Leia ኤርማሳ 31

ኤርማሳ31

እስራኤልያ አሳይ ባረ ቢታ ስማና

¹መና ጎዳይ ሀዋዳን ያጌ፤ “ሄ ዎደ ታን እስራኤልያ ያራቶ ኡባዉ ጾሳ ግዳና፤ ኡንቱንቱካ ታ አሳ ግዳናዋ” ያጌ።

²መና ጎዳይ ሀዋዳን ያጌ፤ “አዳፐ ፓላሄዳ አሳይ ታፐ አ ኬካተ መላ ቢታን ደሜዳ። እስራኤልያ አሳይ ሸምፕ አካናዉ ኮዬዳ ዎደ፥³ታን መና ጎዳይ ኡንቱንቶ ሃኮ ሳፐ ሀዋዳን ያጋደ ቆንጫድ፤ ‘እስራኤልያ አሳዉ፥ ታን ህንተና መና ሲቁዋን ሲቃይ፤ ታ አገና ሲቁዋን ታን ህንተና ታኮ ሺሻድ።⁴እስራኤልያ አሳዉ፥ ታን ህንተና ዛረደ ኬጻና፤ ህንተካ ኬጸታና። ዛረደካ ካራቡዋ ኦይቂደ፥ ናሸትያዋንቱና የጻናነ ዱራና።⁵ህንተ ዛረደካ ሳማርያ ዞዘቱዋ ቦላ ዎይንያ ቱራቱዋ ቶካና፤ ቶኬዳዋንቱ አ ቴራን ናሸታና።⁶ኤፍሬማ ገዝያን ናግያዋንቱ፥ “ሃይተ፤ መና ጎዳኮ፥ ኑ ጾሳኮ፥ ፑደ ጽዮነ አነ ቦይተ!” ያጊደ ጼስያ ዎዲ ያና’ ያጋድ” ያጌ።

⁷መና ጎዳይ ሀዋዳን ያጌ፤ “ያቆባ አሳዉ ናሸቻን የጽተ፤ ካዉተቱዋ ኡባፐ አያ እስራኤልያዉ ሆምቦጭተ። መና ጎዳይ እስራኤልያ አሳፐ አቴዳዋንታ አሼዳ ያጊደ ጋላታ ማዛሙርያ የጽተ።⁸በእተ፥ ታን ኡንቱንቱ ሁጲሳ ባጋ ቢታፐ አሀና፤ ሳኣ ጋጻፐካ ታን ኡንቱንታ ሺሻና። ቆቀቱ፥ ዎባቱ፥ ሻሃራ ማጫ አሳቱነ ኦይይ ኦይቄዳ ማጫ አሳቱ ኡንቱንቱና እትፐ ያና፤ ሎይ ዳሮ አሳይ ባረ ቢታ ስማና።⁹ታን ኡንቱንታ ዛራደ አህያ ዎደ፥ ኡንቱንቱ ናሸቻ ዳሩዋን ዬኪደነ ዎሲደ ያና። ታን ኡንቱንታ ሻፋ ላንቂያና፥ ኡንቱንታ በና ስታ ኦግያና ካለና። አያዉ ጎፐ፥ ታን እስራኤልያ አሳዉ አዉዋ፤ ኤፍሬምካ ታዉ ባይራ ናኣ።

¹⁰“ህንተኖ፥ ካዉተቶ፥ መና ጎዳ ቃላ ስስተ! ሃኮ ሳን፥ አባ ዶናን ደእያ ቢታቱዋን ሀዋዳን ያጊደ አዋይተ፤ ‘እስራኤላቱዋ ላሌዳዌ እ ኡንቱንታ ሺሻና፤ ቃይ ሄንንቻይ ባረ ዉድያ ዶርሳ ሄምያዋዳን፥ እ ኡንቱንታ ሄማና’ ያግተ።¹¹አያዉ ጎፐ፥ መና ጎዳይ ያቆባ ዛራቱዋ ዎዜዳ፤ እ ኡንቱንታ ኡንቱንቱፐ ምንያዋንቱፐ ኩሽያፐ አሼዳ።¹²ኡንቱንቱ ዪደ ጽዮነ ደርያን ናሸቻዉ የጻና፤ ኡንቱንቱ መና ጎዳይ እምያ ኬካተን፥ ካን፥ ዎይንያ ኤሳን፥ ዛይትያን፥ ዶርሳ ማራቱዋንነ ሚዛ ማራቱዋን ናሸታና። ኡንቱንቱ ሃ ሎይ ኡሼዳ አታክልትያ ሳኣ ማላ ግዳናዋ፤ ኡንቱንቱ ላኤን ሹልክኖ።¹³ሄ ዎደ ጌላዮቱ ናሸቲደ ዱራና፤ ዎዳላቱካ ጭማቱካ ናሸታና። ታን ኡንቱንቱ ዬኩዋ ናሸቻዉ ላማና፤ ታን ኡንቱንታ ምንና፤ ኡንቱንቱ ካዩዋ ድራዉ ታን ኡንቱንታ ናሸቻና።¹⁴ታን ቄሳቶ ዳሮ ቁማ እማና፤ ታ አሳይካ ታ ኬካተን ካላና። ታን መና ጎዳይ ሀዋ ኦዳይ” ያጌ።

