ኢስያሳ36
አሶረቱ የሩሳላሞ ናሴድኖ
1ካትያ ህዝቂያስ ካተቴዳ ታማነ ኦይደን ላይን፥ አሶረ ካቲ ሳናክሬብ ግምበት ኡቴዳ ይሁዳ ካታማቱዋ ኡባ ኦሊደ ኦይቄዳ።2ሄዋፐ ጉይያን፥ አሶረ ጋድያ ካቲ ላክሻ ግያ ካታማፐ እት ዋናትያ ኦላ ጋዳዋ ጮራ ኦላንቻቱዋና ካትያ ህዝቂያሳኮ የሩሳላመ የዴዳ። ቢደ፥ ማዩዋ ሜጭያዋ ጋደ አፍያ ኦግያፐ ቆሞ ባጋና ደእያ ዳጋቴዳ ሃይ ጎግያ ሃ ማታን ኤቄዳ።3ያትና፥ ህልቂያ ናአይ ካትያ ጎልያን አዎትያ ኤልያቂመ፥ ዋና ጻፊ ሼብንነ አሳፋ ናአይ ታርክያ ጻፍያ ዮኣህ አኮ ካረ ከሴድኖ።4አሶረቱዋ ጋዳዋይ ኡንቱንታ፥ “ህዝቂያሳዉ ሀዋዳን ያጊደ ኦድተ፤ አሶረ ካቲ፥ ዎልቃማይ ኔና ሀዋዳን ያጌ፤ ‘ኔን ሀዋ ኬሻ አያን አማነታዲ?5ኔን ጮ መላ፥ ኦላ ኦለታናዉ ታዉ አዳ ኤራይነ ዎልቃይ ደኤ ያጋሳ። ሽን ኔን ኦናን አማነታደ ታ ቦላ ሀዋ ማካላዲ?6ኔን ግብጼ ካቲ ማዳና ጋደ ቆፔዳዋ ግዶፐ፥ መኤዳ ማቃ ጋትማን ጉፈትያ አሳ ማላ። አያዉ ጎፐ፥ ጻምአይ መእና፥ ፕንጩ ኩሽያ ጫዴነ ማዱጽሴ። ግብጼ ካቲ ባረናን አማነትያ አሳ ኡባዉ ሄዋ ማላ።’ ”7ሽን ኔን ታዉ፥ “ኑን መና ጎዳን፥ ኑ ጾሳን፥ አማነቴቶ” ያጎፐ፥ ህዝቂያስ ይሁዳ አሳነ የሩሳላመ አሳ፥ “ህንተ የሩሳላመን ደእያ ያርሽያሳን ጎይናናዉ ኮሼ” ጊደ፥ አዉ ጎይንያ ቃ ሳአቱዋነ ያርሽያ ሳኣ ድጌዳ ጾሳ እ ግደኔ?8አነ ሀእ ሃያ! ታ ጎዳ አሶረ ካትያና ናሰታ። ኔን ቶጋናዉ ዳንዳይያ፥ ግድያ አሳ ደሞፐ፥ ላኡ ሻአ ፓራቱዋ ታን ነዉ እማና።9ኔን፥ “ግብጼቱ ፓራ አሳቱዋነ ፓራ ጋረቱዋ ታዉ የዳና” ጋደ አማኖፐነ፥ ታ ጎዳ ኦላንቻቱዋ ካፓቱዋፐ እት ላፍያዋካ ዛራናዉ ዳንዳያካ።10ሄዋ ቦላካ ቃይ፥ ታን ሀእ ቱሙ መና ጎዳ አዛዙ ባይናን ሀ ጋድያ ይሳናዉ ከሳድታ? መና ጎዳይ ባረ ሁጲያን ታና፥ “ኔረ፥ ሄ ጋድያ ባደ፥ ኦላደ ባይዛ” ያጊደ ኦዴዳ ያጌ ያግተ ያጌዳ።11ሄዋፐ ጉይያን ኤልያቂመ፥ ሼብንነ ዮኣህ አሶረቱዋ ጋዳዋ ሀዋዳን ያጌድኖ፤ “ኑን ብለ ኤርያ ድራዉ፥ ሀያና ኔን ኑዉ ነ ቆማቶ ሶርያ ቃላን ኦዳ። ድርሳ ግምቢያ ሁጲያን ደእያ አሳይ ስሰና ማላ፥ እብራይስጸ ቃላን ኦዶፓ” ያጌድኖ።