ኢስያሳ52
ጾሳይ የሩሳላመ አሻና
1ኔኖ ጽዮነ ካታማዉ፥ ቤጎታ፤ ምኖተ አፍላዳን ማያ። ኔኖ፥ ጌሻ ካታማዉ፥ የሩሳላመ፥ ነ ቦንቹዋ ማዩዋ ማያ፤ አያዉ ጎፐ፥ ሀዋፐ ስንናዉ ቃጻረትቤናዌነ ቱናይ ነ ግዶ ገለና።2ኔኖ፥ ኦሞደቴዳ የሩሳላመ፥ ነ ባና ቆቆፋ። ደንዳዴ ነ ካተቱዋ አራታን ኡታ። ህንተኖ፥ ኦሞዱዋን ደእያ ጽዮነ አሳቶ፥ ህንተ ቆያን ቃሸቴዳ ሳንሳላታ ብርሽተ።3አያዉ ጎፐ፥ ኡባ ሞድያ ጾሳይ ሀዋዳን ያጌ፤ “ህንተ ካሰካ ጋትያ አከናን ዛልኤቴድታ፤ ቃይ ሀእካ ሚሻ እመናን ጮ ዎዘታና።4ታ አሳይ ኮይሮ በተ ግዲደ፥ ግብጼ ቢታ ቤዳ፤ ሽን አሶረቱ ታ አሳ ጮ ኡቁኔድኖ።5መና ጎዳይ፥ ታ አሳይ ጋትያ ጭገናን ጮ ኦሞዱዋን ብ ክችና፥ ታዉ ሀዋን አዬ ደእያዌ? ኡንቱንታ ሞድያዋንቱ ዋሲኖ፤ ታ ሱንይካ ኡባ ገደ ጋላሳ ኩመን ቦረቴ ያጌ መና ጎዳይ።6ሄዋ ድራዉ፥ ታ አሳይ ታ ሱን ኤራና፤ ሄ ጋላስ ሃሳይያዌ ታና ግድያዋ ኡንቱንቱ ኤራና። ኤ ሄዌ ታና። ታን ጾሳይ ሀዋ ኦዳይ” ያጌ።7ሎኦ ምሽራቹዋ አህያ፥ ሳሮተ ኦድያ፥ ናሸችያ ምሽራቹዋ ኦድያ፥ አቶተ ኦድያነ፥ ጽዮኖካ፥ “ነ ጾሳይ ካተቴ” ጊደ ደረቱዋ ቦላና ይያ ብታንያ ገደቱ ዎት ሎእኖ!8ስስተ፥ ህንተ ካታማ ናግያዋንቱ ባረንቱ ቃላ ቁ ኦደ፥ ናሸቻዉ እትፐ የጺኖ፤ መና ጎዳይ ጽዮነ ስምያ ዎደ፥ እ ስሞዋ ኡንቱንቱ ባረንቱ አይፍያን በአና።9ህንተኖ የሩሳላመን ኮለቴዳ ሳቶ፥ እትፐ ናሸቻዉ የጽተ፤ አያዉ ጎፐ፥ መና ጎዳይ ባረ አሳ ምንዳ፤ የሩሳላመ ካታማካ ዎዜዳ።10መና ጎዳይ ባረ ጌሻ ቀስያ ካዉተቱዋ ኡባ ስንን ቆንጭሴዳ፤ ቃይ ቢታ ጋጻይ ኡባይካ ኑ ጾሳ አቶተ በአና።11ህንተኖ መና ጎዳ ጎልያ ሚሻቱዋ ቶክያዋንቶ፥ ክችተ፥ ክችተ፤ ያፐ ከስተ። ቱናባ ቦቾፕተ፤ አ ግዶፐ ከስ ክችተ። ህንተ ሁጲያዉካ ጌይተ።12ሽን ከሲደ፥ ኤለካ ከስክታ፤ ዎይ በቲደ ቢክታ፤ አያዉ ጎፐ፥ መና ጎዳይ ህንተፐ ስንዉ አደ ካለና፤ እስራኤልያ ጾሳይካ ጉየና ግዲደ፥ ህንተና ናጋና።መቱ ጋክያ ቆማ
13ጾሳይ ሀዋዳን ያጌ፤ “በእተ፥ ታ ቆማይ አኬካን ኦና፤ እ ቦንቼቲደ፥ ቁ ቁ ጋና፤ እ ሎይ ግታታና።14አ ሶምኢ አሳ ኡባዋፐ፥ አ ማላይካ አሳ ናና ኡባፐ ቆሄቴዳ፤ አ በኢደ፥ ዳሮ አሳይ ዳጋሜዳ።15ሽን ሀእ ዳሮ ካዉተቱ ኡባይ አባን ማላለታና፤ አፐ ደንዴዳዋን፥ ካተቱ ባረንቱ ዶና ኦይቃና፤ አያዉ ጎፐ፥ ኡንቱንቱ ባረዉ ኦደትቤናዋ በአና፤ ስስቤናዋካ አኬካና” ያጌ።The Word for the World International