1 Kọrint13
Akakan Ñkpọ Ke Ererimbot
1Mmekeme ndinyene ukeme ndisem mme usem owo ye idem eke mme enjel, edi edieke ami meñnyeneke ima, ikọ mi idighe ñkpọ ndomokiet, ibọhọke nditie nte ñkoñ emi anamde uyom, ye uyom ñkanika.2Ami ñkponyuñ ñnyene enọ edisiak uduak Abasi, ñnyuñ mfiọk kpukpru ifiọk emi abañade kpukpru mme ndibe ndibe ñkpọ; ñnyuñ ñnyene mbuọtidem emi ekemede ndiwubede obot nduọk; edi edieke ami meñnyeneke ima, ami ndighe baba ñkpọ kiet.3Edieke ñyakde kpukpru se ami ñnyenede nnọ mme ubuene, ñnyuñ ñyak idem mi nnọ efọp ke ikañ, edi edieke ami meñnyeneke ima, idoroke mi baba udori kiet.4Ima enyene ime, onyuñ ọfọn ido; ima ifubeke ufup; ima inamke inua, ima ikohokede idem.5Ima inamke ido emi mifọnke; ima idighe ibuk; ima isọpke iyaresit; ima ikamake udu ke esit esie;6Ima ikopke inemesit ke se idiọkde, edi okop inemesit ke se idide akpanikọ.7Ima ọyọyọ kpukpru ñkpọ; ọbuọt idem kpukpru ini; enyene idorenyin ke kpukpru ini; eme ime ke kpukpru ñkpọ.8Ima inyeneke utit, eyeka iso odu ke nsinsi. Ama edi edisiak uduak Abasi eyetre; edisem usem ke mme esen edeme eyedobo; ifiọk eyebe efep.9Koro enọ ifiọk ye enọ edisiak uduak Abasi emi enọde ñnyin edi ubak ubak;10Ndien ke ini se ifọnde ima ama edi, se ikedide ubak ubak eyesop.11Ke ini ami ñkedide eyenọwọñ, ñketiñ ikọ nte eyenọwọñ, ñkekere ekikere nte eyenọwọñ, ñkeneni eneni nte eyenọwọñ. Edi ke emi, ami ndide akwa owo, motop ido uyen nduọk ke edem.12Se ñnyin ikutde idahaemi etie nte owo okut ñkim ñkim ñkpọ ke ukutiso; edi ini ama ekem ñnyin iyekut iso ye iso. Se ami mfiọkde idahaemi edi ubak ubak; ini oro ami ñyefiọk ọyọhọ ọyọhọ, nte Abasi ọdiọñọde mi ñko.13Ndien ke emi, mme ñkpọ ita emi esuhọ: mbuọtidem, idorenyin ye ima. Edi andikpon ñkan ke otu mmọ edi ima.Biblica, Inc.