1 Tesalonika4
Duak Ndisana Ọyọhọ Ọyọhọ
1Ke akpatre, nditọ ete, mbufo ema ekpebe ñnyin nte mbufo ekemede ndidu uwem emi enemde Abasi esit. Emi edi usuñ emi mbufo ekade iso ndidu uwem. Ndien ke emi ñnyin imekpe mbufo ubọk inyuñ inyik mbufo, ke enyiñ Ọbọñ Jisọs, ite yak mbufo ekaka iso enam ekan.2Koro mbufo emefiọk mme item emi ñnyin ikọnọde mbufo emi okotode ke odudu Ọbọñ Jisọs.3Emi edi uduak Abasi ọnọ mbufo. Enye oyom mbufo edi ndisana, enyuñ ewọrọ ofuri ofuri ekpọñ use.4Owo mbufo kiet kiet enyene ndifiọk nte enye ọdọde ñwan kiet ke edisana ye usuñ emi enyenede ukpono.5Idighe ke idiọk udọñ nte mme mmọ emi midiọñọke Abasi enamde.6Ke ikọ emi ndien, owo baba kiet okudue eyen ete esie, mme ndituk eyen ete esie ke ndibọ enye ñwan esie. Ñnyin ima itetiñ emi inọ mbufo, ñnyin imoduri mbufo utọñ eti eti, ite Ọbọñ eyemia mme mmọ emi eduede uto ndudue emi ufen.7Abasi ikokotke ñnyin idi ididu uwem ke use, edi ke edisana ido uwem.8Ke ntre, owo kiet ekededi emi esinde ukpepñkpọ emi, isinke owo edi esin Abasi, emi ọnọde mbufo Edisana Spirit.9Ntak iduhọ ndiwet nnọ mbufo mbaña edinyene ima nnọ nditọ ete mbufo emi enimde Abasi ke akpanikọ. Abasi ama ekpekpep mbufo nte mbufo ekpenyenede ndima kiet eken.10Ndien mbufo emedodu utọ uwem ima emi kabaña kpukpru mme nditọ ete ke ofuri Masidonia. Ntem, ñnyin imekpe mbufo ubọk nditọ Ete, ite yak enanam ekan emi.11Yak emi edi uduak mbufo ndidu ifure ifure uwem, nditiñ enyin nse mbubehe idem mbufo, ñnyuñ ññwana se edade edu uwem mbufo kpa nte iketiñde inọ mbufo ke ini emi ekebede.12Ke usuñ emi mbufo eyebọ ukpono eto mme mmọ emi minimke Abasi ke akpanikọ, idinyuñ inyeneke ntak ndidori enyin ke owo ke se idide unana mbufo.Nso Itibe Ke Andinim Ke Akpanikọ Akpade?
13Nditọ ete, ñnyin iyom mbufo efiọk akpanikọ emi otukde mme mmọ emi ema ekekpaña, man mbufo edidu ke mfuhọ nte mme mmọ emi minyeneke idorenyin.14Ñnyin imenim ke akpanikọ ite ke Jisọs ama akpa, ama onyuñ eset ke ñkpa, ntre ñko ke ñnyin inim ke akpanikọ ite ke Abasi eyeda Jisọs edi ye mme mmọ emi ekenimde Enye ke akpanikọ ndien mmọ ekpa.15Emi edi ukpepñkpọ Ọbọñ ke ñnyin itiñ inọ mbufo ite: ñnyin emi isuk idude uwem, ke usen emi Ọbọñ edidide, idibemke mme mmọ emi ekekpañade iso.16Ọkpọsọñ uyo edinyik eyedu, uyo Akwa Enjel, uyo obukpoñ Abasi, ndien Ọbọñ ke idem Esie ọyọsuhọrede oto ke enyọñ edi. Mme mmọ emi ekenimde Kraist ke akpanikọ ndien mmọ ekpa eyebem iso eset ke ñkpa.17Ndien ñnyin emi idude uwem ke ini oro eyetañ ñnyin kpukpru ye mmọ edọk ke enyọñ ndikosobo ye Ọbọñ ke ofum. Ndien, ntre ke ñnyin ididu ye Ọbọñ kpukpru ini.18Ke ntem, edọñ kiet eken esit eto ke mme ikọ emi.Biblica, Inc.