ጾሳይ እስራኤልያ ማሬዳ

¹⁵መና ጎዳይ ሀዋዳን ያጌ፤ “ዬኩነ ዝላሳይ ራማ ግያ ካታማን ስሰቴዳ፤ ራሄላ ባረ ናናቶ ዬካዉ፤ ኡንቱንቱ ዬዳ ድራዉ፥ አጋ ጊና፥ አገናን እጻዱ” ያጌ።

¹⁶መና ጎዳይ ሀዋዳን ያጌ፤ “ዬክያዋ አጊደ፥ ህንተ አይፍያ አፎ ቁጭተ። አያዉ ጎፐ፥ ህንተ ኦዳ ኦሶ ዎይቱዋ ህንተ አካና፤ ሞርክያ ቢታፐ ህንተ ናናቱካ ስማና። ታን መና ጎዳይ ሀዋ ኦዳይ።¹⁷ህንተ ናናቱ ባረንቱ ቢታ ስማናዉ ደእያ ድራዉ፥ ህንተዉ ስንናዉ ህዶታይ ደኤ። ታን መና ጎዳይ ሀዋ ኦዳይ።

¹⁸“ኤፍሬማ ዛረ ካዮቲደ፥ ሀዋዳን ያጊደ ኦድያዋ ቱሙዋፐ ታን ስሳድ፤ ‘ኔን ኑና ዋትቤና ኮሩማዳን ዋዳ፤ ኑንካ አዛዘትቦኮ። ኔን መና ጎዳ ኑ ጾሳ ግድያ ድራዉ፥ አነ ኑና ዛራ፤ ኑን ኔኮ ስማና።¹⁹ኑን ካሰ ኔፐ ዎራ ስሚደ ቤዶ፤ ሽን ሀእ ፓጼዶ። ኔን ኑና ሙራ ስምና ዬላቲደ፥ ኑ ትራ ባቄዶ፤ ኑን ኑ ያላጋተ ላይ ናጋራ ድራዉ፥ ካዉሼዶነ ዬላቴዶ’ ያጌድኖ።

²⁰“ቱሙ ኤፍሬመ ታዉ አልኦ ናኣ ግደኔ? እ ታን ሲቅያ ናኣ ግደኔ? ኤ! ታን ዳሮ ገደ አ ሱን ደንዳ ዎደ ኡባን፥ አ ሀሳይያዋ አጋበይከ። ሄዋ ድራዉ፥ ታ ዎዛናይ አ ላሞቴ፤ ታን አዉ ሎይ ቃረታይ። ታን መና ጎዳይ ሀዋ ኦዳይ።

²¹“ኦግያን ማላ ዎተ፤ ማላ ምቱዋካ ኤስተ። ያቲደ ህንተ ቤዳ ኦግያ አኬክተ። እስራኤልያ አሳዉ፥ ስምተ፤ ህንተ ካታማቱዋኮ ስምተ።²²ህንተኖ፥ አማኑ ባይና እስራኤላቶ፥ አዉደ ጋካናዉ ቶይላካታንቴ? መና ጎዳይ ሳኣ ቦላን እት ኦራባ መና፤ ሄዌነ፥ ማጫ አሳይ አቱማ አሳ ዩሹዋን ኤቃና።”

ጾሳ አሳይ ስንናዉ እሻላና

²³ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ “ታን እስራኤልያ አሳ ኦሞዱዋፐ ዛራደ አህያ ዎደ፥ ይሁዳ ቢታንነ አ ካታማቱዋን ኡንቱንቱ ላኤንዋ፥ ‘ኔኖ ጽሎተይ ደእያ ሳአዉ፥ ነኖ ጌሻ ደርያዉ፥ መና ጎዳይ ኔና አንጆ’ ያጋና።²⁴ይሁዳነ ይሁዳን ደእያ ካታማቱዋን ኡባን አሳይ ደአና፤ ጎሻንቻቱካ ዉድያና ዩይያ ሄንንቻቱካ ያን ደአና።²⁵ታን ዳቡራንቻቱዋ ዎልቃ ኦራና፤ ቃይ ኮሻቲደ ግልቄዳዋንታካ ካልሳና” ያጌ።

²⁶ሄዋን ቤጎታደ ታ ዩሹዋ ጼላድ፤ ታ ገምእሹካ ታዉ ማልኦ ገምእሹዋ ግዴዳ።

²⁷መና ጎዳይ ሀዋዳን ያጌ፤ “ታን እስራኤልያ ቢታንነ ይሁዳ ቢታን አሳነ መህያ ኩንያ ዎዲ ያና።²⁸ኡንቱንቱ ቆላናዉ፥ ኮላናዉ፥ አ አ የጋናዉ፥ ይሳናዉነ ባየ አሀናዉ ዶሳደ ናጌዳዋ ኬሻ፥ ኡንቱንታ ዛራደ ግምባናዉነ ቶካናዉ ዶሳደ ናጋና። ታን መና ጎዳይ ሀዋ ኦዳይ።

