ዎጋ24

ጾምፐቱዋ ናጉዋ

1መና ጎዳይ ሙሳ ሀዋዳን ያጌዳ፥2“ጾምፒ ቶኤናን ኤጺደ ደአና ማላ፥ አሳይ ኮሽያ ዛይትያ ዎጋራ ቴራ ጫዲደ ጉምእና ከስያ ጌሻ ነዉ አሀና ማላ፥ እስራኤላቱዋ አዛዛ።3መና ጎዳ ዱንካንያ ግዶን ደእያ ማርካተ ጋርዱዋፐ ካረ ባጋና፥ ኦማርሳፐ ዎንታ ጋካናዉ፥ አሮን መና ጎዳ ስንን ሄ ጾምፕያ ኡባ ዎደ ኤ። ስንና ይያ የለታዉ ኡባዉ ሄዌ መናዉ ዎጋ።4ጾምፕያ ዎያ፥ ዋላካይ ባይና ዎርቃ ባላ ቦላ ደእያ ጾምፐቱ መና ጎዳ ስንን ኡባ ዎደ ኤጻናዳን አሮን ናጎ።

ጾሳዉ ሺሽያ ኡክ

5“ላታማነ ኦይዱ ኪሎ ግራመ ግድያ ሊቆ ልያ አካደ ታማነ ላኡ ኡክ ኡካ።6ሄ ኡክቱዋ ኡሱፑናቱዋ እቱዋ እቱዋ ቦላ ኡሱፑናቱዋ እቱዋ እቱዋ ቦላን መና ጎዳ ስንን ደእያ ዋላካይ ባይና ዎርቃ ጻራጴዛ ቦላን ዎ።7መና ጎዳዉ ታማን ጹጋናዉ ሺሼዳ ቁማ ያርሹዋ ግድያዋ ኤርሳናዉ፥ ላኡ ማራቱዋ ማታን ማታን ጌሻ እጻና ሀሳይስያዋ ኦደ ዎ።8ሀ ኡክ ሳምባታን ሳምባታን ኡባ ዎደ አሮን መና ጎዳ ስንን እስራኤልያ አሳ ድራዉ ዎ። ሄዌ እስራኤልያ አሳይ ኡባ ዎደ ኦናዉ ኮሽያ ቃላ ጫቁዋ።9ሄዌ አሮናዉነ አ አቱማ ናናቶ እመቶ፤ እ መና ጎዳዉ ታማን ጹግያ ያርሹዋፐ ዎጋዳን አሮናነ አ ናናቱዋ ጋክያ ኡባፐ ጌሻ ግዴዳ ያርሹዋፐ እቱዋ ግድያ ጌሻ ያርሹዋ ግድያ ድራዉ፥ ኡንቱንቱ ሄዋ ጌሻ ሳኣን ሚኖ” ያጌዳ።

ልከነ ሱረ ፕርዳ ሌምሱዋ

10አታ እስራኤልያ አሳ፥ አዉ ቃይ ግብጼ አሳ ግድያ እት ብታኒ ደኤ። እት ጋላስ እ ሀራ እስራኤልያ አሳ ግድያ እቱዋና ዱንካኔዳ ሳኣን ዋቴዳ።11ሀ አዉ አታ እስራኤልያ አሳ ግዴዳ ብታኒ ዋታ ግዶን ጾሳ ሱን ሸቄዳ። ያትና አ ሙሴኮ አሄድኖ። ሄ ብታንያ አታ ዳና ያራ ግድያ ጺብራ ናቶ። እ ሱንይካ ሻሎሚቶ።12ሀ ብታንያ ዋታነንቶ መና ጎዳ ሸኒ ኡንቱንቶ ቆንጫና ጋካናዉ፥ ኡንቱንቱ አ ቃሾ ጎልያን ዎድኖ።
13መና ጎዳይ ሙሳ ሀዋዳን ያጌዳ፥14“ሄ ሸቀዳ ብታንያ ዱንካኔዳ ሳኣፐ ጋጻ ከሳ፤ እ ሸቅሽን ስሴዳ አሳይ ኡባይ ባረንቱ ኩሽያ አ ሁጲያ ቦላን ዎኖ፤ ያቶፐ እስራኤልያ አሳ ማባራይ ኡባይ አ ሹቻን ጫዲደ ዎ።15እስራኤልያ አሳዉ ሀዋዳን ያጋደ ኦዳ፤ አይ አሳይነ ባረ ጾሳ ሸቆፐ፥ እ ባረ ናጋራን ኦሸቴ።16መና ጎዳ ሱን ሸቂያ አሳይ ሀይቆ፤ እስራኤልያ አሳ ማባራይ ኡባይ አ ሹቻን ጫዶ። በቲደ ዬዳዋ ግድና ዎይ ቢታ አሳ ግድናካ መና ጎዳ ሱን ሸቆፐ ሀይቆ።
17“ ‘አሳ ዎያ አሳይ ሀይቆ።18አሳ መህያ ዎያ አሳይ ኦንነ ባረ ዎዳ መህያ ድራዉ ፓጻ መህያ ጭጎ።19እት አሳይ ባረ ሾሩዋ ቆሆፐ፥ እ ኦዳዋዳን አ ቦላንካ ኦሰቶ።20መንፐ መኦ፤ አይፍያ ድራዉ አይፍያ፤ አቻ ድራዉ አቻ። አሳ ቦላን ቆሁዋ ጋዳ ኦንካ እ ጋዳ ቆሁዋ ማላይ አ ቦላንካ ጋኮ።21መህያ ዎዳ አሳይ መህያ ጭጎ፤ ሽን አሳ ዎዳ አሳይ ሀይቆ።22በትያዉካ እስራኤልያ አሳዉ ህጊ እት ማላ ግዶ፤ አያዉ ጎፐ ታን መና ጎዳ ህንተ ጾሳ’ ያጋ” ያጌዳ።
23ሄዋ ኡባ ሙሴ እስራኤልያ አሳዉ ኡባዉ ኦዴዳ፤ ኡንቱንቱ ሄ ሸቀዳ ብታንያ ዱንካኔዳ ሳኣፐ ጋጻ ከሲደ፥ ሹቻን ጫዲደ ዎድኖ። ያቲደ እስራኤልያ አሳይ መና ጎዳይ ሙሳ አዛዜዳዋዳን ኦድኖ።

The Word for the World International

https://app.library.bible/content/812ecd29a9e60fdc