ኢስያሳ54
ጾሳይ እስራኤልያ ሲቅያ ሲቁዋ
1መና ጎዳይ ሀዋዳን ያጌ፤ “ሀነ፥ የላቤና ማይናቴ፥ የጻ! ኔኖ፥ ኦይይ ኦይቂ ኤረናኔ፥ ነ ቃላ ቁ ኦደ እልላ! አያዉ ጎፐ፥ ባረ አስናና ደእያ ማጫን ናናቱዋፐ፥ ባረካ ደእያ ማጫን ናናይ ዳራና።2ነ ዱንካንያ ሳኣ አሳ፤ ቃይ ኔን ደእያ ሳኣን ጋርዳቱዋካ ፕድ ኦደ ምጫ። ጉየ ጎፓ፤ ዎዶሩዋካ አዱሳ፤ ሽካልያካ ምንሳ።3ኔን ኡሸቻ ባጋናነ ሀድርሳ ባጋና አካና፤ ነ ዛራቱ ካዉተቱዋ ላታና፤ ኡንቱንቱ መላ ካታማቱዋን ኬጺደ ኡታና።4“ያዮፓ፤ አያዉ ጎፐ፥ ኔን ዬላታካ። ዳጋሞፓ፤ አያዉ ጎፐ፥ ኔን ካዉሻካ። ኔን ነ ያላጋተ ዬላ ዶጋና፤ ነ አምኤተ ቦርያካ ሀዋፐ ስንን ሀሳያካ።5አያዉ ጎፐ፥ ኔና መዳዌ ነዉ አስና፤ አዉ ሱንይካ ኡባፐ ዎልቃማ መና ጎዳ። እስራኤልያ ጌሻይ ኔና ዎዜዳዋ፤ እ ቢታ ኡባ ጾሳ ጌተቴ” ያጌ።6ነ ጾሳይ ሀዋዳን ያጌ፤ “አስናይ ኡባና አግ ባሽና፥ ዶገታደ ካዮትያ ማጫ ምሽራቲዳንነ ያላጋተን አስና ጎለፐ ከሴዳ ምሽራቲዳን ኔን ሀና ደእሽን፥ ታን መና ጎዳይ ኔና ዛራ ጼሳድ።7“እት ጉ ዎድያዉ ታን ኔና አጋድ፤ ሽን ዎልቃማ ማሮታን ኔና ታን ዛራ ሺሻና።8ሱልያ ሀንቁዋን፥ ታን ታ ዴሙዋ ኔፐ ጉ ዎድያዉ ገንድ፤ ሽን መና ሲቁዋን ታን ነዉ ቃረታና” ያጌ። መና ጎዳይ፥ ኔና ዎዝያዌ ሀዋ ኦዴ።9ነዉ ቃረትያ መና ጎዳይ ሀዋዳን ያጌ፤ “ሀዌ ታዉ ኖሄ ዎድያ ማላ። ሄ ዎደ ታን ኖሄ ዎዴ ባሻ ሃይ ላኤንዋ ሳኣ ምተናዳን ጫቃድ፤ ሄዋዳንካ፥ ኔና ላኤን ሀንቀተናንነ ሴረናን አጋናዉ ታን ጫቃድ።10ደረቱ ቃጻናዉ፥ ዞዘቱካ ባረንቱ ደኢያሳፐ ክቻናዉ ዳንዳዪኖ፤ ሽን ታ አገና ሲቁ ኔፐ ሻከተና፤ ታ ሳሮተ ጫቁካ ክቼና” ያጌ።11ጾሳይ ሀዋዳን ያጌ፤ “ኔኖ፥ መቶቴዳ ካታማቴ! ጎቲ ያነ ሃነ ሾጬዳነ፥ ምንያብ ዬዳነ፥ በአ፥ ታን ኔና ቦንቾ ሹቻን አሌቂሳደ ኬጻና፤ ነ ባሱዋንካ ሳምፔርያ ግያ ሹቻ ሂጻና።12ነ አዱሳ ሹቻ ግምቢያን ደእያ ጉምቡዋ ታን እንቁዋ ግያ ዳሮ አልኦ ዞኦ ሹቻን ግምባና፤ ነ ፐንግያ ጶልያ አልኦ እንቁዋን፥ ነ ድርሳ ኡባካ ቦንቾ ሹቻን ግምባና።13ነ አቱማ ናናቱዋ ኡባ መና ጎዳይ ታማርሳና፤ ነ ናናቱ ሳሮተይካ ዳራና።14ኔን ጽሎተን ምናደ ኤቃና፤ ሱገይነ ኡቁናይ ኔፐ ሃካና። ኔን አያዉካ ያያካ፤ ዳጋማይካ ኔኮ ሺቀና።15ኔና ኦላናዉ ደንድያዌ ደኦፐ፥ ሄዌ ታ ሸንያ ኦና፤ ታን ነ ባጋ ግድያ ድራዉ፥ ኔና ኦላናዉ ደንድያ ኡባይ ኩንዳና።16“በአ፥ ዎምፒናን ታማ ፑኒደ፥ ባረ ሀልቾ ሀንያ ኦላ ሚሻ ቆጽያ አሳቱዋ ታን መድ። ቃይ ባይዛናዳን፥ ባይዝያዋንታካ ታን መድ።17ኔና ቆሀናዉ ኦዳ አይ ሚሻይነ ኔና ቆሂደ ካን ከሰና። ኔና ሞትያ እንጻርሳ ኡባዉ ግድያ ዛሩዋ ኔን እማና። መና ጎዳ ቆማቱ ላታይ ሀዋ፤ ኡንቱንታ ታን ሻትንና” ያጌ። መና ጎዳይ ሄዋ ኦዴ።The Word for the World International