1 Kọrint3
Mme Ibọrọ Nsọñidem
1Nditọ ete mi, ami ñkemeke nditiñ ikọ ye mbufo nte mme mmọ emi eyọhọde ye Spirit, ami ñke nyene nditiñ ikọ ye mbufo nte nditọ ererimbot, nte nditọ nsek ke mbuọtidem Kraist.2Ñkenyene ndinọ mbufo mmọñeba, emi midighe ọkpọsọñ udia, koro mbufo ikebeñeke idem inọ ọkpọsọñ udia, tutu ye emi, mbufo inyuñ ibeñeke idem inọ enye.3Koro mbufo ke ededu uwem nte mme mmọ emi mikabakede esit kaña kpa nte nditọ ererimbot. Ke ini ufup odude ke otu mbufo, mbufo enyuñ etọhọ utọk ye kiet eken, nte emi isioho iwut ite ke mbufo edi mbio ererimbot, emi edude uwem mmọ etiene idaha idomo ererimbot?4Edieke owo kiet ọdọhọde, ete, “Ami ntiene Pọl” ndien owo efen ọdọhọ ete, “Ami ntiene Apọlọs,” nte mbufo inamke ñkpọ nte mbon ererimbot ke oro?5Anie edi Apọlọs ke editim ntiñ? Ñko, anie edi Pọl? Ñnyin idi mme isuñutom Abasi, emi okotode ke ñnyin mbufo enim ke akpanikọ. Ñnyin kiet kiet ikanam utom emi Abasi ọkọnọde ñnyin inam.6Ami ñkọtọ mfri, Apọlọs ọkọduọk mmọñ ke idem eto, edi ekedi Abasi akanam idem eto ọkọri.7Enye emi ọkọtọde ye enye emi ọkọduọkde mmọñ ke akpanikọ inyeneke ñkpọ ndinam ke ñkpọ emi. Edi Abasi ikpọñ ikpọñ enyene ndiwọrọ nda, koro edi Enye anam eto ọkọri.8Ukpuhọde ndomokiet iduhọ ke ufọt anditọ ye andiduọk mmọñ; Abasi eyenọ owo kiet kiet ñkpọ eyen utom etiene utom emi enye akanamde.9Koro ñnyin idi mme nsaña utom, emi inamde utom ọtọ kiet inọ Abasi. Ndien mbufo edi iñwañ Abasi oro, mbufo ñko edi ufọk emi Abasi ọbọpde.10Ke idak mfọn emi Abasi ọkọnọde mi, ami ñkesin itiat idak isọñ nte ata ọbọp ufọk ndien owo efen ọbọp odori ke esit esie. Edi owo kiet kiet enyene ndikpeme eti eti nte enye ọbọpde odori.11Koro owo baba kiet ikemeke ndisin itiat idak isọñ efen mbe enye emi ema ekesesin emi edide Jisọs Kraist.12Edieke owo ndomokiet adade gold, silfa; nsọñurua itiat, eto, mbiet, mme ñnyanyaña ọbọp odori ke itiat idak isọñ emi,13eyeyarade utom esie ewut nte enye edide, koro usen oro eyesio enye ewut ke uñwana. Edida ikañ iyarade enye, ndien ikañ eyedomo mme uduot utom owo kiet kiet ese;14Edieke ikañ mitaha se enye ọkọbọpde odori ke itiat idak isọñ emi, enye eyebọ ñkpọ eyen utom.15Edi, edieke ikañ atade utom owo kiet ekededi, enye idinyeneke ñkpọ eyen utom; edi eyenyaña enye ke idem esie nte enye emi ọbọhọde ọwọrọ ke ikañ.16Nte mbufo ifiọkke ite ke mbufo ke idem mbufo edi Edisana Ebiet (temple) Abasi, ndien ke Spirit Abasi oduñ mbufo ke idem?17Edieke owo ndomokiet asabarede Edisana Ebiet Abasi emi, Abasi eyebiat enye; koro ebiet iduñ Abasi edide edisana, ndien mbufo edi ebiet iduñ Esie oro.18Ekubiaña idem mbufo, edieke owo mbufo ndomokiet ekerede ete ke imọ imọfiọk ñkpọ ke idaha idomo eyo emi, yak enye akabade edi ndisime, man otodo enye ekpenyene ata ifiọk.19Koro ifiọk ererimbot emi edi ndisime ke iso Abasi. Kpa nte ewetde ke ñwed Job ete, “Abasi omum mme ọfiọkñkpọ owo ke ñkari mmọ”20Utọñọntak ñko, “Abasi ọdiọñọ ete ke ekikere mme ọfiọkñkpọ owo edi ikpuikpu”.21Ke ntre, ñnyin inyeneke se ñnyin ikpadade itaña ase ke se ededi emi owo ekemede ndinam. Kpukpru ñkpọ enyene mbufo.22Mme edi Pọl mme Apọlọs mme Pita, mme ererimbot emi, mme uwem mme ñkpa, mme ini emi, mme ini iso, kpukpru edi eke mbufo.23Ndien mbufo edi eke Kraist ndien Kraist edi eke Abasi.Biblica, Inc.