12ሽን ጋዳዋይ ዛረደ፥ “ሀ ቃላቱዋ ታን ህንተዉነ ህንተ ጎዳ ጻላላዉ ኦዳናዉ ታና ታ ጎዳይ ኪቴዴየ? ህንተናና እትፐ ባረንቱ ኡርቃ ሼሻ ማናዉነ ባረንቱ ሃ ሼሻ ኡሻናዉ ደእያ፥ ሀ ድርሳ ግምቢያ ቦላ ኡቴዳ አሳ ኡባዉ ኦዳናሳ ግደኔየ?” ያጌዳ።13ሄዋፐ ጉይያን አሶረቱዋ ጋዳዋይ ደንድ ኤቂደ፥ ባረ ቃላ ቁ ኦደ፥ እብራይስጸ ቃላን ሀዋዳን ያጌዳ፤ “አሶረ ካቲ ዎልቃማይ ህንተና ግያዋ ስስተ!14ካቲ ህንተና ሀዋዳን ያጌ፤ ‘ህዝቂያስ ህንተና ጭሞፖ፤ አያዉ ጎፐ፥ እ ህንተና ታ ኩሽያፐ ዎ አካናዉ ዳንዳየና።15እ ህንተና፥ “መና ጎዳይ ቱማ ኑና አሻና፤ ሀ ካታማይካ አሶረ ካትያ ኩሽያን ገለና” ጊደ ህንተ መና ጎዳን አማነታና ማላ ኦፖ’ ያጌ።16“ኤ፥ ህንተ ህዝቂያስ ኦድያዋ ስሶፕተ። አሶረ ካቲ ህንተና፥ ‘ታናና ስገትተ፤ ሃ ታኮ ከስተ። ያቶፐ፥ ህንተ ኡባይካ ህንተ ዎይንያ ቴራፐነ ህንተ ባላስያ ቴራፐ ማና፤ ህንተ ቦኬዳ ኦላፐካ ሃ ኡሻና።17ሄዋፐ ጉይያን ታን ያደ፥ ህንተና ህንተ ቢታ ማላትያ ቢታ አካደ አፋና። ሄ ቢታይ ካይነ ዎይንያ ኤሳይ፥ ኡክይነ ዎይንያ አታክልቲ ኩሜዳ ቢታ’ ያጌ።18“ህዝቂያስ ህንተና፥ ‘መና ጎዳይ ኑና አሻና’ ያጊደ ጭመናዳን ናገትተ። ጋድያ አሳቱዋ ጾሳቱዋፐ ባረ ቢታ አሶረ ካትያ ኩሽያፐ አሼዳ ጾስ ደኢየ?19ሀማታ ጾሳቱነ አርፋዳ ጾሳቱ ሀቃን ደኢኖ? ሳፋርዋይማ ግያ ካታማ ጾሳቱ ሀቃን ደኢኖ? ኡንቱንቱ ሳማርያ ታ ኩሽያፐ ዎ አኬድኖ?20ሀ ቢታቱዋ ጾሳቱዋ ኡባ ግዶን ባረ ጋድያ ታ ኩሽያፐ አይ ጾስ አሼዳዋ ሽን፥ መና ጎዳይ የሩሳላመ ታ ኩሽያፐ አሻኔ?” ያጌዳ።21ሽን አሳይ እት ቃላነ አዉ ዛረናን ጮኡ ጌዳ። አያዉ ጎፐ፥ ካቲ ኡንቱንታ፥ “አዉ አይነ ዛሪደ ኦዶፕተ” ያግ ዎዳ።22ሄዋፐ ጉይያን ህልቂያ ናአይ ካትያ ጎልያን አዎትያ ኤልያቂመ፥ ዋና ጻፊ ሼብንነ ታርክያ ጻፊ አሳፋ ናአይ ዮኣህ ባረንቱ ማዩዋ ፔደ፥ ህዝቂያሳኮ ቤድኖ፤ አሶረቱዋ ጋዳዋይ ጌዳዋ ኡባ አዉ ኦዴድኖ።The Word for the World International