2 Kọrint3
Mbuọtidem Mbufo Ọsọñọ Utom Ñnyin
1Nte ñnyin imọñ itọñọ ntak itoro idem ñnyin? Mme ana nte ñnyin, nte mme mmọ efen, ibọ ñwed itoro ida isọk mbufo, mme ñnyin ndibọ mbufo ñwed itoro nda nsọk mme mmọ efen?2Mbufo ke idem mbufo, edi ñwed emi ñnyin iwetde ke esit mbufo inọ kpukpru owo ndidiọñọ ñnyuñ ñkot.3Mmọ ekeme ndikut ete ke mbufo edi ñwed emi otode Kraist, emi ñnyin iwetde. Idighe ñwed emi edade eto ye mmọñ ñwed ewet, edi, eda Spirit odu uwem Abasi ewet, ndien idighe enye emi ekapde ke itiat, edi ewet ke esit mme owo.4Ñnyin inyene oruk mbuọtidem emi ke Abasi ito Kraist.5Ñkpọ ndomokiet iduhọ ñnyin ke idem emi akpanamde ñnyin ibiere ite ke ñnyin imenyene ukeme ndinam utom emi. Ukeme emi ñnyin inyenede oto Abasi,6edi Enye anam ñnyin inyene ukeme nte mme anam utom obufa ediomi, emi midighe mme ibet emi ewetde wet, edi, edi ediomi emi ebọpde ke Spirit. Ibet emi ewetde wet ada ñkpa edi, edi Spirit ọnọ uwem.Obufa Ubọñ Kraist
7Edieke utom emi akadade ñkpa edi, emi ekekapde ke itiat ekedide ye uteñe tutu anam nditọ Isrel ikekemeke ndiwuk enyin nse Moses ke iso oto ke ntak uteñe esie, okposuk edi nte uyama oro ke iso Moses ekenimede,8nte utom Spirit ikpenyeneke uku ye uteñe ikan oro?9Edieke utom emi akadade ubiomikpe ọsọk owo akasañade ye uteñe, adaña didie ke utom emi adade edinen ido edi ekpenyene uteñe akan!10Ke ntak uteñe emi ayamade akan idahaemi, uteñe emi akayamade ke mme ini emi ekebede osop.11Edieke se idibede ifep ekenyenede ubọñ, adaña didie ke se ididude ke nsinsi edinyene ubọñ ikan!12Mmọdo sia ñnyin inyenede utọ idorenyin emi, ñnyin imenyene uko.13Ñnyin inyuñ idighe Moses, emi akadade ufukñkpọ ofuk iso esie, man nditọ Isrel edikut nte Uteñe oro akatahade onyuñ osop.14Edi ema enam esit mmọ ọsọñ, ndien tutu esim mfin emi efuk esit mmọ ye ukem ufukñkpọ nte mmọ ekekot mme ñwed akani Ediomi. Efuhọde ufukñkpọ oro efep ke ini emi owo adianade ye Kraist ikpọñ ikpọñ.15Anam tutu esim mfin emi adaña nte mmọ ekotde ñwed mbet Moses, ufukiso oro osuk ofuk esit mmọ.16Edi ekeme ndifuhọde ufukñkpọ oro, kpa nte ñwed Abasi etiñde abaña Moses ete, “Ema efuhọde ufukñkpọ esie ke ini emi enye ọkọwọñọrede ese Ọbọñ.”17Ọbọñ edi Spirit oro, ndien ebiet emi Spirit Ọbọñ odude, uwọrọufin odu do ñko.18Edi kpukpru ñnyin emi iso ñnyin mifuhọke ufukñkpọ, imosio ubọñ Ọbọñ iwut; ndien kpa ubọñ oro emi otode Abasi emi edide Spirit, akabade ñnyin esin ke mbiet Esie ke ñkoññkan ubọñ.Biblica, Inc.