²⁹“ሄ ዎደ አሳይ፥ ‘አዎቱ ጋምኤ ዎይንያ ቴራ ሚና፥ ናናቱዋ አቻይ ዝልኤዳ’ ያጊደ ሃሳይያዋ አጋና።³⁰ሽን አሳይ እቱ እቱ ባረ ናጋራን ናጋራን ሀይቃና፤ ጋምኤ ዎይንያ ቴራ ምያ አሳ ኡባዉ አ አቻይ አቻይ ዝልአና” ያጌ።

³¹መና ጎዳይ ሀዋዳን ያጌ፤ “ታን እስራኤልያ አሳናነ ይሁዳ አሳና ኦራ ጫቁዋ ጫቀትያ ጋላሳቱ ያና።³²ሄ ጫቁ ታን ኡንቱንታ ግብጼፐ ከሳናዉ ኡንቱንቱ ኩሽያ ኦይቄዳ ዎደ፥ ኡንቱንቱ ማይዛ አዎቱዋና ጫቀቴዳ ጫቁዋ ማላ ግደና፤ ታን ኡንቱንቶ አስና ማላ ግዳ ኡትናካ ኡንቱንቱ ታ ጫቁዋ መንድኖ። ታን መና ጎዳይ ሀዋ ኦዳይ።³³ሽን ታን መና ጎዳይ ሄ ጋላሳቱዋፐ ጉይያን እስራኤልያ አሳና ጫቀታና ጫቁ ሀዋ: ታን ታ ህግያ ኡንቱንቱ ግዶን ዎና፤ ቃይ ኡንቱንቱ ዎዛናንካ ጻፋና። ታን ኡንቱንቱ ጾሳ ግዳና፤ ቃይ ኡንቱንቱካ ታ አሳ ግዳና።³⁴አሳይ ባረ ሾሩዋ ዎይ ባረ እሻ፥ ‘መና ጎዳ ኤራ’ ያጊደ ታማርስያዋ አጋና፤ አያዉ ጎፐ፥ ጉፐ ዶሚደ፥ ዎጋ ጋካናዉ፥ ኡንቱንቱ ኡባይ ታና ኤራና። ታን ኡንቱንቱ ናቁዋ አቶ ጋና፤ ኡንቱንቱ ናጋራካ ላኤን ሀሳይከ። ታን መና ጎዳይ ሀዋ ኦዳይ” ያጌ።

³⁵መና ጎዳይ፥ አዋ ጋላሳን ፖእሴዳዌ፥ አግናይነ ጾልንተቱ ቃማን ፖአናዳን ህግያ ዎዳዌ፥ አባካ ቃደ፥ ቤታይ ጉማናዳን ኦያዌ፥ ኡባፐ ዎልቃማ መና ጎዳ ጌተትያዌ፥ ሀዋዳን ያጌ፤³⁶“ሀ ኤቂደ ደእያ መታ ህጊ ታ ስንፐ ክቾፐ፥ ሄ ዎደ እስራኤልያ ዘረቱ ታ ስንን መናዉ ታ አሳ ግዲደ ደእያዌ አታናዋ። መና ጎዳይ ሀዋ ኦዳይ” ያጌ።

³⁷መና ጎዳይ ሀዋዳን ያጌ፤ “ቦላ ሳሎቱ ልከታናዉ፥ ዎይ ጋርሳ ሳኣ ባሱካ ኤረታናዉ ዳንዳዮፐ፥ ሄ ዎደ ታን እስራኤልያ ዘረቱዋ ኡባ፥ ኡንቱንቱ ኦዳ ባይዙዋ ኡባ ድራዉ፥ ታ ስንፐ ድጋና። ታን መና ጎዳይ ሀዋ ኦዳይ” ያጌ።

³⁸መና ጎዳይ ሀዋዳን ያጌ፤ “ሀናንኤላ አዱሳ ግምቢያፐ ዶሚደ፥ ዞዝያ ፐንግያ ጋካናዉ፥ የሩሳላመ ካታማይ ታዉ፥ ጾሳዉ፥ ካታማ ግዲደ፥ ስሚደ ኬጸትያ ጋላሳቱ ያና።³⁹ሄ ካታማ ዛዋይካ አዋይ ዉልያ ባጋፐ ካል ቢደ፥ ጋሬባ ዞዝያነ ጎአ ዩሹዋ ጋካናዉ አካና።⁴⁰አሃ ሞግያነ ብድን ኦልያ ዛንጋራይነ ቀድሮና ዛንጋራፐ ቆሞና አዋይ ዶልያ ባጋ ባጋና ቢደ፥ ፓራ ፐንግያ ዞዝያ ጋካናዉ ደእያ ጋድያ ኡባይ መና ጎዳዉ ዱማቲደ፥ ጌሻ ግዳናዋ። ሀዋፐ ስንናዉ ካታማይ መናዉ ሾደተናነ ኮለተና” ያጌ።

The Word for the World International

https://app.library.bible/content/812ecd29a9e60fdc