ኢስያሳ5
ዎይንያ ቱራ ቶክያ ሳኣ ሌምሱዋ
1ታን ታ ሲቅያዎ አ ዎይንያ ቱራ ቶክያ ሳኣዋ ሲቁዋ የ የጻና።ታን ሲቅያዎቱኤቴዳ ዞዝያን ዎይንያ ቱራ ቶክያ ሳአይ ደኤ።2ቢታ ቦኪደ፥ሹቻ ቆር ከሲደ፥ኡባፐ ሎእያ ዎይንያ ቱራ ቶኬዳ።ናግያ ሻኩዋ አ ግዶን ሻኬዳ፤ዎይንያ ኤሳ ጉምኢያሳ ዎጪደ ጊግሴዳ።ሄዋፐ ጉይያን፥ ሎኦ አይፍያ አይፌ፥ያጊደ ናጌዳ፤ሽን ጫልያ አይፍያ አይፌዳ።3ያትና፥ ታ ሲቁ ሀዋዳን ያጌዳ፤“ህንተኖ፥ የሩሳላመን ደእያዋንቶ፥ህንተኖ፥ ይሁዳ አሳቶ፥ታፐነ ታ ዎይንያ ቱራ ቶክያ ሳኣፐ ግዱዋን፥ደእያ የዉዋ አነ ሀእ ፕርድተ።4ታን ታ ዎይንያ ቱራ ሳአዉ ኦዳዋፐሀራ አያ ኦናዌ አቴዴ?ሎኦ አይፍያ አይፌ ያጋደ ናግሽን፥አያዉ ጫልያ አይፍያ አይፌዴ?5ሀእ ታን ታ ዎይንያ ቱራ ሳኣ፥ኦያዋ ህንተንቶ ኦዳይ።ታን ድርሳ ሾዳና፤ሄ ቱራይካ ያናዳን ኦና።ታን ግምቢያ ኮላና፤ሄ ሳአይካ የታና።6ታን ሄ ሳኣ ባዬዳ ቢታ ኦና።ሄ ቱራይ ጹንቀተናነ ቡልኤተና፤ያትና፥ ክንድቹነ አጉንይ ያን ሞካና።እራይ አን ቡከናዳን፥ ታን ሻረቱዋ አዛዛና” ያጌዳ።7ኡባፐ ዎልቃማ መና ጎዳይ፥ዎይንያ ቱራ ሳአይ እስራኤልያ አሳ።ይሁዳ አሳይ እ ናሸትያ ዳርኩዋ።ኡንቱንቱ ሱረ ፕርዲኖ ጊደ ናጌዳ፤ሽን ሱ ጉሴድኖ።ጽሎተ ኦኖ ጊደ ናጌዳ፤ሽን ዋሶ ግዴዳ።8ሳአይ ይና፥ ህንተ ጻላላይ ጋድያ ቦላ ደአና ጋካናዉ፥ ጎልያ ጎልያ ቦላ ጉጅያዋንቶ፥ ጋድያ ጋድያና ጋያዋንቶ፥ ህንተንቶ አየ አና!9ኡባፐ ዎልቃማ መና ጎዳይ ታና ሀዋዳን ያጌዳ፤ “ሄ ዎልቃማ ጎለቱ ኦናና፤ ሄ ሎኦ ጎለቱዋን ደአናዉ አሳይ ያና።10ታሙ ዋ ቦራቱዋን ቶኬዳ ዎይንያ አይፍያፐ እት ኦቶ ግድያ ጉምኤቴዳ ዎይንያ ኤሳ ጻላላይ ከሳና፤ ታሙ ቁንአ ካ ዘርና፥ እት ቁንአ ካ ጻላላ አይፋና” ያጌዳ።11ማይያ ኡሻ ኮያናዉ ዎንታ ጉራና ደንድያዋንቶነ ዎይንያ ኤሳን ጹገታና ጋካናዉ፥ ሳኣ ቃምስያዋንቶ አየ አና!12ኡንቱንቱ ሾብያን ማስንቁ፥ ዲይ፥ ዳርቢ፥ ህጽጺነ ዎይንያ ኤሳይ ደኤ፤ ሽን ኡንቱንቱ መና ጎዳ ኦሱዋ ጋተ ጊክኖ፤ እ ባረ ኩሽያን ኦዳዋ ቦንችክኖ።13ያትና፥ ታ አሳይ አኬካ ዬዳ ድራዉ፥ ኦሞደቲደ ባና፤ ኡንቱንቱ ጋድያ አይስያዋንቱካ ኮሻን ሀይቃና፤ ኡንቱንቱ አኮ አሳይካ ኮፕሳ መላና።14ዱፉ ባረ ጎምፓ አሴ፤ ባረ ዶናካ ዛዋይ ባይናዋ ሀንጌ፤ የሩሳላመን ደእያ ዎልቃማ አሳነ የንኮ ዳሮ አሳ፥ ዋጭያዋንታነ ናሸትያዋንታ ምታና።