ዮሃንሳ ሳፃ2
(1) የሱስ ኤፈሶነን ደእያ ዎሳ ጎለዉ ጎዋ
1ኤፈሶነን ደእያ ዎሳ ጎለ ኪታንቻዉ ሀዋዳን ያጋደ ጻፋ:“ባረ ኡሸቻ ኩሽያን ላፑ ጾልንትያ ኦይቄዳዌ፥ ጾምፓቱዋ ዎያ ላፑ ዎርቃ ባላቱዋ ግዱዋና ሀመትያዌ ሀዋዳን ያጌ።2ታን ነ ኪታ፥ ነ ዳቡራነ ነ ገንጩዋ ኤራይ። ቃይ ኔን ኢታ አሳቱዋ ገንጫናዉ ዳንዳያቤናዋካ ታን ኤራይ፤ የሱስ ኪቴዳዋንታ ግደናን ደኢደ ባረንታ፥ ‘ኑን የሱስ ኪቴዳዋንታ’ ግያዋንታ ኔን ጾሞሳደ፥ ኡንቱንቱ ዎርዶ ግድያዋ ደሜዳዋካ ኤራይ።3ኔን ገንጫዳ፤ ቃይ ታ ሱን ድራዉካ መቱዋ ዳንዳያዳ፤ ዳቡራበይካ።4ሽን ታን ኔና ካያባይ ደኤ፤ አያዉ ጎፐ፥ ኔን ካሰ ነ ሲቁዋ አጋዳ።5ስም ኔን ሀቃፐ ኩንዳድንቶ አኬካ። ነ ናጋራፐ ስማ፤ ኔን ካሰ ኦያ ኦሱዋ ኦ። ሄዌ ዮፐ፥ ታን ኔኮ ያና፤ ያደ ኔን ነ ናጋራፐ ስማና ዮፐ፥ ኔን ጾምፕያ ዎያ ነ ባላ አ ሳኣፐ አካ ድጋና።6ሽን እትባ ሎይዳ፤ ኒቆላዋቱዋ ኦሱዋ፥ ታን እጽያዋ ኔንካ እጻዳ።7“ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ፤ ታን ጾንያ ኡራዉ ጾሳ ገነትያን ሞክያ ደኡዋ ም አይፍያ ማናዉ እማና ያጌ”
ያጋደ ጻፋ።
(2) የሱስ ሳምርኔሳን ደእያ ዎሳ ጎለዉ ጎዋ
8ሳምርኔሳን ደእያ ዎሳ ጎለ ኪታንቻዉ ሀዋዳን ያጋደ ጻፋ:“ሀይቄዳዌ፥ ሀይቁዋፐካ ደንዴዳዌ፥ ኮይሩነ ዉርሰይ ሀዋዳን ያጌ።9ታን ነ ዋይያነ ነ ህዬሳተ ኤራይ፤ ሽን ኔን ዱረ። አይሁዳ ግደናን ደኢደ ባረንታ፥ ኑን አይሁዳ ግያዋንቱ ቦርያዋ ታን ኤራይ፤ ሽን ኡንቱንቱ ሴጻና ማባራን ደኢኖ።10ኔን ዋየታና ዋየዉ ያዮፓ። በአ፥ ጻላህያ ካፑ ህንተፐ አማሬዳዋንታ ጾሞሳናዉ ቃሾ ጎለን የጋና፤ ታሙ ጋላሳ ጋካናዉ ህንተንቱ ዋየታና። ሀይቃና ጋካናስካ አማነቴዳዋ ግዳ፤ ታን ነዉ ደኡዋ ካላቻ እማና።11“ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ!
