ኢስያሳ57
እስራኤላቱ ኤቃዉ ጎይንያ ጎይኑ ፕርደቴ
1ጽሎ አሳይ ሀይቄ፤ ሽን ሄዋ አኬኪደ ቆፕያዌ ባዋ። ባረና ጾሳዉ እሜዳ አሳቱ ጋድያፐ ዪኖ፤ ሽን ጽሎ አሳይ ባሻይ ያናፐ ካሰቲደ አከትያዋ ኦንነ አኬከና።2እ ቢደ ሳሮተይ ደእያ ሳኣ ገሌ። ሱረተን ሀመትያዋንቱ ሀይቂደ ሸምፑዋ ደሚኖ።3ጾሳይ ሀዋዳን ያጌ፤ “ህንተኖ፥ ሻሬቻት ናቶ፥ ህንተኖ ዎሹምያንነ ሻርሙጽያን ዘረቶ፥ ሃይተ።4ህንተ ኦ ቦላ ቅሊጪቴ? ህንተ ኦና ህንተ ዶናን ቦቺቴ? ህንተ እንጻርሳካ ኦ ቦላ ከሲቴ? ህንተ ማካላንቻቱዋ ናናቱዋነ ዎርዳንቻቱዋ ናናቱዋ ግድክቴ?5ህንተ ዎላ ግዱዋንነ ዳሻ ም ኡባ ጋርሳን አሙዋን ጹገቲታነ ቱናባ ኦታ፤ ህንተ ናናቱዋካ ዛንጋራ ሾባንነ ሹቻ ጎንጎሉዋን ሹኪደ ያርሺታ።6ዛንጋራ ሾባን ደእያ ሊቆ ሹቻቱ ህንተ ጾሳቱዋ። ህንተ ኡንቱንቶ ኡሻ ያርሹዋ ትጌድታ፤ ካ ያርሹዋካ እሜድታ። ያትና፥ ታን ሀዋን ኡባን ናሸትያዋ ህንተንቶ ማላቲ?7ሎይ ቃነ አዱሳ ደርያ ሁጲያን ህንተ ግሱዋ የጌድታ፤ ያን ያርሻናዉ ፑደ ከሴድታ።8ህንተ ፐንግያፐነ ቆስለፐ ሶ ባጋና ኤቃ ምስለቱዋ ኤሴድታ። ታና አግ ባሺደ፥ ህንተ አርሳ አሲደ፥ ያ ፑደ ከሴድታ። ኡንቱንቱና ጫቁዋ ጫቀቴድታ፤ ያቲደ ኡንቱንቱ አርሳ ዶሴድታ፤ ኡንቱንቱ ካሉዋካ በኤድታ።9ዛይትያ አኪደ፥ ሞሎካ ግያ ኤቃኮ ቤድታ፤ ህንተ ሽቱዋካ ዳርሴድታ፤ ህንተዉ ኪተትያዋንታ ሃኮ ሳ ኪቴድታ፤ ሀራይ አትና፥ ስኦልያ ጋካናዉ ዎድታ።10ህንተ ሀራ ጾሳቱዋ ኮዪደ ዳቡሬድታ፤ ሽን፥ ‘ህዶት ባዋ’ ያግበይክታ። ህንተ ዎልቃይ ሃ ኦራጼዳ፤ ሄዋ ድራዉ፥ ላባኒደ ኩንድበይክታ።11“ህንተ ኦስ ያዪደ፥ ታዉ ዎርዶቴድቴ? ህንተ ታና ሀሳይበይክታ፤ ህንተ ዎዛናንካ ቆፕበይክታ። ታን ዳሮ ዎድያ ጮኡ ጌዳ ድራዉ ግደኔ፥ ህንተ ታዉ ያየናን አጌዳዌ?12ታን ህንተ ጽሎተነ ህንተ ኦሶቱዋ ቆንጭሳና፤ ሽን ህንተና አይነ ጎእክኖ።13ህንተ ዋስያ ዎደ፥ ህንተ ሺሼዳ ኤቃቱ ህንተና አሽኖ! ኡንቱንታ ኡባካ ጫርኩ አክ አፋና፤ እቶደን ሸምፕያ ሸምፑ ኡንቱንታ ፑን ይሳና። ሽን ታና ባረዉ ባቃት አትያሳ ኦያ አሳይ ቢታ ላታና፤ ታ ጌሻ ደርያካ እ አካና” ያጌ።ጾሳይ ባረ አሳ ማዳናዉነ ፓናዉ እሜዳ ህዶታ
14ጾሳይ ሀዋዳን ያጌ፤ “ግምቢተ፥ ግምቢተ! ኦግያካ ጊግስተ፤ ታ አሳ ኦግያፐ ቢያዋ ኡባ ድግተ” ያጌ።15አያዉ ጎፐ፥ መናዉ ደእያዌ፥ ግታይ፥ ቃን ደእያዌ፥ አ ሱንይካ ጌሻ ጌተትያዌ፥ ሀዋዳን ያጌ፤ “ታን ቁ ጌዳነ ጌሻ ሳኣን ደአይ፤ ግዶፐነ፥ ባረንቱ ኦዳ ናጋራዉ ካዮቲደ ስምያዋንቱናነ ባረና ዝቂ ኦያዋንቱና ደአይ። ያታደ ታን ባረንቱ ኦዳ ናጋራዉ ካዮቲደ ስምያዋንቱ አያናነ ባረና ዝቂ ኦያዋንቱ ዎዛና ኦራጽሳይ።16ታን መናዉ ሞትከ፤ ኡባ ገደካ ሀንቀትከ። አሳ አያናይ፥ ታን መዳ አሳ ሸምፑ ዳቡራና።17ኡንቱንቱ ናጋራ ጋሱዋንነ ኡንቱንቱ ያርያ ጋሱዋን፥ ታን ኡንቱንታ ሀንቀታድ። ኡንቱንታ ሾጫድ፤ ታ ስንካ ኡንቱንቱፐ ገንድ። ሽን ኡንቱንቱ ሀእካ ስሚደ፥ ባረንቱ ዎዛና ቆፋን ቤድኖ።18ታን ኡንቱንቱ ኦገቱዋ በኣድ፤ ሽን ታን ኡንቱንታ ፓና፥ ካለናነ ዬክያዋንታ ምንና።19እስራኤልያ ጋድያን ዬክያዋንቱ መተርሻን ጋላታ ዎና። ሃኩዋንነ ማታን ደእያዋንቶ ሳሩ ግዶ። ታን ኡንቱንታ ፓና” ያጌ መና ጎዳይ።20ሽን ኢታቱ ቡሉቂያነ ኡርቃ ፑደ ፑሻክያ፥ ዎፑ ጋናዉካ ዳንዳየና አባ ቤታ ማላ።21ታ ጾሳይ፥ “ኢታቶ ሳሩ ባዋ” ያጌ።The Word for the World International