15አሳይ ኡባይ ቶሸታናነ ካዉሻና፤ ኦቶረትያዋንቱ ኡባይካ ካዉሻና።16ሽን ኡባፐ ዎልቃማ መና ጎዳይ፥ ሱረ ፕርዳን ቁ ቁ ጋና፤ ጌሻ ጾሳይ ጌሻ ግድያዋ ባረ ጽሎተን በሳና።17ሄ ዎደ ዶርሳቱ ባረንቱ ቆሩዋን ሄመትያዋዳን ሄመታና፤ ዶርሳ ማራቱ ኮለቴዳ ዱረቱዋ ጎልያ ሳኣ ማና።18ጭሙዋ ዎዶሩዋን ናጋራ፥ ጋርያ ዎዶሩዋን ኢታተ ጎችያዋንቶ አየ አና!19“አነ ጾሳይ ኤሌሎ! ኑን በአና ማላ፥ ባረ ኦሱዋ ኤሌልሶ! ጋ! ኤ፥ ኑን ኤራና ማላ፥ እስራኤልያ ጌሻይ ቆፔዳ ቆፋይ ፖለቶ” ያግያዋንቶ አየ አና!20ኢታ ሎአ ሎኡዋ ኢታ ያግያዋንቶ፥ ማ ፖኦ ፖኡዋ ማ ኦያዋንቶነ ጫምያዋ ማልእያዋ ማልእያዋ ጫምያዋ ኦያዋንቶ አየ አና!21ባረና፥ “ታን አዳ ኤራንቻ! ታን ጭንጫ ግድክታ!” ያግ ቆፕያዋንቶ አየ አና!22ዎይንያ ኤሳ ኡሽያዋን ኤረቴዳዋንቶነ ማይያ ኡሻ ዋላካናዉ ጎብያዋንቶ አየ አና!23ማታይያ አኪደ፥ ባይዜዳዋንታ ጽልስያዋንቶነ ጽሎ አሳቶ ሱረ ፕርዳ ድግያዋንቶ አየ አና!24ታማ ላጩ ዳላ ኦይቂያዋዳንነ መላ ማታይ ኤጽ ይያዋዳን፥ ሄዋዳን ኡንቱንቱ ጻጱ ዎቃና፤ ኡንቱንቱ ጪሻይካ ባናዳን ላለት ያና፤ አያዉ ጎፐ፥ ኡንቱንቱ ኡባፐ ዎልቃማ መና ጎዳ ህግያ እጼድኖ፤ እስራኤልያ ጌሻ ቃላካ ካድኖ።25ሄዋ ድራዉ፥ መና ጎዳ ሀንቁ አ አሳ ቦላ ኤጽ ከሴ፤ እ ባረ ኩሽያ ኡንቱንቱ ቦላ ደንደ፥ ኡንቱንታ ሾጨዳ። ደረቱ ቃጺኖ፤ ሀይቄዳ አሳ አሃይ ኦግያን ቡራ ማላ ግዴ፤ ያንናካ አ ሀንቁ ስመና፤ አ ኩሺ ሀእካ ደንዴዳሳን ደኤ።26ጾሳይ ሃኩዋን ደእያ ካዉተቶ ማላታ ቃን ኤሴ፤ ሳኣ ጋጻን ደእያ ሞርከቱካ ሱይቄ። ኡንቱንቱካ ኤለካ ጃሚደ፥ ፑቱ ጊኖ።27ኡንቱንቱ ግዶን ዳቡርያባይነ ዎቢያባይ ባዋ፤ ኡንቱንቱፐ እቱነ ገምእሸና ዎይ ግሰና። ጼሳን ዳንጭያ ሳቂካ ብለተና፤ ኡንቱንቱ ጫማ ዳፉካ ዱጸና።28ኡንቱንቱ ቶራይ ሳታና ደኤ፤ ኡንቱንቱ ዎንዳፊካ ዋጸቴዳ። ኡንቱንቱ ፓራቱዋ ጹጉንይ ዛላ ሹቻ ማላ፤ ኡንቱንቱ ፓራ ጋረቱዋ ይንግረይ ጎትያ ማላ።29ኡንቱንቱ ጉዱካ ጋሞ ማላ፤ ዎዳላ ጋሞቱዋዳን ጉዲኖ፤ ኡንቱንቱ ዳሪደ፥ ባረዉ ምያዋ ኦይቂኖ፤ ቶክ አኪደ ቢኖ፤ ኡንቱንቱፐ ዎ አካናዌ ኦንነ ባዋ።30ሄ ጋላስ ኡንቱንቱ ዎልቃማ አባ ጉንዳን፥ እስራኤልያ ቦላ ጉማና፤ እት አሳይ ሄ ጋድያ ጼሎፐ፥ ማነ ዋይያ በአና፤ ፖኡካ ሻርያን ምተታና።
The Word for the World International