“ጾንያ ኡራይ ላኤንዋ ሀይቁዋን ቆሄተና ያጌ”
ያጋደ ጻፋ።
(3) የሱስ ጰርጋሞናን ደእያ ዎሳ ጎለዉ ጎዋ
12ጰርጋሞናን ደእያ ዎሳ ጎለ ኪታንቻዉ ሀዋዳን ያጋደ ጻፋ:“ላኡ ባጋና ሌፈቴዳ ማሻይ ደእያዌ ሀዋዳን ያጌ።13‘ታን ኔን ደእያ ሳኣ ኤራይ። ኔን ሴጻና ካዉተ ኦይዲ ደእያ ሳኣን ደኣሳ፤ ታ ሱን ምንሳ ናጋሳ። ሀራይ አቶ፥ ሴጻናይ ደእያ ሳኣን ህንተንቱ ማታን አሳይ ዎዳ ታን አማንያ ማርካይ አንትጳስ ደእያ ዎደካ ታና አማንያዋ አጋ በይካ።14ሽን ታን ኔና ቦርያ ጉባይ ደኤ፤ እስራኤልያ አሳይ ኤቃዉ ያርሼዳ ቁማ ማናዳንነ ዎሹማናዳን ኡንቱንታ ናጋራ ኦስሴዳ ባላቃ ታማርሴዳ ባላማ ትምርትያ ታማርያ አማሬዳ አሳቱ ኔናና ደኢኖ።15ሄዋዳንካ፥ ቃይ ኒቆላዋቱዋ ትምርትያ ታማርያ አሳቱ ኔናና ደኢኖ።16ሄዋ ድራዉ፥ ኔን ነ ናጋራፐ ስማ፤ ሄዌ ዮፐ፥ ታን ኔኮ ኤለካ ያና፤ ሄ አሳቱዋና ታ ዶናፐ ከስያ ማሻን ኦለታና።17“ ‘ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ። ጾንያ ኡራዉ ታን ጌማን ደእያ ማናፐ አማሬዳዋ እማና። ቃይ ታን ቦ ሹቻካ አዉ እማና፤ አክያ ኡራፐ አትን፥ ኦንነ ኤረና ኦራ ሱንይ ሄ ሹቻ ቦላ ጻፈት ኡቴዳ’ ያጌ”
ያጋደ ጻፋ።
(4) የሱስ ትያጽሮነን ደእያ ዎሳ ጎለዉ ጎዋ
18ትያጽሮነን ደእያ ዎሳ ጎልያ ኪታንቻዉ ሀዋዳን ያጋደ ጻፋ:“ጾሳ ናአይ፥ ታማ ላጩዋ ማላትያ አይፊ ደእያዌ፥ ቃይ ጮጭያ ታማን ቴሪደ ጶልያ ናሃስያ ጌተትያ ብራታ ማላትያ ገዲ ደእያዌ፥ ሀዋዳን ያጌ።19ታን ነ ኦሱዋ፥ ነ ሲቁዋ፥ ነ አማኑዋ፥ ነ ማዱዋነ ነ ገንጩዋ ኤራይ፤ ኔን ኮይሮ ኦያዋፐ ሀእ ዳርሳደ ኦያዋ ታን ኤራይ።20ሽን ታን ኔና ካያባይ ደኤ፤ ባረና፥ ታን ናባቶ ያግያ ምሽራቶ ኤልዛቤሎ ሸነኮ ጋዳ፤ ሄ ምሽራታ ታ ኦሳንቻቱ ዎሹማናዳንነ ኤቃዉ ያርሼዳ ቁማ ማናዳን፥ ታማርሳዉነ ባለዉ።21እዛ ባረ ናጋራፐ ስማና ማላ፥ ታን እዝዉ ዎድያ እማድ፤ ሽን ዎሹማናዉ ካጄልያዋፐ እዛ ስማናዉ ኮያበይኩ።22በእተ፥ ታን እዞ ግሱዋን ኩንድስና፤ ሳኩዋን እዛ ዋየታና። እዝና ዎሹምያዋንቱ ሄ እዝና ኦያ ናጋራፐ ስማና ዮፐ፥ ኡንቱንታካ ዎልቃማ ዋይያን የጋና።23ታን እዝ ናናካ ዎና፤ ቃይ ዎሳ ጎልያ ኡባይካ ታን አሳ ቆፋነ አሙዋ ኤርያዋ ግድያዋ ኤራና፤ ታን ህንተንቶ ህንተንቱ ኪታ ማላ እማና።24“ትያጽሮነን ደእያ ሀራቶ፥ ሀ ኢታ ትምርትያ ታማርቤናዋንቶ፥ ሀራቱ፥ ሴጻና ጪሞ የዉዋ ግያዋ ህንተንቱ ታማርቤይክታ፤ ታን ህንተንታ ሀራ ዴጹዋ ቶስከ ጋይ።25ሽን ታን ያና ጋካናዉ ህንተንቶ ደእያዋ ሎይ ናግተ።26“ጾኔዳዎነ ዉርሰይ ጋካናዉ፥ ታ ኪታ ናጌዳዎ፥ አሳ ዛርያ ኡባ ሞዳና ማላ፥ ታን ታ አዉዋፐ አኬዳ ማታ ማላ አዉ እማና፤27“እ አሳ ዛርያ ኡባ ብራታ ጻምኣን ሞዳናነ፥ኡርቃፐ መታ ሚሻ መንያዋዳን መንና።28ቃይ ታን አዉ ባካልያ ጾልንትያ እማና።29ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ”
ያጋደ ጻፋ።
The Word for the World International