ኢስያሳ39
ባብሎነፐ ኪተቲደ ዬዳ አሳቱዋ
1ሄ ዎደ፥ ባላዳና ናአይ፥ ባብሎነ ካቲ ማሮዳክ ባላዳን፥ ህዝቂያስ ሀርጊደ ፓጼዳዋ ስሴዳ ድራዉ፥ ዳብዳቢያነ እሙዋ ህዝቂያሳዉ የዴዳ።2ህዝቂያስ ኪተቲደ ዬዳ አሳቱዋ ሞኬዳ። ያቲደ ባረ ሻሉዋ ምንጅያ ጎልያን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባረ ኦላ ሚሻነ ባረ ሻሉዋ ምንጅያ ጎልያን ደእያዋ ኡባ ኡንቱንታ በሴዳ። ባረ ሶን ዎይ ባረ ካዉተ ግዶን ደእያዋ ኡባፐ ህዝቂያስ ኡንቱንታ በሰናን አጌዳባይ አያይነ ባዋ።3ሄዋፐ ጉይያን፥ ትምቢትያ ኦድያ እስያስ ካትያ ህዝቂያሳኮ ዪደ፥ “ሀ አሳቱ ዋጌድኖ? ኡንቱንቱ ሀቃፐ ዬድኖ?” ያግ ኦቼዳ።ህዝቂያስ፥ “ኡንቱንቱ ታኮ ሃኮ ጋድያፐ፥ ባብሎነፐ ዬድኖ” ያጌዳ።4እስያስ ቃይካ፥ “ኡንቱንቱ ነ ሶን አያ አያ በኤድኖ?” ያጌዳ።
ህዝቂያስ፥ “ኡንቱንቱ ታ ሶን ደእያ ኡባባ በኤድኖ፤ ታ ሻሉዋ ምንጅያ ጎልያን ደእያባፐ ታን ኡንቱንታ በሳቤናባይ አያይነ ባዋ” ያጌዳ።5ሄዋፐ ጉይያን፥ እስያስ ህዝቂያሳ፥ “ኡባፐ ዎልቃማ መና ጎዳይ ግያዋ ስሳ።6መና ጎዳይ ሀዋዳን ያጌ፤ ‘ነ ካትያ ጎልያን ደእያባይ ኡባባይነ ነ ማይዛ አዎቱ ሀች ጋካናዉ ሺሼዳባይ ኡባባይ ኡባና ኦሞደቲደ፥ ባብሎነ ቢታ ባና ጋላሳቱ ያና፤ አፐ አያይነ አተና።7ቃይ ነዉ የለታና፥ ነ አሾነ ነ ሱ ግድያ፥ ነ አቱማ ዛራቱዋፐካ ኦሞደቲደ ባና፤ ቢደ ባብሎነ ካትያ ጎልያን ጎይሮ ግዲደ ኦና’ ያጌ” ያጌዳ።8ህዝቂያስ ዛሪደ፥ “ኔን ኦዴዳ መና ጎዳ ቃላይ ሎአ” ያጌዳ። አያዉ ጎፐ፥ ህዝቂያስ፥ “ታን ደኤዳ ላይን ሳሩነ ዎፓይ ደአና ግደኔ” ያግ ቆፔዳ።
The Word for the World International