ekuyak mfọn Abasi, emi mbufo ekebọde, ọwọrọ ikpuikpu.2Koro Abasi ọdọhọ ete, “Ami mma ñkop fi ke ini mfọnido Mi, mma ñnyuñ ñnyaña fi ke usen edinyaña.” Kpañ utọñ! Emi edi ini edibọ mfọnido Abasi, mfin edi usen emi anade ebọ ubọhọ.3Ñnyin inimke ñkpọ iduọ ndomo baba kiet ke usuñ mbufo, man mbufo editiñ ikọ ndisuhọde utom ñnyin.4Ke akpanikọ, ñnyin imodomo ndiwut ite ke ñnyin idi mme isuñutom Abasi ye mbon akpanikọ, ke edibọ ukut, ye ọkpọsọñ unana, ye kpukpru mme nsio afanikọñ ke ime.5Ema emia ñnyin ke ikpa, esin ñnyin ke ufọk ñkpọkọbi, ikut ndutuhọ ke ubọk ñka mbon ntime, inam utom ikpa mba, itaba idap inyuñ isaña biọñ.6Ke edisana ido, ke ifiọk ke anyan ime, ye ke mfọn ido, ñnyin imowut idem ñnyin nte mme isuñutom Abasi oto ke Edisana Spirit ye ata ima ñnyin,7edikwọrọ ikọ akpanikọ, ye ke odudu Abasi; ye mme ñkpọ ekọñ edinenido ke ubọk nnasia ñnyin ye ke ufien;8Ke ini ukpono ye ke ini esuene, ke etorode ñnyin ye ke eduọhọde ñnyin; ebat ñnyin ke mbio abiaña, edi ñnyin idi mme mmọ emi itiñde akpanikọ.9Ebat ñnyin ke didie didie owo, edi ñnyin idi mme ọwọrọ iso owo; ete ñnyin idi mme mmọ emi eyomde ndikpa, edi ñnyin ke isuk idodu uwem; nte mme mmọ emi emiade ufen, edi ñnyin ikpaha.10Ete ñnyin idi mbio mfuhọ, edi ñnyin idu ke idaraesit kpukpru ini; nte mme mmọ emi ebuenede, edi imanam ediwak owo enyene ñkpọ; nte mme mmọ emi minyeneke baba ñkpọ kiet, edi ñnyin imenyene kpukpru ñkpọ:11Ñnyin imetiñ ikọ añwa añwa inọ mbufo, imonyuñ inyene iñwañ iñwañ esit ye mbufo mbon Kraist.12Ñnyin inanake mbọm ke esit ñnyin ibaña mbufo, akam edi mbufo enana mbọm ke esit mbufo ebaña ñnyin.13Ami ntiñ emi idahaemi nte mbufo ekpedide mme nditọ mi, ewut ñnyin ukem esit emi ñnyin inyenede ibaña mbufo. Enyene iñwañ iñwañ esit ye ñnyin.
Kunyime Ntọmbuak
14Ekudian idem ye mmọ emi minimke ke akpanikọ, koro emi ikemeke nditibe. Unen ye ukwañ ekeme didie ndidi nsaña? Uñwana ye ekim ekeme didie ndiduñ ọtọ kiet?15Nso nduk ke Kraist oduk ye Setan? Mme nso udeme ke andinim ke akpanikọ enyene ye enyemi minimke ke akpanikọ?16Nso ediomi odu ke ufọt Edisana ebiet Abasi ye ndem? Koro ñnyin idi ebiet iduñ Abasi uwem; kpa nte Abasi ke idem Esie ọkọdọhọde ete, “Ñyeduñ, ñyenyuñ nsaña ye mmọ, ndien ñyedi Abasi mmọ, mmọ ñko eyenyuñ edi ikọt Mi.”17Oro edi ntak emi Ọbọñ ọdọhọde ete, “Ewọñọ ke otu mmọ, enyuñ ediañade idem mbufo ekpọñ mmọ, Ekutuk mme ndek ndek ñkpọ baba kiet; ndien Ami ñyedara mbufo.”18Ami ñyedi Ete nnọ mbufo, ndien mbufo eyedi nditọ iren mi ye nditọ iban mi, edi Jihofa ata ọkpọsọñ ọdọhọ.Biblica, Inc.